Kon Yehova Ta Mustra Ku E Ta Stima Nos?

1. Kiko apòstel Huan a animá kristiannan pa hasi, i dikon?

NOS mester pensa profundamente riba e palabranan ku nos ta haña na 1 Huan 3:1: “Mira ki gran amor e Tata a mustra na nos.” Ku e palabranan ei, apòstel Huan a animá kristiannan pa meditá riba e vários maneranan ku Dios a mustra su amor na nan. Si nos tambe hasi esei, nos amor pa Yehova lo krese i nos lo hala mas serka dje.

2. Dikon ta difísil pa algun hende komprondé ku Yehova ta stima nan?

² Lamentablemente, tin hende ta haña ku ta difísil pa komprondé ku Dios por stima nan. Pa nan, e úniko kos ku Dios ta hasi ta di traha regla i kastigá esnan ku no ta obedes’é. Òf kisas siñansanan falsu a pone nan sinti ku Dios ta sin heful i ku ta imposibel pa stim’é. Di otro banda, tin hende ta kere ku ni maske kiko nos hasi, sea bon òf malu, tòg Dios ta stima nos. Pero den bo estudio di Beibel bo a siña ku amor ta e kualidat prinsipal di Dios. E amor ei a motiv’é pa duna su Yu komo un reskate pa nos. (Huan 3:16; 1 Huan 4:8) Kisas e manera ku nos a lanta i nos sirkunstansianan di bida ta stroba nos di komprondé kuantu Dios ta stima nos.

3. Kiko por yuda nos komprondé e amor ku Dios tin pa nos?

³ Kon anto Dios ta mustra ku e ta stima nos? Pa nos por kontestá e pregunta ei nos mester komprondé promé ki relashon tin entre Dios i hende. Beibel ta bisa ku Yehova ta esun ku a krea nos. (Lesa Salmo 100:3-5.) P’esei, Beibel ta yama Adam “yu di Dios.” (Luk. 3:38) Ademas, Hesus a siña nos pa bisa den orashon: “Nos Tata ku ta den shelu.” (Mat. 6:9) Yehova ta nos Tata pasobra ta é a duna nos bida. E relashon entre nos ku Yehova ta manera e relashon ku tin entre un tata ku su yu. Ku otro palabra, Yehova ta stima nos manera un bon tata ta stima su yunan.

4. (a) Ki diferensia tin entre Yehova i un tata humano? (b) Kiko nos lo konsiderá den e artíkulo akí i esun siguiente?

⁴ Naturalmente, tatanan humano ta imperfekto. Maske kuantu nan purba, nan no por ekspresá kompletamente e amor ku Yehova ta manifestá. Algun hende a asta pasa den eksperensianan doloroso na kas tempu nan tabata mucha, lagando nan emoshonalmente i sikológikamente troumatisá. Esei ta algu hopi lamentabel. Hamas Yehova lo hasi esei ku su yunan. (Sal. 27:10) Sin duda, su amor i interes pa nos ta hala nos mas serka dje. (Sant. 4:8) Den e artíkulo akí nos lo konsiderá kuater manera ku Yehova ta mustra ku e ta stima nos. I den e siguiente artíkulo, nos lo analisá kuater manera kon nos por mustra ku nos ta stima Dios.

YEHOVA TA PERKURÁ BON PA NOS

5. Kiko apòstel Pablo a bisa e hendenan di Aténas tokante Dios?

⁵ Tempu ku apòstel Pablo tabata na Aténas, Gresia, el a ripará ku e stat tabata yen di imágen di dios falsu. E hendenan einan tabata kere ku e diosnan falsu ei a duna nan bida i tabata perkurá pa nan. Despues ku el a ripará esei, Pablo a bisa nan: “E Dios ku a traha mundu i tur loke tin den dje . . . ta duna tur hende bida, rosea i tur kos . . . Pa medio di dje nos tin bida i ta move i ta eksistí.” (Echo. 17:24, 25, 28) Yehova ta stima nos, i p’esei e ta duna nos tur loke nos tin mester pa biba. Laga nos wak algun ehèmpel.

6. Kon e manera ku Dios a traha Tera ta mustra ku e ta stima nos? (Wak e promé plachi.)

⁶ Por ehèmpel, pensa riba nos planeta. Beibel ta bisa ku Yehova, e Kreador, a duna Tera “na e yunan di hende.” (Sal. 115:15, 16) Sientífikonan a gasta un suma enorme di plaka pa buska otro planetanan ku ta paresido na esun di nos. Aunke nan a deskubrí sientos di planeta, nan a keda desepshoná pasobra ningun di e planetanan ei no tin e kondishonnan ideal ku Tera tin pa sostené bida. Ku otro palabra, nos planeta ta úniko. Pensa riba esaki: Di tur e planetanan ku ta eksistí den nos galaksia Via Láktea (Melkweg), Tera ta e úniko planeta ku Yehova a traha pa por tin bida riba dje. No esei so, el a trah’é tambe komo un dushi i bunita hogar pa su kreashon humano. (Isa. 45:18) Esaki ta mustra kuantu Dios ta stima nos.—Lesa Yòb 38:4, 7; Salmo 8:3-5.

7. Kon e amor di Dios ta bisto den e manera ku el a traha nos?

⁷ Un otro manera ku Yehova ta mustra ku e ta stima nos ta e echo ku el a traha nos den su imágen. (Gén. 1:27) P’esei, nos por sinti su amor i ekspresá nos amor na dje, i esei ta hasi nos felis meskos ku un mucha ta sintié felis ora e haña amor i atenshon di su mayornan. Ademas, Hesus a bisa: “Felis ta esnan ku ta konsiente di nan nesesidat spiritual.” (Mat. 5:3) Yehova ta un Tata amoroso “kende ta duna nos tur e kosnan ku nos ta disfrutá di dje,” tantu e kosnan material komo spiritual.—1 Tim. 6:17; Sal. 145:16.

YEHOVA TA SIÑA NOS E BÈRDAT

8. Dikon nos por dependé riba e guia ku e “Dios di bèrdat” ta duna nos?

⁸ Tatanan ta stima nan yunan i ke protehá nan pa nan no ser engañá. Pero, hopi mayor no por duna nan yunan bon guia debí ku nan mes no ta sigui e prinsipionan di Beibel. Komo resultado, hopi famia ta infelis i ta sufri. (Pro. 14:12) Di otro banda, Yehova sí ta duna su yunan e mihó guia pasobra e ta e “Dios di bèrdat.” (Sal. 31:5, BPK) E ta stima nan i p’esei e ta guia nan den tur aspekto di bida, spesialmente ora ta trata di asuntunan di adorashon. (Lesa Salmo 43:3.) Laga nos analisá algun bèrdat ku ta mustra ku Dios ta stima nos.

9, 10. Pa mustra ku Yehova ta stima nos, (a) kiko el a revelá tokante su mes? (b) kiko el a revelá tokante nos?

⁹ Na promé lugá, Yehova ta revelá e bèrdat tokante su mes. Por ehèmpel, el a laga nos sa su nòmber, ku ta aparesé mas biaha ku kualke otro nòmber den Beibel. Di e manera ei, Yehova ta laga nos konos’é mihó pa asina nos por hala mas serka dje. (Sant. 4:8) Ademas, Yehova a revelá su kualidatnan pa nos haña sa ki tipo di Dios e ta. E inmenso universo ta revelá e poder i sabiduria di Yehova. I Beibel ta siña nos tokante Dios su hustisia, i mas ku tur kos, su gran amor. (Rom. 1:20) Yehova no ta solamente un tata poderoso i sabí, pero tambe amoroso i hustu. Pa e motibu ei, ta mas fásil pa nos tin un relashon íntimo kuné.

¹⁰ Un otro kos ku Yehova a revelá tin di haber ku nos papel den su propósito. E ke pa nos traha i biba huntu den union ku henter su famia universal. Ademas, Beibel ta siña ku nos no por ta independiente di Dios i ku e no a traha nos ku e derecho pa disidí pa nos mes kiko ta bon i kiko ta malu. Si nos ignorá e bèrdatnan fundamental akí, semper lo tin konsekuensia. (Yer. 10:23) Ta solamente si nos rekonosé Dios su outoridat, nos por disfrutá di pas i armonia den nos bida. No ta amoroso di nos Tata ku el a revelá e bèrdat akí na nos?

11. Ki promesa di Yehova ta mustra ku e ta stima nos?

¹¹ Un tata ku ta stima su yunan ta preokupá tokante nan futuro, pasobra e ke pa nan tin un propósito den bida i pa nan ta felis. Lamentablemente, mayoria di hende no sa kiko pa hasi ku nan bida, òf nan ta kore tras di metanan ku no ta duna berdadero felisidat. (Sal. 90:10) Di otro banda, nos bida sí tin berdadero propósito debí na e futuro maravioso ku nos Tata, Yehova, a primintí nos.

YEHOVA TA DUNA NOS KONSEHO I DISIPLINA

12. Kon Yehova a mustra tantu Kain komo Baruk ku e tabata stima nan?

¹² Ora Yehova a mira ku Kain tabata a punto di hasi algu malu, el a bis’é: “Pakiko bo ta rabiá? I pakiko bo kara ta será asina? Si bo hasi bon, lo bo no wòrdu aseptá? . . . Ma abo mester [dominá e piká].” (Gén. 4:6, 7) E konseho ei a bini nèt na tempu. Pero lamentablemente, Kain no a skucha e konseho ei, i p’esei e mester a sufri e konsekuensianan. (Gén. 4:11-13) Na un otro okashon, ora Baruk tabata sinti su mes kansá i desanimá, Yehova a dun’é bon konseho pa yud’é mira dikon e tabata den e situashon ei. Baruk no tabata manera Kain pasobra e sí a aseptá e guia di Yehova, i esei a salba su bida.—Yer. 45:2-5.

13. Dikon Yehova ta permití su sirbidónan fiel pasa dor di prueba?

¹³ Apòstel Pablo a bisa: “Esun ku Yehova ta stima e ta disipliná; de echo, e ta [kastigá] tur hende ku e ta risibí komo yu.” (Heb. 12:6, wak nota) Disiplina no ta enserá solamente kastigu. Beibel ta menshoná situashonnan den kua Yehova a permití su sirbidónan fiel pasa dor di pruebanan difísil komo un forma di disiplina òf entrenamentu. Pensa riba Yosef, Moises i David. Ora nos lesa nan relato den Beibel, nos por mira ku Yehova tabata ku nan den e momentonan di mas difísil di nan bida. Loke nan a siña durante e pruebanan ei a yuda nan ora nan a haña responsabilidatnan mas grandi. E relatonan akí ta yuda nos mira kuantu amor Yehova tin pa nos.—Lesa Proverbionan 3:11, 12.

14. Dikon nos por bisa ku e disiplina ku Yehova ta duna nos ta un muestra di su amor?

¹⁴ E disiplina di Yehova ta yuda nos mira un otro manera ku e ta stima nos. Si un persona ku a kometé un fayo risibí disiplina di Yehova i arepentí, Yehova lo pordon’é “abundantemente.” (Isa. 55:7) Kiko esei ke men? David a deskribí e manera ku Yehova ta pordoná ku e siguiente palabranan: “[E] ta pordoná tur bo inikidatnan; . . . ta kura tur bo malesanan; . . . ta redimí bo bida for di destrukshon; . . . ta koroná bo ku miserikòrdia i kompashon. Mes leu ku pariba ta for di pabou, mes leu el a alehá nos transgreshonnan for di nos.” (Sal. 103:3, 4, 12) Laga nos ta determiná pa semper aktua mesora ora Yehova duna nos konseho i disiplina. Kòrda ku e ta hasi esaki pasobra e ta stima nos.—Sal. 30:5.

YEHOVA TA PROTEHÁ NOS

15. Ki ehèmpel ta mustra ku nos ta presioso den bista di Yehova?

¹⁵ Un di e kosnan di mas importante pa un tata hasi pa su famia ta pa protehá nan. Nos Tata Yehova ta hasi meskos. E salmista a bisa di Yehova: “E ta preservá alma di su santunan; e ta libra nan for di man di e malbado.” (Sal. 97:10) Pensa riba e siguiente ehèmpel. Nos wowonan ta hopi presioso pa nos, i nos lo hasi tur loke ta nesesario pa protehá nan. Yehova su sirbidónan tambe ta presioso den su bista. E ta hasi tur loke ta nesesario pa protehá nan.—Lesa Zakarías 2:8.

16, 17. Kon Yehova a protehá su pueblo tantu den pasado komo awe?

¹⁶ Semper Yehova a usa e angelnan pa protehá su pueblo. (Sal. 91:11) Na un okashon, un angel so a mata 185.000 sòldá Asirio den un solo anochi pa salba e pueblo di Yehova. (2 Rei. 19:35) Siglonan despues, e angelnan a libra tantu Pedro, Pablo komo otro kristiannan for di prizòn. (Echo. 5:18-20; 12:6-11) Awe tambe Yehova ta protehá su pueblo. Por ehèmpel, un representante di nos ofisina prinsipal ku a bishitá un sukursal na Afrika a bisa ku tabatin hopi konflikto polítiko i religioso den e pais. E situashon tabata teribel, tabatin bringamentu, matamentu, violashon seksual i hopi hende a pèrdè tur nan pertenensianan. Aunke hopi di nos rumannan tambe a pèrdè tur loke nan tabatin, niun di nan no a pèrdè nan bida. Ora ku e ruman a puntra nan kon nan ta sinti, nan a kontestá ku un smail grandi: “Tur kos ta bon, danki na Yehova.” Nan a ègt sinti ku Dios ta stima nan.

¹⁷ Ta bèrdat ku Yehova a permití algun sirbidó fiel manera Esteban muri. Pero Dios ta protehá su pueblo dor di spièrta nan kontra e trampanan di Satanas. (Efe. 6:10-12) Yehova ta usa su Palabra i e publikashonnan di su organisashon pa protehá nos. Por ehèmpel, nos a siña di e peligernan di entretenimentu inmoral i violento, amor pa plaka i mal uso di Internet. Ta bisto anto ku Yehova, komo un Tata amoroso, ta kuida i protehá su pueblo.

UN GRAN PRIVILEGIO

18. Kon abo ta sinti tokante e amor ku Dios tin pa bo?

¹⁸ Despues di a konsiderá djis algun manera ku Yehova ta mustra ku e ta stima nos, kisas nos ta sinti meskos ku Moises, kende a bisa: “Satisfasé nos den mainta ku bo miserikòrdia, ku nos por kanta di goso i ta kontentu tur nos dianan.” (Sal. 90:14) Ta un bendishon ku nos por komprondé i sinti ku Yehova ta stima nos. Esta un gran privilegio esei ta! Nos ta sinti meskos ku apòstel Huan ora el a bisa: “Mira ki gran amor e Tata a mustra na nos.”—1 Huan 3:1.