Bo Por Ta Konvensí Ku Yehova Stima Bo

1. Kiko a pone ku bo a kuminsá sirbi Yehova? (Wak e plachi.)

BO TA kòrda e dia ku bo a resa na Yehova i a primintié ku lo bo sirbié pa restu di bo bida? Bo a hasi esei pasobra bo a siña konosé Yehova i siña stim’é. Bo a primintié ku su boluntat lo ta e kos di mas importante den bo bida i ku lo bo sigui stim’é ku henter bo kurason, alma, mente i forsa. (Mar. 12:30) Desde e dia ei, bo amor p’e a sigui bira mas fuerte. Pues si un hende yega puntra bo, ‘Di bèrdat bo stima Yehova?’ kiko lo bo bisa? Sin pensa dos biaha lo bo kontestá: ‘Konpolaga mi stima Yehova.’

2-3. Yehova ke pa nos ta sigur di kiko, i kiko nos lo analisá den e artíkulo akí? (Yeremías 31:3)

² Pero awor kiko si un hende puntra bo, “Bo tin sigur ku Yehova stima abo?” Lo bo tarda pa kontestá? Kisas pasobra bo ta pensa ku Yehova no por stima un hende manera abo? Un ruman muhé ku na chikitu no tabata sinti ku su mayornan tabata stim’é a bisa: “Mi stima Yehova, mi no ta duda den esei. Loke mi ta lucha hopi biaha kuné ta si Yehova stima ami.” Ban wak kon kada un di nos por sa ku Yehova realmente stima nos.

³ Yehova ke pa bo ta kompletamente konvensí ku e stima bo. (Lesa Yeremías 31:3.) No lubidá ku ta Yehova a hala bo serka dje. Anto ora bo a dediká bo mes na dje i batisá, bo a haña un regalo masha presioso—su amor leal. Esei ke men ku e stima bo masha hopi i ku hamas i nunka lo e bandoná bo. Yehova tin amor leal pa tur su sirbidónan, kada un di nos ta presioso p’e, inkluso abo. (Mal. 3:17) Yehova ke pa bo sinti meskos ku Apòstel Pablo a sinti. E tabata asina sigur ku Yehova stim’é, ku el a skirbi: “Mi ta konvensí ku ni morto ni bida, ni angel ni gobièrnu, ni loke tin awor ni loke tin ku bini, ni podernan, ni haltura ni profundidat, ni ningun otro kreashon lo por separá nos for di e amor di Dios.” (Rom. 8:​38, 39) Den e artíkulo akí nos lo wak dikon ta asina importante pa ta konvensí ku Yehova stima nos, i kiko por yuda nos logra esei.

DIKON TA ASINA IMPORTANTE PA BO TA KONVENSÍ KU YEHOVA STIMA BO?

4. Kon bo por para firme kontra Satanas i su atakenan astuto?

⁴ Ora bo ta konvensí ku Yehova stima bo, bo por “para firme kontra e trampanan” astuto di Satanas. (Efe. 6:11) Satanas lo hasi tur loke ta den su poder pa stroba bo di sirbi Yehova. Un di e trampanan di mas astuto ku e ta usa ta pa laga bo kere ku Yehova no stima bo. Loke nos tin ku keda kòrda ta ku Satanas ta un oportunista i probechadó. Beibel ta kompará Satanas ku un leon. (1 Ped. 5:​8, 9) Generalmente leon gusta ataká bestia ku ta suak i ku no por defendé nan mes. P’esei mayoria di biaha Satanas ta ataká nos ora nos ta kansá, tristu òf kibrá pa kosnan doloroso ku nos a i ta pasa aden. Òf ora nos ta preokupá pa ki lo pasa den futuro. (Pro. 24:10) Satanas hopi biaha ta probechá pa ataká bo den momentonan asina pa laga bo baha man òf stòp di sirbi Yehova. Pero si bo sigui konvensé bo mes ku Yehova stima bo, bo por “para firme kontra” Satanas i su atakenan astuto.—Sant. 4:7.

5. Dikon ta importante pa bo ta konvensí ku Yehova stima bo?

⁵ Ora bo ta konvensí ku Yehova stima bo, lo bo hala mas serka dje. Dikon nos ta bisa esei? Pasobra Yehova a krea nos ku e nesesidat di stima i ser stimá. P’esei ta masha normal ku bo ta stima esnan ku stima bo. Pues mas konvensí bo ta ku Yehova stima bo, mas lo bo stim’é. (1 Huan 4:19) Anto mas bo stima Yehova, mas lo e stima bo tambe. Beibel ta mustr’é asin’akí: “Hala serka Dios, i lo e hala serka boso.” (Sant. 4:8) Pero kiko presis kada un di nos tin ku hasi pa ta kompletamente konvensí ku Yehova stima nos?

KI LO YUDA BO?

6. Kiko bo tin ku hasi si bo no ta konvensí ku Yehova stima bo?

⁶ Keda pidi Yehova yuda bo komprondé dikon e ta stima abo. (Lúk. 18:1; Rom. 12:12) Por pasa ku tin dia bo tin ku pidi Yehova vários biaha pa yuda bo mira loke e ta mira den bo. Tin biaha e lucha den bo kurason ta asina fuerte ku no ta fásil pa bo konvensé bo mes ku Yehova stima bo. Pero kòrda ku Yehova ta mas grandi ku bo kurason. (1 Huan 3:​19, 20) E ta mira e bon kualidatnan ku bo tin aunke bo mes no ta mira nan. (1 Sám. 16:7; 2 Kró. 6:30) P’esei, bis’é presis kon bo ta sinti bo i pidié yuda bo konvensé bo mes ku e stima bo. (Sal. 62:8) Despues ku bo kaba di deshogá bo mes na Yehova, ta importante pa bo hasi e siguiente kosnan.

7-8. Kon e Salmonan ta konvensé bo ku Yehova stima bo?

⁷ Konfia ku loke Yehova bisa ta bèrdat. El a usa su spiritu santu pa yuda eskritornan di Beibel splika ken realmente E ta. Den un Salmo, David a splika kuantu kariño Yehova tin pa hende. El a bisa: “Yehova ta serka di hende ku tin kurason kibrá; e ta salba hende ku ta desanimá.” (Sal. 34:18) Ora bo ta tristu, bo por sinti ku niun hende no ta komprondé loke bo ta pasando aden ni nan no por yuda bo. Pero Yehova a primintí ku ta nèt na e momentonan ei lo e t’ei pa yuda bo pasobra e ta mira ku bo mester di su yudansa. Den un otro Salmo, David a bisa: “Por fabor, pone mi lágrimanan den bo saku di awa di kueru.” (Sal. 56:8) Meskos ku kada gota di awa ta presioso pa un hende den desierto, asina tambe bo lágrimanan ta presioso pa Yehova i e sa tur e biahanan ku bo a yora. Na Salmo 139:​3, nos ta lesa: “[Yehova] bo sa tur loke mi ta hasi.” Ta bèrdat ku Yehova ta mira tur loke bo ta hasi, pero e ta skohe pa focus riba esnan bon. (Heb. 6:10) Dikon? Pasobra e sa kuantu esfuerso bo ta hasi pa por agrad’é i e ta balorá esei mashá.a

⁸ Yehova a laga skirbi tipo di tekstonan asina pa den un sentido bisa bo: “Mi ke pa bo sa kuantu mi stima bo i ta interesá den bo.” Pero manera nos a mira na paragraf 4, Satanas ke pa bo kere ku Yehova no stima bo. Si tin dia bo ta duda ku Yehova stima bo, para i puntra bo mes: ‘Ken lo mi kere, “e tata di mentira” òf e “Dios di bèrdat”?’—Huan 8:44; Sal. 31:5.

9. Ki Yehova ta primintí esnan ku stim’é? (Éksodo 20:​5, 6)

⁹ Pensa kon Yehova ta sinti tokante esnan ku stim’é. Wak por ehèmpel, loke Yehova a bisa Moises i e israelitanan. (Lesa Éksodo 20:​5, 6.) Yehova ta primintí ku lo e no stòp di mustra amor leal na esnan ku ta stim’é. Pues komo Yehova ta leal, bo por ta konvensí ku lo e no keda sin stima un persona ku stim’é. (Neh. 1:5) P’esei si tin biaha bo pensa ku Yehova no stima bo, para ketu i puntra bo mes: ‘Ami stima Yehova?’ Si ta asina i bo ta hasi bo bèst pa agrad’é bo por ta konvensí ku e tambe stima bo. (Dán. 9:4; 1 Kor. 8:3) Ku otro palabra, si bo ta konvensí ku abo stima Yehova, e ora ei bo no tin nodi di duda ku e stima abo. Bo por ta konvensí ku semper lo e stima bo i hamas lo e bandoná bo.

10-11. Kon Yehova ke pa abo mira e reskate? (Galationan 2:20)

¹⁰ Pensa riba e reskate. E regalo di mas presioso ku Yehova a duna humanidat ta ora el a manda su Yu, Hesukristu, muri pa nos. (Huan 3:16) Pero, bo tabata sa ku Yehova a duna e regalo ei ku abo na mente? Esei ta loke Apòstel Pablo a bin komprondé. Promé ku el a bira kristian, el a hasi basta kos malu i mester a sigui lucha ku su debilidatnan. (Rom. 7:​24, 25; 1 Tim. 1:​12-14) Pero el a bin kapta ku Yehova a duna e reskate ku é, Pablo, na mente. (Lesa Galationan 2:20.) Kòrda ku ta Yehova a inspirá Pablo pa skirbi e palabranan ei anto tur loke a ser skirbí den Beibel ta pa nos instrukshon. (Rom. 15:4) Loke Pablo a skirbi ta mustra ku Yehova ke pa bo mira e sakrifisio komo un regalo duná ku abo na mente. Ora bo kapta esei, lo bo bira mas konvensí ku Yehova stima abo.

¹¹ Nos ta gradisidu ku Yehova a manda Hesus na tera pa muri pa nos. Pero un motibu mas ku Hesus a bin na tera ta pa konta e bèrdat tokante Dios. (Huan 18:37) El a siña nos kuantu Yehova ta stima Su sirbidónan.

KON HESUS TA YUDA BO?

12. Dikon bo por kere tur loke Hesus a bisa tokante Yehova?

¹² Ora Hesus tabata riba tera, e tabata gusta yuda hende komprondé ken Yehova ta. (Lúk. 10:22) Nos por kere tur loke Hesus a bisa tokante Yehova pasobra el a pasa míles di miónes di aña ku Yehova promé ku el a bini riba tera. (Kol. 1:15) Hesus tabata sa kuantu Yehova stim’é i a mira tambe kuantu su Tata stima e angelnan fiel i Su sirbidónan fiel riba tera. Pero kon Hesus a yuda hende konvensé nan mes ku Yehova stima nan?

13. Kon Hesus ke pa bo mira Yehova?

¹³ Den e Evangelionan, Hesus a yama Yehova “Tata” mas ku 160 biaha. Anto ora e tabata papia ku su siguidónan e tabata usa ekspreshonnan manera “boso Tata” òf “boso Tata selestial.” (Mat. 5:16; 6:26) Promé ku Hesus a bin na tera, sirbidónan fiel di Yehova tabata yam’É por ehèmpel, ‘Todopoderoso,’ ‘Haltísimo’ i ‘Gran Kreador.’ Pero Hesus mayoria di biaha tabata yam’é nos “Tata.” E ekspreshon ei ta mustra ku Yehova ke pa su sirbidónan sinti nan pegá na dje, meskos ku un yu sintié pegá na su tata ku stim’é. Ta bisto anto ku Hesus ke yuda nos mira Yehova manera e ta mir’é. Ban wak awor dos di e biahanan ku Hesus a usa e palabra “Tata.”

14. Kon Hesus a mustra ku kada un di nos ta masha presioso pa nos Tata? (Mateo 10:​29-31) (Wak e plachi.)

¹⁴ Ban kuminsá ku loke Hesus a bisa na Mateo 10:​29-31. (Les’é.) Mòfi ta para chikitu i para nunka lo stima ni adorá Yehova. Asina mes, nos Tata sa presis unda kada un mòfi ta. Si Yehova ta asina atento na un mòfi, nos por tin sigur ku e tin mas atenshon na nos ku sí por ador’é i stim’é. Hesus a bisa tambe ku nos Tata sa presis kuantu drachi di kabei nos tin riba nos kabes. Si Yehova sa asta e detayenan chikitu ei tokante nos, nos por ta konvensí ku e stima kada un di nos. Ta bisto anto ku Hesus ke pa nos ta konvensí ku nos ta presioso den wowo di nos Tata selestial.

15. Kiko Hesus su palabranan na Huan 6:44 ta bisa bo di bo Tata den shelu?

¹⁵ Ban trata loke Hesus a bisa na Huan 6:44. (Les’é.) Bo Tata den shelu a yuda bo siña konos’é i stim’é. Dikon el a hasi esei? Pasobra el a mira ku bo tin bon kualidatnan. (Echo. 13:48) Ora Hesus a bisa e palabranan na Huan 6:​44, kisas e tabatin Yeremías 31:3 na mente. Ei Yehova a bisa su pueblo: “Mi a keda fiel na bo, i mi a hala bo serka mi [òf, “mi a sigui demostrá amor leal na bo,” nota].” (Kompará ku Oséas 11:4.) Kiko bo tin ku komprondé for di tur esei? Ku bo Tata den shelu semper ta mira bo bon kualidatnan asta si abo no ta mira nan.

16. (a) Kiko Hesus ke pa bo komprondé, i dikon bo tin ku ker’é? (b) Kiko por yuda bo ta konvensí ku Yehova ta e mihó Tata ku bo por tin? (Wak e kuadro “E Tata Ku Nos Tur Tin Mester.”)

¹⁶ Hesus ke yuda bo komprondé ku Yehova no ta djis su Tata so pero ku e ta bo Tata tambe. Anto e ke pa bo ta konvensí ku Yehova stima bo i ta interesá mashá den bo. Pues, si un dia bo lanta i bo ta sinti ku Yehova no stima bo, kòrda loke Hesus a bisa anto ker’é pasobra Hesus semper a papia e bèrdat i no tin niun persona ku konosé nos Tata mihó kuné.—1 Ped. 2:22.

SIGUI KONVENSÉ BO MES KU YEHOVA STIMA BO

17. Dikon nos mester hasi tur loke ta den nos poder pa sigui konvensé nos mes ku Yehova stima nos?

¹⁷ Nos tin ku hasi tur loke ta den nos poder pa sigui konvensé nos mes ku Yehova stima nos. Dikon? Pasobra manera nos a mira den e artíkulo akí, nos enemigu Satanas ta hasi tur loke e por pa stòp nos di sirbi Yehova. E ta usa tur loke e tin na su disposishon pa kibrá nos. Nos no tin ku duna Satanas chèns di gaña nos!—Yòb 27:5.

18. Ki bo tin ku hasi pa bo sigui ta konvensí ku Yehova stima bo?

¹⁸ Den e artíkulo akí, bo a siña e kosnan ku bo tin ku hasi pa bo sigui ta konvensí ku Yehova stima bo. Bo tin ku pidi Yehova den orashon yuda bo sa pakiko e stima bo. Bo tin ku meditá riba tekstonan di Beibel ku ta deskribí Yehova su kariño. Anto bo tin ku kòrda ku semper Yehova lo stima un hende ku stim’é. I bo no ke lubidá ku Yehova a duna e reskate ku abo na mente. Ademas, bo tin ku konfia loke Hesus a bisa ku Yehova ta bo Tata selestial. E ora ei bo kontesta pa e pregunta: “Bo tin sigur ku Yehova stima abo?” lo ta: “Konpolaga e stima mi! Anto mi ta hasi mi bèst tur dia pa mustr’é ku mi stim’é!”