Proclamando e Berdad Diariamente Imitando Jesus
1 Jesus tabatin un trabou specífico di cumpli cuné ora el a bini na tera. E trabou tabata remarcablemente simpel: ‘Pa duna testimonio di e berdad.’ (Juan 18:37) El a proclamá e berdad tocante e maraviyoso cualidadnan i propósitonan di su Tata. E trabou aki tabata manera cuminda p’e; henter su bida a drei rond di e trabou ei. (Juan 4:34) Lucas a informá cu Jesus a sigui “siñando diariamente den e tempel.” (Luc. 19:47) Jesus a haci pleno uso di e tempu cu tabata disponibel. (Juan 9:4) Djis promé cu su morto, e por a declará na su Tata: “Mi a glorificá bo riba tera, terminando e trabou cu bo a duná mi pa haci.”—Juan 17:4.
2 Ora nos curason ta yen cu aprecio pa tur loke Jehova a haci, nos di igual manera ta sinti un impulso iresistibel pa papia tocante dje riba un base diario. Nos ta bira mescos cu e disipelnan di Jesus kendenan cu curashi a declará: “Nos no por stop di papia tocante loke nos a mira i a tende.” (Echo. 4:20) Nan papiamentu tocante Jehova tabata continuo, pasobra e registro ta declará cu “tur dia . . . nan a sigui sin stop.” (Echo. 5:42) Nos mester puntra nos mes, ‘Mi ta un imitador di mi Maestro, Jesus?’
3 Predicando cu Urgencia: Jesus a pronosticá cu ora e mensahe di Reino a ser declará den tur e tera, “e ora ei e fin lo yega.” (Mat. 24:14) Esaki mester convencé nos dje importancia i urgencia di nos trabou. Cu e bida di literalmente miyones di hende den peliger, nos no por haña nada cu ta mas importante of mas probechoso pa haci. Ya cu e sistema di cosnan aki ta acercando su fin, e tempu cu a resta pa completá e trabou aki ta reducí!
4 Informenan ta mustra cu Jehova ta acelerando e trabou di recogementu di esnan semehante di carné. (Isa. 60:22) Den hopi parti dje tera, cantidad di hende literalmente ta basha bini na e berdad, en realidad declarando gososamente: “Nos lo bai cu boso, pasobra nos a tende cu Dios ta cu boso”! (Zac. 8:23) Mas cu cualkier tempu den pasado, Jesus su palabranan ta cierto: “E cosecha ta grandi, pero e trahadornan ta poco. . . . Roga na e Doño dje cosecha pa manda trahadornan den su cosecha.” (Mat. 9:37, 38) Esei no ta inspirá nos pa ta celoso mescos cu e disipelnan di Jesus kendenan “tabata continuamente den e tempel bendicionando Dios”?—Luc. 24:53.
5 Haci e Berdad Conocí Diariamente: Tur dia, nos mester ta buscando maneranan pa compartí e berdad cu otro hende. Tin oportunidadnan fácilmente disponibel. Lo bo por tuma un par di minuut pa yama na telefon un amigu of un conocí kende bo ta kere por ta receptivo? Of ki tal di skirbi un carta na un persona cu bo no por a haña na cas? Bo a pensa di ofrecé un tratado na e doño di tienda caminda bo ta haci bo cómpras? Probablemente, bo por pensa di hopi otro oportunidad cu bo tin tur dia pa compartí bo speransa cu otro hende. Si bo haci e esfuerso i demostrá un poco curashi, Jehova lo yudá bo.—1 Tes. 2:2.
6 Pues, segun cu nos ta cuminsá cu e actividadnan di cada dia, nos mester puntra nos mes, ‘Lo mi tuma e iniciativa pa compartí mi speransa cu un persona si un oportunidad presentá awe?’ Imitá e actitud di Jesus, kende a splica pakico el a ser mandá na tera: “Mi tin cu declará e bon nobo dje Reino di Dios.” (Luc. 4:43) Si nos kier ta manera nos Maestro, nos lo haci mescos.—Luc. 6:40.