Usa Bijbel den Sirbishi di Veld
1 E palabranan inspirá di Bijbel por tin un efecto poderoso riba hende. Pa e motibu ei e cristiannan di promé siglo a haci bon uso dje Scritura ora nan a proclamá e bon nobo. Pablo ‘a razoná for dje Scritura,’ i a splica i proba su puntonan dor di referí na textonan. (Echo. 17:2, 3) Ora Apólos tabata duna testimonio n’e hudiunan, el a “demostrá usando e Scritura cu Jesus ta e Cristo.”—Echo. 18:24-28.
2 Awe Testigonan di Jehova ta sigui e ehempel aki. Manera E Toren di Vigilancia (na spañó) di 1 di mart 1986 ta declará na página 26: “Ora nan ta participá den e ministerio público, nan kier pa hende realisá cu e mensahe cu nan ta proclamá no ta bini di nan, sino ta originá for di Dios su propio Palabra. P’esei den tur caso cu ta posibel nan ta haci esfuerso pa lesa direct for di Bijbel pa otro hende.” Abo ta haci pleno uso di Bijbel den bo ministerio?
3 Ministernan dje bon nobo mester sa con pa manehá e Palabra di Dios corectamente. (2 Tim. 2:15) Hopi publicadó ta parti revista so, nan no ta usa nan Bijbel pa desaroyá tópiconan di combersacion. Sea ta durante testimonio informal of ora nos ta participando den e trabou di cas pa cas i ta haci rebishita, nos tin cu custumbrá usa Bijbel.
4 E buki Razonamentu ta percurá informacion cu por ser adaptá na tur clase di hende i na vários situacion cu nos ta topa. Na reunionnan pa sali den sirbishi, e rumannan cu ta hiba delantera mester animá publicadó i pioneronan pa prepará i tene na mente introduccionnan cu ta permití nan usa Bijbel den un manera discreto i cu tacto. Sugerencianan den Nos Ministerio di Reino ta mustra con pa incluí textonan bíblico i referí na nan pa e mensahe cu ta ser presentá por tin e apoyo di un autoridad i pa duna prueba di loke ta corecto.—Echo. 17:2, 3.
DI CON EFICAS
5 Di con Bijbel ta asina eficas? Dor cu e ta e Palabra di Dios i “por dicerní pensamentunan i intencionnan di curason.” (Heb. 4:12) Ora exponé hende na berdad bíblico nan berdadero motivacion ta sali na cla. Hende di curason onrado ta ser atraé na dje. Por ehempel, a puntra un pareha hóben cu a haci progreso rápido den sirbi Jehova, di con nan a reaccioná asina lihé na e bon nobo. Nan contesta? “Tabata e Bijbel.” Ora e publicadónan cu a bishitá nan a dirigí nan atencion na Bijbel, nan a reconocé e stem di “e wardadó excelente.”—Juan 10:14; w78-S 15/10 [w78-E 1/6] pág. 22-3.
6 Bo sa sinti cu bo no por usa bo Bijbel dje bon ei den sirbishi di veld? Un bon programa di studio personal, i tambe prepará pa tur reunion di congregacion i asistí na nan, lo ekipá bo pa tur bon obra i duna bo mas confiansa. (2 Tim. 3:16, 17) Compañeronan di sirbishi i miembronan di famia por practicá un tema di combersacion cu otro. Tambe, mayoria dje introduccionnan na página 2-7 dje foyeto Con pa Cuminsá i Continuá Consideracionnan Bíblico [página 9-15 di buki Razonamentu] ta encerá lesa un texto for di den comienso dje combersacion. Di con no usa algun di esakinan? Usa loke ta práctico i cu ta capta e interes di hende den bo teritorio.
USA BON HUICIO
7 Tin biaha nos lo por invitá e doño di cas pa coge su propio Bijbel i busca un texto huntu cu nos. Usa bon huicio den circunstancianan asina. (Wak buki Razonamentu, [na spañó] página 70, §3 i página 397, §2 [na ingles, pág. 67, §3 i pág. 279, §2].) Ora nos mester ta breve, nos por dicidí di djis lesa un texto. Of si ta bisto cu e doño di cas ta ocupá, nos por djis cita un frase apropiado, i laga e doño di cas sa cu e ta sacá for di Bijbel. Jesus i su apostelnan no tabatin ehemplar personal dje Scritura Hebreo pa cana cuné ora nan a bai predicá. Sin embargo, nan a cita extensamente for di dje. Nos tambe mester haci un esfuerso pa siña textonan for di cabes di manera cu nos por tin nan na mente pa usa den nos ministerio.
8 Pablo a urgi Timoteo pa ‘manehá e palabra dje berdad corectamente.’ (2 Tim. 2:15) E mésun animacion ta aplicá na nos awe. Nos kier imitá Jesus i e apostelnan dor di usa nos Bijbel cu frecuencia den nos ministerio di veld. Lesa for di dje ki ora cu ta posibel, pero si ta necesario, cit’é for di cabes. Si nos haci esaki eficasmente, nos lo laga hende mira bon cla cu nos ta minister di Dios i cu nos mensahe ta fundá firmemente riba su Palabra.