Hesukristu​—Su Mensahe i Abo

“Ami a bin pa nan tin bida i pa nan tiné na abundansia.” ​—JUAN 10:10.

HESUKRISTU a bini na mundu prinsipalmente pa duna i no pa risibí. Mediante su ministerio, el a duna humanidat un regalo masha presioso, esta, un mensahe ku a revelá e bèrdat tokante Dios i Su boluntat. Personanan ku reakshoná bon riba e mensahe ei por disfrutá di un mihó bida for di awor, i miónes di kristian berdadero por konfirmá esei.a Pero, e regalo di mas balioso ku Hesus a duna na nos fabor ta su bida perfekto. Ta p’esei e sakrifisio akí tabata e parti fundamental di su mensahe. I nos bienestar eterno ta dependé di nos reakshon riba e parti importante akí di Hesus su mensahe.

Loke Dios i Kristu a duna Hesus tabata sa ku lo el a muri un morto doloroso na man di su enemigunan. (Mateo 20:​17-19) Sinembargo, su palabranan bon konosí, registrá na Juan 3:16, ta mustra ku “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” Ademas, Hesus a bisa ku el a bini pa “duna su bida komo preis di reskate pa hopi.” (Mateo 20:28) Dikon el a bisa ku su bida lo a ser duná en bes di tumá?

Motivá pa un amor inigualabel, Dios a perkurá pa hende por ser salbá for di piká heredá i su konsekuensianan, esta, imperfekshon i morto. Pa logra esei, Dios a manda su Yu unigénito na mundu pa duna su bida komo sakrifisio. Hesus a hasi esei boluntariamente, dunando su bida humano perfekto na nos fabor. E provishon akí, esta e reskate, ta e regalo di mas grandi ku Dios a duna humanidat.b E regalo ei ta habri kaminda pa hende haña bida eterno.

Loke bo mester hasi E reskate ta un regalo pa abo personalmente? Esei ta dependé di abo. Pa ilustrá esaki: Imaginá ku un hende ofresé bo un regalo bunita lorá. Ta klaru ku e regalo ei no ta bira di bo si bo no asept’é. Di mes manera, Yehova ta ofresé bo e reskate, pero e regalo akí no ta bira di bo si bo no asept’é. Kon bo por hasi esei?

Hesus a bisa ku esnan ku “kere,” òf ehersé fe, den dje lo haña bida eterno. Fe tin di haber ku e manera ku bo ta hiba bo bida. (Santiago 2:26) Ehersé fe den Hesus ta enserá biba na armonia ku loke el a bisa i hasi. Pa bo por hasi esei, bo mester siña konosé Hesus i su Tata bon. Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”​—Juan 17:3.

Mas o ménos 2000 aña pasá, Hesukristu a prediká un mensahe ku a kambia bida di miónes di hende rònt mundu. Bo ke sa mas tokante e mensahe ei i tambe kon abo i bo sernan kerí por benefisiá di dje, no solamente awe sino pa semper? Testigunan di Yehova gustosamente lo yuda bo.

[Nota]