“Kada Un Lo Karga Su Mes Karga”

“Kada un di nos lo duna kuenta di su mes na Dios.”—ROMANONAN 14:12.

1. Ki responsabilidat tres hóben hebreo a kumpli kuné fielmente?

TRES hóben hebreo ku tabata biba den Babilonia a konfrontá un desishon di bida-i-morto. Akaso nan lo mester bùig pa e imágen inmenso, manera lei di e pais a rekerí? Òf nan lo mester nenga di ador’é i ser tirá den un fòrnu di kandela kayente-kayente? Sadrak, Mesak i Abed-nego no tabatin tempu pa konsultá ku ningun hende; ni nan no tabatin nodi hasi esei. Sin vasilá nan a deklará: “Sea sigur, o rei, ku nos no ta bai sirbi bo diosnan, ni adorá e imágen di oro ku bo a lanta.” (Daniel 3:1-18) E tres hebreonan a karga nan mes karga di responsabilidat.

2. Ken eigenlijk a tuma desishon pa Pilato relashoná ku Hesukristu, i esei a libra e gobernadó romano di responsabilidat?

² Mas o ménos seis siglo despues, e gobernadó a tende e akusashonnan kontra e hòmber. Despues di analisá e kaso, e ta keda konvensí ku e akusado ta inosente. Ma e multitut ta eksigí su ehekushon. Despues di a purba resistí e demanda ei, e gobernadó ta demostrá ku e no ta dispuesto pa hiba su karga di responsabilidat i e ta sukumbí na e preshon. Labando su mannan, e ta deklará: “Mi ta inosente di e sanger di e hòmber hustu aki.” Anto e ta entregá e hòmber p’e ser klabá na staka. Sí, en bes di Ponsio Pilato karga su responsabilidat di tuma un desishon relashoná ku Hesukristu, e ta laga otro hende disidí p’e. Ni maske kuantu awa el a usa pa laba su man, esei no por apsolv’é di e responsabilidat di a dikta e sentensia inhustu ei kontra Hesus.—Mateo 27:11-26; Lukas 23:13-25.

3. Dikon nos no mester laga otro hende tuma desishon pa nos?

³ Kiko di abo? Ora abo tin ku tuma desishon, bo ta manera e tres hebreonan, òf bo ta laga otro hende tuma desishon pa bo? Tumamentu di desishon no ta fásil. Un persona mester ta madurá pa tuma desishonnan korekto. Por ehèmpel, mayornan tin ku tuma bon desishon pa nan yunan menor di edat. Klaru ku tumamentu di desishon ta masha difísil ora ku un situashon ta kompliká i tin vários faktor ku mester tuma na kuenta. Sin embargo, e responsabilidat di tuma desishon no ta asina pisá ku mester inkluyé entre e pesonan—òf kosnan ku ta kousa difikultat—ku rumannan ku tin e debido ‘kualidatnan spiritual’ lo tin ku yuda nos karga. (Galationan 6:1, 2) Al kontrario, e ta un karga pa kua “kada un di nos lo duna kuenta di su mes na Dios.” (Romanonan 14:12) Beibel ta deklará: “Kada un lo karga su mes karga.” (Galationan 6:5) Pues, kon nos por tuma desishonnan sabí den bida? Na promé lugá, nos tin ku rekonosé nos limitashonnan komo hende i siña kiko nos tin mester pa kompensá nan.

Un Rekisito Esensial

4. Ki lès sumamente importante tokante tumamentu di desishon nos mester siña for di e desobedensia di e promé pareha humano?

⁴ Na prinsipio di historia humano, e promé pareha a tuma un desishon ku a trese konsekuensianan desastroso. Nan a disidí di kome di e fruta di e palu di konosementu di bon i malu. (Génesis 2:16, 17) A base di kiko nan a tuma nan desishon? Beibel ta bisa: “E muhé a mira ku e palu tabata bon pa kuminda, i ku e tabata un delisia pa bista, i ku e palu tabata deseabel . . . el a kohe di su fruta i a kome; i el a duna su esposo tambe [“ora e,” NW] tabata huntu kuné, i el a kome.” (Génesis 3:6) Eva su desishon tabata basá riba deseo egoista. Su akshon a pone Adam hasi meskos. Komo resultado, piká i morto “a pasa pa tur hende.” (Romanonan 5:12) Adam ku Eva su desobedensia mester siña nos un lès sumamente importante relashoná ku hende su limitashon: A ménos ku hende pega na Dios su guia, tin hopi chèns ku nan ta tuma desishonnan robes.

5. Ki guia Yehova a perkurá pa nos, i kiko nos tin ku hasi pa benefisiá di dje?

⁵ Nos por ta hopi kontentu ku Yehova Dios no a laga nos sin guia! E Skritura ta bisa nos: “Bo orea lo tende un palabra tras di bo ta bisa: ‘Esaki ta e kaminda, kana den dje,’ ki ora ku boso bira na man drechi òf na man robes.” (Isaias 30:21) Yehova ta papia ku nos pa medio di su Palabra inspirá, e Beibel. Nos tin ku studia e Skritura i haña un konosementu eksakto di loke e ta bisa. Pa tuma desishonnan korekto, nos mester kome “kuminda sólido [ku] ta pa hende madurá.” Tambe ‘pa medio di práktika, nos tin nos mente entrená pa diserní loke ta bon i loke ta malu.’ (Hebreonan 5:14) Nos por entrená nos kapasidat di diserní dor di apliká loke nos ta siña for di e Palabra di Dios.

6. Kiko ta nesesario pa nos konsenshi funshoná bon?

⁶ Un faktor esensial den e proseso di tuma desishon ta e don di konsenshi ku nos a heredá. Nos konsenshi tin e kapasidat di husga nos, i e por ‘akusá nos òf defendé nos.’ (Romanonan 2:14, 15) Pero pa nos konsenshi funshoná bon, e mester ser entrená dor di e konosementu eksakto di e Palabra di Dios i hasí sensitivo dor di apliká e Palabra ei. Un konsenshi ku no ta entrená ta ser influensiá fásilmente pa kustumbernan lokal. Nos ambiente i e opinionnan di otro hende tambe por guia nos den kaminda robes. Kiko ta pasa ku nos konsenshi si bes tras bes nos ta ignor’é ora ku e ta pui nos i nos ta violá Dios su normanan? Ku tempu nos konsenshi por bira marká “komo si fuera ta ku heru kayente esaki a wòrdu hasí.” Es desir, meskos ku kueru kimá i tapá ku sikatris, e ta bira sin heful i e no ta reakshoná mas riba estímulo. (1 Timoteo 4:2) Di otro banda, un konsenshi entrená dor di e Palabra di Dios ta un guia konfiabel.

7. Menshoná un rekisito esensial den tumamentu di desishonnan sabí.

⁷ Pues anto, un rekisito esensial pa karga e responsabilidat di tuma desishonnan sabí ta konosementu eksakto di e Skritura i e kapasidat di apliká loke e ta bisa. En bes di tuma desishonnan purá i deskabeyá, nos mester tuma tempu pa buska prinsipionan bíbliko i usa nos kapasidat di pensa pa apliká nan. Asta ora nos ta haña nos tin ku tuma un desishon al momento—manera tabata e kaso ku Sadrak, Mesak i Abed-nego—nos lo ta bon prepará si nos tin konosementu eksakto di e Palabra di Dios i a us’é pa entrená nos konsenshi. Laga nos konsiderá dos área den bida pa asina nos por komprondé kon ora nos ta sigui hasi esfuerso pa yega na madures esei lo por mehorá nos abilidat di tuma desishon.

Ken Nos Mester Skohe pa Asosiá Kuné?

8, 9. (a) Ki prinsipionan ta mustra ku ta nesesario evitá mal asosiashon? (b) Mal asosiashon ta nifiká solamente amistat direkto ku hende sin prinsipio? Splika.

⁸ Apòstel Pablo a skirbi: “No laga hende gaña boso: Mal kompania ta daña bon kustumber.” (1 Korintionan 15:33) Hesukristu a bisa su disipelnan: ‘Boso no ta parti di mundu.’ (Juan 15:19) Ora nos a siña e prinsipionan aki, nos a komprondé mesora ku ta nesesario pa evitá amistat ku fornikadó, adúltero, ladron, buraché i otro hendenan asina. (1 Korintionan 6:9, 10) Pero segun ku nos ta haña mas konosementu di bèrdat bíbliko, nos ta bin realisá ku ta mesun perhudisial pa pasa tempu ku e tipo di hendenan ei dor di wak nan den pelíkula, na televishon, riba kòmpiuter òf dor di lesa tokante nan den buki. Esei ta e kaso tambe ora nos ta asosiá via chat room di Internet ku hende “hipókrita,” kendenan ta skonde loke nan ta.—Salmo 26:4.

⁹ Kiko di amistat será ku hende ku kisas ta moralmente limpi pero ku no tin fe den e Dios berdadero? E Skritura ta bisa nos: “Henter mundu ta bou di kontròl di e malbado.” (1 Juan 5:19) Pues esaki ta yuda nos komprondé ku mal asosiashon no ta solamente hendenan ku tin un aktitut muchu permisivo òf ku ta sin moral. P’esei lo ta sabí di nos parti pa kultivá amistat será solamente ku hende ku stima Yehova.

10. Kiko ta yuda nos tuma desishonnan maduro relashoná ku nos kontakto ku e mundu?

¹⁰ Pero no ta posibel ni ta un rekisito pa evitá tur-tur kontakto ku hende den mundu. (Juan 17:15) Partisipashon den e ministerio kristian, baimentu di skol òf trabou, tur ta enbolbé kontakto ku e mundu. Un kristian ku ta kasá ku un persona no-kreyente kisas ta hañ’é tin ku asosiá ku hende di mundu, mas ku den kaso di otro kristiannan. Sin embargo, dor di entrená nos kapasidat di diserní nos ta komprondé ku kontakto limitá ku e mundu kisas ta nesesario, pero ku esei ta kompletamente otro kos for di kultivá lasonan íntimo kuné. (Santiago 4:4) Pues, nos ta kapasitá pa tuma desishonnan maduro enkuanto nos partisipashon den aktividatnan eskolar ku no ta parti di e lèsnan di skol, manera evenementonan deportivo i bailamentu, òf asistí na komementu i fiesta organisá pa koleganan di trabou.

Skohementu di Empleo

11. Kiko ta e promé kos ku nos tin ku tuma na kuenta ora di tuma desishon tokante trabou?

¹¹ Aplikashon di prinsipionan bíbliko den un manera maduro ta yuda nos tuma desishonnan relashoná ku e manera ku nos ta kumpli ku nos obligashon di ‘proveé pa e hendenan di nos kas.’ (1 Timoteo 5:8) E promé kos ku nos tin ku tuma na kuenta ta e tipo di trabou, kiko e ta kome bebe. Skohementu di un tipo di trabou ku ta apoyá algu ku Beibel ta kondena direktamente, definitivamente ta malu. Pues, kristiannan berdadero no ta aseptá trabounan ku ta enserá idolatria, hòrtamentu, mal uso di sanger òf otro práktikanan ku ta kontra Beibel. Tampoko nos lo no gaña òf kometé froude, ni sikiera si un doño di trabou ta eksigí esei di nos.—Echonan 15:29; Revelashon 21:8.

12, 13. Kua ta algun faktor, fuera di e tipo di trabou mes, ku ta importante ora di tuma desishon relashoná ku empleo?

¹² Kiko si e trabou riba su mes no ta violá ningun rekisito di Dios spesífikamente? Segun ku nos ta haña mas konosementu di e bèrdat i nos kapasidat di diserní ta bira mihó, nos ta bin ripará otro faktornan ku mester tuma na kuenta. Kiko si e trabou ta enbolbé nos den un práktika kontrario na prinsipionan bíbliko, manera por ehèmpel kontestá telefòn na un establesimentu di wega di plaka? E fuente di bo salario i e sitio di e empleo tambe ta faktornan ku nos tin ku tuma na kuenta. Por ehèmpel, un kristian ku ta kontratista lo entregá un oferta pa fèrf un di e misanan di kristiandat i asina apoyá religion falsu?—2 Korintionan 6:14-16.

¹³ Kiko si na un okashon nos doño di trabou aseptá un kontrakt pa fèrf un lugá di adorashon falsu? Den e kaso aki, nos lo tin ku konsiderá faktornan manera te kon leu nos tin outoridat riba loke ta ser hasí i te na ki grado nos tin ku partisipá den e trabou. Awor, kiko di rindi servisionan ku no ta kontra normanan bíbliko, manera por ehèmpel entregá pòst tur kaminda den un komunidat, inkluso na lugánan ku ta promové práktikanan robes? Den tal kaso, e prinsipio ku tin na Mateo 5:45 lo no influensiá nos desishon? Un punto ku nos no mester pasa por haltu ta kon e echo ku nos tin ku hasi un trabou dia aden dia afó lo por afektá nos konsenshi. (Hebreonan 13:18) En bèrdat, hiba nos karga di responsabilidat ora di tuma desishonnan maduro relashoná ku empleo ta rekerí pa nos hasi nos kapasidat di diserní mas skèrpi i entrená e konsenshi ku Dios a duna nos.

“Den Tur Bo Kamindanan Rekonos’é”

14. Ora di tuma desishon, kiko semper nos mester hasi?

¹⁴ Kiko di e desishonnan ku nos ta tuma relashoná ku otro asuntunan, manera por ehèmpel sigui tras di edukashon eskolar i aseptá òf rechasá sierto tratamentu médiko? Ora di tuma kualke desishon, nos tin ku hasi sigur kua prinsipionan bíbliko ta al kaso, anto usa nos kapasidat mental pa apliká nan. Rei sabí Salomon di Israel di antigwedat a bisa: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.”—Proverbionan 3:5, 6.

15. Kiko nos ta siña for di e kristiannan di promé siglo tokante tumamentu di desishon?

¹⁵ Hopi bes, e desishonnan ku nos ta tuma tin efekto riba otro hende i nos tin ku tene kuenta ku esaki. Por ehèmpel, e kristiannan di promé siglo no tabata bou di hopi di e restrikshonnan di kuminda di e Lei di Moisés mas. Nan por a disidí di kome sierto kumindanan ku bou di e Lei tabata impuru pero ku den otro aspekto no tabata inaseptabel. Sin embargo, relashoná ku karni di un bestia ku lo por tabatin algun konekshon ku tèmpel di ídolo, apòstel Pablo a skirbi: “Si kuminda ta hasi mi ruman trompeká, lo mi no kome karni nunka mas, pa mi no hasi mi ruman trompeká.” (1 Korintionan 8:11-13) Pablo a animá e kristiannan di promé siglo pa tene konsiderashon ku e konsenshi di otro hende pa asina no laga nan trompeká. Pues, nos desishonnan no mester laga nos “bira kousa di tropieso.”—1 Korintionan 10:29, 32, NW.

Buska e Sabiduria di Dios

16. Kon orashon por yuda nos ora di tuma desishon?

¹⁶ Un yudansa sumamente balioso den tumamentu di desishon ta orashon. Disipel Santiago a bisa: “Si kualkier di boso falta sabiduria, lag’é pidi Dios, kende ta duna na tur hende generosamente i sin reproche, i esaki lo wòrdu duná na dje.” (Santiago 1:5) Pues ku konfiansa nos por akudí na Yehova den orashon i pidié e sabiduria nesesario pa tuma desishonnan korekto. Segun ku nos ta papia ku e Dios berdadero tokante nos preokupashonnan i ta buska su guia, spiritu santu lo por yuda nos komprondé mas mihó e tekstonan bíbliko ku nos ta konsiderando i laga nos kòrda riba esnan ku kisas nos a pasa por haltu.

17. Kon otro hende por yuda nos den e proseso di tuma desishon?

¹⁷ Otro hende por yuda nos tuma desishon? Sí, Yehova a perkurá personanan maduro den e kongregashon. (Efesionan 4:11, 12) Nos por konsultá nan, foral si ta trata di un desishon grandi. Personanan ku tin un perspikasia spiritual profundo i ku tin eksperensia den bida, por hala nos atenshon na prinsipionan bíbliko adishonal ku lo por tin un influensia riba nos desishon i yuda nos “hasi sigur di e kosnan mas importante.” (Filipensenan 1:9, 10, NW) Sin embargo, un palabra di koutela ta na su lugá: Nos mester tene kuidou pa nos no laga otro hende tuma desishon pa nos. E karga di responsabilidat, ta nos mes tin ku karg’é.

E Resultado Tur Biaha Ta Bon?

18. Kiko nos por bisa tokante e resultado di un bon desishon?

¹⁸ Akaso tur biaha desishonnan ku ta firmemente basá riba prinsipionan bíbliko i tumá kuidadosamente ta hiba na un bon resultado? Sí, riba término largu. Pero tin biaha, riba término kòrtiku e efekto por ta desfaborabel. Sadrak, Mesak i Abed-nego tabata sa ku morto lo por tabata e resultado di nan desishon di no adorá e imágen inmenso. (Daniel 3:16-19) Asina tambe, despues ku e apòstelnan a bisa e Korte Supremo hudiu ku nan tin ku obedesé Dios mas ku hende, nan a ser sutá promé ku a laga nan bai. (Echonan 5:27-29, 40) Ademas, “tempu i suseso imprevisto” lo por tin un efekto desfaborabel riba kualke desishon. (Eklesiastés 9:11, NW) Si den un manera òf otro nos haña nos ku problema apesar di a tuma un desishon korekto, nos por tin sigur ku Yehova lo yuda nos perseverá i lo bendishoná nos na final di kuenta.—2 Korintionan 4:7.

19. Kon nos por karga ku kurashi nos mes karga di responsabilidat ora di tuma desishon?

¹⁹ Pues anto, ora di tuma desishon nos tin ku buska prinsipionan bíbliko i usa nos kapasidat di pensa pa apliká nan. Nos por ta hopi gradisidu pa e yudansa ku Yehova a perkurá pa medio di su spiritu santu i e rumannan maduro den kongregashon. Pa medio di tal guia i perkurashonnan, laga nos karga ku kurashi nos mes karga di responsabilidat pa tuma desishonnan sabí.

Kiko Bo A Siña?

• Kua ta un rekisito esensial pa bo por tuma bon desishon?

• Kon e echo ku nos ta progresá na madures ta influensiá ken nos ta skohe pa anda kuné?

• Kua ta algun faktor importante ku nos mester tene na kuenta ora di tuma desishon relashoná ku empleo?

• Ki yudansa tin disponibel pa ora di tuma desishon?

[Plachi na página 22]

E desobedensia di Adam ku Eva ta siña nos un lès sumamente importante

[Plachi na página 24]

Promé ku bo tuma un desishon importante, buska prinsipionan bíbliko