Dios Ta Interesá den Mi?
Kontestanan komun:
▪ “Dios ta muchu importante pa preokupá ku mi problemanan.”
▪ “Mi no ta kere ku e ta interesá den mi.”
Kiko Hesus a bisa?
▪ “No t’asina ku sinku mòfi ta wòrdu bendí pa dos plaka? I ni un di nan no ta wòrdu lubidá dilanti di Dios. Di bèrdat, asta e drachinan di kabei riba boso kabes, tur ta kontá. No tene miedu; boso bal mas ku un kantidat di mòfi.” (Lukas 12:6, 7) Sin duda, Hesus a siña ku Dios ta interesá den nos.
▪ “No preokupá boso mes anto, bisando: ‘Kiko nos lo kome?’ òf ‘Kiko nos lo bebe?’ òf ‘Kiko nos lo bisti?’ Pasobra tur e kosnan akí e paganonan ta buska; ma boso Tata selestial sa ku boso tin mester di tur e kosnan akí.” (Mateo 6:31, 32) Hesus tabatin sigur ku Dios sa kiko ta nos nesesidatnan personal.
BEIBEL definitivamente ta mustra ku Dios ta interesá den nos. (Salmo 55:22; 1 Pedro 5:7) Pero si e ta interesá den nos, dikon nos ta sufri asina tantu anto? Si Dios ta amoroso i todopoderoso, dikon e no ta kaba ku sufrimentu?
E kontesta ta relashoná ku algu ku masha tiki hende sa: Satanas e Diabel ta e gobernante di e mundu malbado akí. Ora Satanas a tenta Hesus, el a ofres’é tur e reinonan di mundu, bisando: “Lo mi duna bo henter e dominio akí i su gloria; pasobra esei a wòrdu entregá na mi, i mi ta dun’é na esun ku mi kier.”—Lukas 4:5-7.
Ken a hasi Satanas gobernante di mundu? Ora nos promé mayornan, Adam ku Eva, a obedesé Satanas i a bira lomba pa Dios, na moda di papia, nan a skohe Satanas komo nan gobernante. Desde e rebelion ei, Yehova Dios ku pasenshi a laga tempu pasa pa mustra ku Satanas su gobernashon ta un frakaso total. Yehova no a fòrsa hende pa sirbié, pero sí el a habri kaminda pa nos bolbe serka dje.—Romanonan 5:10.
Pa motibu ku Dios ta interesá den nos, el a perkurá pa Hesus libra nos for di Satanas su gobernashon. Den futuro serkano, Hesus lo “destruí esun ku tabatin poder riba morto, esta, Diabel.” (Hebreonan 2:14) Di e manera ei, Hesus lo “destruí e obranan di Diabel.”—1 Juan 3:8.
E tera akí lo bira un paradeis atrobe. E tempu ei, Dios “lo seka tur lágrima kita for di [hende su] wowo; i lo no tin morto mas; lo no tin lamento mas, ni yoramentu, ni doló; e promé kosnan [lo] a pasa.”—Revelashon 21:4, 5.a
[Nota]
a Pa mas informashon tokante e tópiko dikon Dios ta permití sufrimentu, wak kapítulo 11 di e buki Kiko Beibel Ta Siña Realmente? publiká pa Testigunan di Yehova.
[Komentario na página 7]
E tera lo bira un paradeis atrobe