E Berdadero Kousante di Guera i Sufrimentu

Promé Guera Mundial a terminá dia 11 di novèmber 1918. Negoshinan a keda será i tabatin fiesta riba kaya. Pero e euforia no a dura mashá. Un otro tragedia, ku a kousa mas tantu morto ku arma di guera mes, a sigui djis despues di e guera mundial.

Na yüni 1918, e sòldánan na Fransia a pega ku un malesa ku yama grip spañó. E malesa akí a resultá di ta mortal. Por ehèmpel, denter di algun luna, e malesa akí a mata mas tantu sòldá merikano na Fransia ku esnan ku a muri den bataya. Despues di e guera, esnan infektá ku e grip a bai nan pais bèk, i asina e grip a plama rònt mundu.

E añanan despues di guera tabata marká tambe pa hamber i miseria ekonómiko. Na momento ku guera a terminá na 1918, hopi hende na Europa tabata muriendo di hamber. Na 1923, e moneda aleman a pèrdè kasi tur su balor. Seis aña despues, ekonomia mundial a kai den otro. Finalmente, na 1939, Segundo Guera Mundial a dal aden; den sierto sentido e tabata un kontinuashon di e promé konflikto mundial. Kiko tabatin tras di e seri di suseso desastroso akí?

E SEÑAL DI E ÚLTIMO DIANAN

Profesianan di Beibel ta yuda nos komprondé e berdadero nifikashon di susesonan históriko, i esaki ta konta spesialmente pa Promé Guera Mundial. Hesukristu a profetisá di un tempu ku ‘nashon lo lanta kontra nashon’ i ku lo tin pèst i skarsedat di kuminda rònt mundu. (Mateo 24:3, 7; Lukas 21:10, 11) El a bisa su disipelnan ku e kalamidatnan akí huntu lo forma e señal di e último dianan. E buki di Revelashon ta duna mas detaye i ta relashoná e “ai” riba tera ku un guera ku a tuma lugá den shelu.—Wak e kuadro “Guera Riba Tera i Guera den Shelu.”

E mesun buki di Beibel akí ta deskribí kuater koredó di kabai. Tres di e kuater koredónan di kabai akí ta simbolisá e mesun desasternan ku Hesus a papia di dje mas promé, esta, guera, hamber i pèst. (Wak e kuadro “Di Bèrdat e Kuater Koredónan di Kabai Ta Koriendo?”) No tin duda ku Promé Guera Mundial tabata komienso di un era di sufrimentu ku a sigui te den nos tempu. I Beibel ta mustra ku Satanas ta esun ku, na moda di papia, a lòs e promé tiru. (1 Huan 5:19) Lo yega un fin na su poder un dia?

E buki di Revelashon ta sigurá nos tambe ku a keda Satanas “masha poko tempu.” (Revelashon 12:12) Ta p’esei e ta yen di rabia i ta kousa asina tantu angustia aki riba tera. E problemanan ku nos ta mira anto ta indiká ku Satanas su tempu ta serka di kaba.

PRONTO E OBRANAN DI DIABEL LO KABA NA NADA

Promé Guera Mundial tabata un suseso ku a kambia rumbo di historia. E tabata komienso di un era di guera, revolushon i tambe deskonfiansa den lidernan humano. Tambe e ta duna prueba palpabel ku Satanas a ser saká for di shelu. (Revelashon 12:9) E gobernante invisibel di e mundu akí a reakshoná manera un diktador malbado ku sa ku su dianan ta kontá. Ora su dianan yega na nan fin, e problemanan ku Promé Guera Mundial a okashoná tambe lo yega na nan fin.

Profesianan di Beibel ta sigurá nos ku pronto Hesukristu, nos Rei selestial, lo “destruí e obranan di Diabel.” (1 Huan 3:8) Rònt mundu, miónes di hende ta resa pa e Reino di Dios bini. Abo tambe ta pidi esei? Mediante e Reino ei, por fin hende fiel lo mira Dios su boluntat, no di Satanas, sosodé riba tera. (Mateo 6:9, 10) Bou di Dios su Reino nunka mas lo tin un guera mundial, ni niun otro guera! (Salmo 46:9) Nos ta animá bo pa siña mas tokante e Reino ei, i asina biba den un mundu kaminda pa semper lo tin pas!—Isaías 9:6, 7.