Yuda Otro Hende Adkerí e Conocimentu cu Ta Hiba na Bida
1 Apostel Pablo a splica cu ta e ‘boluntad di Dios pa tur clase di hende yega na un conocimentu exacto dje berdad.’ (1 Tim. 2:4) Con nos por yuda otro hende gana e conocimentu aki? Un manera ta dor di rebishitá e personanan kende nan interes a ser lantá dor dje buki Conocimentu cu Ta Hiba na Bida Eterno. E publicacion aki ta presentá berdad bíblico den palabranan claro, simpel i bon scogé. Dor di studi’é, hende di tur clase por ser hibá na bida. Kico nos por bisa cu lo animá otro hende pa studi’é cu nos?
2 Pa esnan cu a mustra interes den e Bijbel como un guia práctico, lo bo por bolbe bek pa ofrecé un studio, kisas bisando:
◼ “Biaha pasá cu mi tabata aki, nos a considerá pakico nos por confia e Bijbel como un fuente práctico di guia. Siendo cu el a ser inspirá dor di Dios, e Bijbel ta tambe un fuente di consuelo i speransa, net manera un dje apostelnan di Jesus a declará. [Lesa Romanonan 15:4.] Na fin di nos último combersacion, mi a haci e pregunta, Con nos por beneficiá personalmente dje conocimentu cu Bijbel ta contené?” Lesa §18 na página 11 dje buki Conocimentu. Señalá cu Testigonan di Jehova ta conduciendo alrededor di cincu miyon studio di Bijbel rond mundu, yudando hende tur caminda pa gana e conocimentu cu ta hiba na bida eterno. Ofrecé pa demostrá brevemente con un studio ta ser conducí, usando e promé cincu paragrafnan di capítulo 1.
3 Si oracion tabata e tópico cu bo a considerá inicialmente cu un persona, tal bes bo por purba e introduccion aki den un esfuerso pa cuminsá un studio:
◼ “Mi ta spera cu bo a disfrutá dje informacion tocante oracion cu nos a considerá for dje buki Conocimentu cu Ta Hiba na Bida Eterno. Mi a primintí bo di bini bek i considerá cu bo con esnan cu ta resa na Dios por, na nan turno, scucha na dje. Tuma nota di loke ta ser bisá na página 158. [Lesa §18.] Pues, dor di studia e Bijbel personalmente, nos ta scuchando na loke Dios tin di bisa nos. Haciendo esei ta hala nos mas cerca di dje i ta yuda nos trata cu problemanan di tur dia tocante cua nos ta pidi den oracion. Gustosamente lo mi studia e Bijbel cu bo.” Si e persona ta dispuesto, cuminsá cu e promé capítulo di e buki Conocimentu.
4 Si bo a usa e método directo pa cuminsá un studio, lo bo por bisa esaki pa sigui cu e consideracion inicial:
◼ “Mi a haci un esfuerso special pa bishitá bo atrobe pasobra mi kier a contá bo mas tocante nos programa di studio di Bijbel grátis. Mi a laga cu bo un copia dje buki aki, Conocimentu cu Ta Hiba na Bida Eterno, cua ta e buki di studio cu nos ta usa. Tuma nota con e ta animá nos pa considerá e Palabra di Dios. [Lesa §23 na página 22.] Por fabor, si bo por coge bo copia dje buki, kisas nos por sigui studia caminda nos a keda último biaha.” Si bo no a cuminsá un studio na e bishita inicial, lo bo por bisa: “Kisas esaki lo ta un bon ocasion pa mi mustrá bo con nos ta studia e Bijbel.” Despues di considerá un par di paragraf, haci un areglo definitivo pa bolbe bek pa e siguiente studio.
5 Usando e buki Conocimentu eficasmente lo capacitá nos pa plama e conocimentu exacto pa e bendicion di otronan. (Pro. 15:7) Tal conocimentu lo trece goso pa esnan kende nan curason ta di disposicion corecto, i lo e ta un incentivo poderoso pa nan biba na armonia cu Jehova su husticia, hibando eventualmente na bida eterno.