E Palabra di Dios Ta Percurá Guia
1 “Nos ta biba den un mundu cu tin demasiado problema i masha poco solucion. Miles di miyones di hende ta víctima constante di hamber. Un cantidad aumentante ta adicto na droga. Cada bes mas famia ta kibra. Incesto i violencia den famia ta mencioná constantemente den noticia. E aire cu nos ta respirá i e awa cu nos ta bebe ta ser venená poco-poco. Miéntras tantu, cada bes mas hende ta bira víctima di crímen.”
2 Asina e buki E Bijbel—e Palabra di Dios of e palabra di hende? ta cuminsá. Su introduccion ta asta mas relevante awe cu tempu e buki a sali na ingles shete aña pasá. Hende tin cu sa cu e Palabra di Dios ta duna guia i ta percurá solucion pa tur e problemanan cu ta plaga nan. Nos lo haci esfuerso pa yuda hende den december dor di ofrecé nan e Traducción del Nuevo Mundo i e buki E Bijbel—e Palabra di Dios of e palabra di hende? Naturalmente, djis lagando literatura cu un persona no ta garantia cu lo e aceptá e guia di Dios. Nos mester haci rebishitanan cu e meta di cuminsá un studio di Bijbel. Nos por tin sigur di ricibí yudansa si nos haci tal esfuerso. (Mat. 28:19, 20) Ata aki algun presentacion cu ta ser sugerí:
3 Si bo topa un persona di mas edad, kisas bo por purba e introduccion aki:
◼ “Permití mi puntrá bo: Tempu bo tabata mas hóben, con hende den e comunidad a trata otro? [Permití contesta.] Cosnan ta hopi otro awor, no ta asina? Kico bo ta pensa ta e motibu pa e cambio? [Permití contesta.] En realidad nos ta mirando e cumplimentu di un profecia skirbí den Bijbel. [Lesa 2 Timoteo 3:1-5.] Ademas di describí cu exactitud e manera cu e mundu djawe ta, Bijbel ta primintí un mihó mundu den futuro cercano. P’e motibu ei nos ta animando tur hende pa lesa e Bijbel. Bo a ripará con cla e idioma ta den e Bijbel aki, e Traducción del Nuevo Mundo, for di cua mi a lesa?” Splica cu e ta skirbí na idioma moderno, haciendo e Bijbel mas comprendibel. Mustra e buki E Bijbel—e Palabra di Dios of e palabra di hende? i resaltá capítulo 10, cua ta splica un otro profecia cu nos a mira ser cumplí. Ofrecé e Bijbel i e buki. Si e persona aceptá e oferta, mencioná e contribucion.
4 Ora bo rebishitá un persona di mas edad cu ken bo a laga e Bijbel i e buki, lo bo por bisa:
◼ “Ultimo biaha cu nos a papia, nos tabata di acuerdo cu den hopi aspecto e sociedad moderno a cambia pa mas pió compará cu e manera cu bida tabata djis un par di aña pasá. Sin embargo, mi a bini bek pa mustrá bo cu Bijbel ta describí prospectonan pa un mundu hopi mas mihó den futuro. [Lesa Revelacion 21:3, 4.] Sabiendo cu esaki ta e Palabra di Dios mester animá nos pa investigá kico mas e Bijbel tin di bisa.” Habri e buki E Palabra di Dios na capítulo 14 i lesa §3-4. Ofrecé un studio di Bijbel grátis na cas.
5 Si bo haña un persona mas hóben pa combersá cuné, lo bo por bisa:
◼ “Mi tin gana di hací bo un pregunta: Como un persona hóben, bo ta sinti cu bo tin motibu pa ta optimista tocante e futuro? Con abo ta mira bo futuro? [Permití contesta.] Afortunadamente, tin motibu real pa ta optimista tocante e futuro. [Lesa Salmo 37:10, 11.] Ya cu hende tin puntonan di bisto variá tocante Bijbel i su contenido, nos a publicá e buki aki, E Bijbel—e Palabra di Dios of e palabra di hende? Tuma nota dje motibunan cu e ta duna pa lesa Bijbel. [Lesa §16-17 na página 10-11.] Una bes nos ta convencí cu loke Bijbel ta bisa ta berdad, nos tin un speransa sigur pa futuro. Si bo ta deseá na lesa e buki aki, gustosamente lo mi laga un copia cu bo.”
6 Ora bo bolbe bek pa bishitá un persona mas hóben cu a aceptá e buki “E Palabra di Dios,” kisas bo por cuminsá dor di bisa:
◼ “Mi a apreciá di tende cuantu bo ta interesá den e futuro. Bo ta corda mi a mustrá bo un texto di Bijbel cu ta primintí nos un futuro felis i sigur. Ata aki un texto mas. [Lesa Revelacion 21:3, 4.] E buki cu mi a laga cu bo ta duna prueba convincente cu e Bijbel ta e Palabra di Dios, no di hende. E echo ei tin algun implicacion profundo. Tuma nota cua nan ta. [Lesa §1-2 na página 184-5.] Si bo kier, gustosamente lo mi studia e Bijbel cu bo grátis.” Si e persona aceptá un studio, puntr’é si e tin un Bijbel. Si e no tin, ofrecé e Traducción del Nuevo Mundo pa un contribucion.
7 Un persona cu no sa unda pa bai pa haña guia den trata e problemanan di bida cu éxito kisas por reaccioná faborabel n’e introduccion aki:
◼ “Nos ta biba den un tempu ora cu casi tur hende ta confrontá problemanan serio. Hopi hende ta bai cerca tur clase di consehero pa guia. Algun ta acudí na medium spiritista pa yudansa. Unda bo ta kere nos por haña conseho sano cu realmente lo beneficiá nos? [Permití contesta.] Bijbel ta declará un echo importante cu nos tur tin cu comprendé.” Lesa Jeremías 10:23. Habri e buki E Bijbel—e Palabra di Dios of e palabra di hende? na página 187 i lesa §9. “E buki aki lo yudá bo comprendé con, bou dje Reino di Dios, tur nos problemanan lo ser eliminá. Lo bo tin gana di les’é?” Si e persona aceptá, splica cu e ta pa un contribucion.
8 Si na e bishita inicial bo a papia tocante con hende mester di guia, lo bo por sigui e consideracion ora di haci e rebishita dor di bisa:
◼ “E promé biaha cu nos a topa, nos tabata di acuerdo cu nos mester di guia for di Dios pa nos por enfrentá e problemanan di bida cu éxito. Relacioná cu esei, mi ta kere lo bo apreciá e comentarionan di conclusion mencioná den e buki cu mi a laga cu bo. [Lesa §12-13 na página 189 den e buki E Palabra di Dios.] Ta un placer pa mi ofrecé bo un curso di studio di Bijbel grátis i mi ta cla pa mustrá bo esei awor aki mes.”
9 Jehova lo bendicioná nos esfuersonan segun cu nos ta yuda tantu hende grandi como hóben apreciá e balor dje Palabra di Dios i su guia den nos bida.—Sal. 119:105.