Cumpliendo cu Nos Voto Dia Tras Dia
1 E salmista David a ser conmové pa declará na Jehova: “Lo mi alabá bo nomber cu melodia pa semper, pa mi por paga mi votonan dia tras dia.” (Sal. 61:8) David tabata sa cu e hacimentu di un voto ta un asuntu completamente boluntario. Sin embargo, tambe el a comprendé cu si e haci un voto, e tabata obligá di cumpli cuné. Asina mes, el a alabá Jehova pa e oportunidad di cumpli cu su votonan dia tras dia.
2 Ora nos a haci nos dedicacion na Jehova, nos boluntariamente a haci e voto di cumpli cu su boluntad. Nos a nenga nos mes i a haci sirbishi na Jehova nos actividad principal den bida. (Luc. 9:23) P’esei, nos tambe mester paga nos voto dia tras dia. (Ecl. 5:4-6) Nos declaracion público hací n’e ocasion di nos bautismo bou di awa mester ser reflehá den henter nos patronchi di bida, ya cu nos sa cu “cu e boca un hende ta haci declaracion público pa salbacion.” (Rom. 10:10) Esaki ta incluí predicá e bon nobo. (Heb. 13:15) Circunstancianan personal ta varia mashá, pero dia tras dia nos tur por presta atencion special n’e importancia di compartí e bon nobo cu otronan.
3 Traha Oportunidadnan pa Predicá Diariamente: Compartiendo e bon nobo cu un otro hende ta un experencia gososo. Afin di haci esaki diariamente, nos tin cu traha oportunidadnan pa predicá ki ora cu nos circunstancia ta permití. Esnan cu a tuma e iniciativa pa testificá informalmente na personanan na trabou of na scol i na bisiñanan of na otro hende cu nan ta topa tur dia, a disfrutá di hopi experencia felis. Asta skirbi carta of usa telefon por ta medionan pa testificá na otronan. Probechando di tur e medionan aki i tambe apartando tempu regularmente pa testificacion di cas pa cas i pa hacimentu di rebishita por hiba na e goso special cu ta bini di conducí un studio di Bijbel na cas. Sí, ta posibel pa tur dia nos crea oportunidadnan pa predicá.
4 Un ruman muher a cuminsá lesa Examinando e Scritura Diariamente durante su pausa na trabou. El a invitá un colega di trabou pa lesa e texto di dia huntu cuné, i pronto esei a hiba na un studio di Bijbel cu e señora. Nan tabata studia mei ora tur dia, cincu dia pa siman. Un otro colega a observá nan studio diario. Cu tempu el a identificá su mes como un ruman homber inactivo. Conmoví pa e celo dje ruman muher, el a tuma contacto cu un anciano afin di ser reactivá. E ruman muher aki a toca dos bida den un manera positivo debí di a perseverá den cumpli cu su voto dia tras dia.
5 Ora nos ta ser motivá dor di un curason cu ta abundá cu aprecio pa tur e cosnan bon cu Jehova a haci pa nos, nos lo haña goso i satisfaccion si nos cumpli tur dia cu nos voto di dedicacion lo mihó cu nos por. Manera e salmista, nos por declará: “Mi ta alabá bo, O Jehova mi Dios, cu tur mi curason, i lo mi glorificá bo nomber te na tempu indefiní.”—Sal. 86:12.