Hala Serka Dios
Kumpli ku Bo Deber ku Dios
BO A yega di puntra bo mes: ‘Kiko ta e propósito di bida?’ Wèl, Yehova no solamente a krea nos ku e kapasidat di hasi e pregunta ei pero tambe ku un anhelo profundo pa haña e kontesta. Pues, nos por ta masha kontentu ku nos Dios amoroso a hasi posibel pa nos por haña e kontesta tambe. Na unda? Den su Palabra, esta, Beibel. P’esei, laga nos wak kiko Rei Sálomon a bisa na Eklesiástes 12:13 (NW).
Sálomon a biba bou di sirkunstansianan masha spesial. P’esei e tabata den posishon pa bisa kon hende por haña berdadero felisidat i propósito den bida. Sí, Yehova a bendishon’é ku sabiduria ekstraordinario, rikesa abundante i outoridat komo rei. Esei a permitié hasi un investigashon profundo di e kosnan ku hende ta kore tras di dje, ku ta entre otro rikesa i prominensia. (Eklesiástes 2:4-9; 4:4) Despues, bou di inspirashon di Dios, el a resumí loke el a deskubrí ku e siguiente palabranan: “E konklushon dje asuntu, despues di a tende tur kos, ta: Teme e Dios berdadero i warda su mandamentunan. Pasobra esaki ta e deber di hende.” E palabranan ei ta deskribí e kos di mas rekompensador i noble ku un hende por hasi.
“Teme e Dios berdadero.” Kisas na promé instante, e idea di teme Dios no ta parse masha atraktivo. Pero e temor ku Sálomon ta papia di dje ta un sintimentu positivo. E no ta e temor ku un esklabo tin pa un doño kruel; mas bien, e ta e sintimentu di un yu ku ta ansioso pa agradá su tata ku ta stim’é. Segun un obra di konsulta, temor di Dios ta e “rèspèt profundo ku [Dios su] pueblo tin p’E pasobra nan ta stim’É i tin masha rèspèt pa Su poder i grandesa.” E sintimentu ei ta motivá nos pa hasi Dios su boluntat pasobra nos ta stim’é i nos sa ku e tambe ta stima nos. Pero e temor positivo akí no ta djis un sintimentu; e ta ser desplegá mediante obra. Kon asina?
“Warda su mandamentunan.” Temor di Dios ta motivá nos pa obedes’é. I nos tin bon motibu pa obedesé Yehova. Komo nos Kreador, e sa kon ta e mihó manera pa nos biba, meskos ku un fabrikante sa kon ta e mihó manera pa usa su produkto. Ademas, Yehova tin nos bienestar na pechu. E ke pa nos ta felis, i su rekisitonan ta pa yuda nos logra esei. (Isaías 48:17) Apòstel Huan a bisa esei ku e siguiente palabranan: “Amor pa Dios ta nifiká ku nos ta kumpli ku su mandamentunan; sinembargo, su mandamentunan no ta pisá.” (1 Huan 5:3) Pues, nos obedensia ta demostrá nos amor pa Dios, i su mandamentunan ta reflehá su amor pa nos.
“Esaki ta e deber di hende.” E palabranan akí ta resaltá un motibu importante pa teme Dios i obedes’é. Nan ta mustra bon kla ku esei ta nos obligashon, nos deber. Yehova ta nos Kreador, pues nos debe nos bida na dje. (Salmo 36:9) I nos tin ku obedes’é. P’esei, ora nos ta biba manera e ke, nos ta kumpli ku nos deber.
Pues anto, kiko ta e propósito di bida? Ku poko palabra: Nos ta riba mundu pa hasi Dios su boluntat. No tin un mihó manera pa duna nos bida nifikashon. Awor, lo bo ke sa mas tokante Yehova su boluntat i kon bo por armonisá bo bida ku esaki? Wèl, Testigunan di Yehova lo ta kontentu pa yuda bo.
Durante desèmber lo bo por lesa: