Cualificá i Ekipá pa Siña Otronan
1 Ora Moises a ser nombrá como representante di Jehova, e no a sinti su mes cualificá pa declará e palabra di Dios na Fárao. (Ex. 4:10; 6:12) Jeremías a revelá su falta di confiansa di por sirbi como profeta di Jehova, bisando Dios cu e no tabata sa con pa papia. (Jer. 1:6) Apesar di nan falta di confiansa na cuminsamentu, tur e dos profetanan ei a resultá di ta testigonan sin miedu pa Jehova. Nan a ser cualificá adecuadamente dor di Dios.
2 Awe, danki na Jehova, nos tin loke nos mester pa cumpli cu nos ministerio cu confiansa. (2 Cor. 3:4, 5; 2 Tim. 3:17) Mescos cu un mecánico cualificá cu un set completo di herment, nos ta hopi bon ekipá pa cumpli ábilmente cu nos ministerio asigná. Durante januari nos ta ofrecé cualkier buki di 192 página cu a ser publicá promé cu 1984 i cu e congregacion por tin na stock. Aunke e hermentnan spiritual aki no ta nobo, nan temanan bíblico ainda ta actual i e bukinan aki lo yuda hende siña e berdad. E siguiente presentacionnan cu ta ser sugerí por ser adaptá na sea cual sea e buki cu ta ser ofrecé.
3 Por usa e tópico di educacion pa crea interes den e Palabra di Dios. Lo bo por iniciá un combersacion dor di bisa:
◼ “Awe tin hopi énfasis riba e necesidad di educacion di calidad. Segun bo opinion, ki sorto di educacion un persona mester sigui pa sigurá e mayor felicidad i éxito den bida? [Permití contesta.] Esnan cu adkerí conocimentu di Dios por haña beneficionan eterno. [Lesa Proverbionan 9:10, 11.] E buki di instruccion aki [mencioná e título dje buki cu bo ta ofreciendo] ta basá riba Bijbel. E ta indicá cua ta e único fuente di conocimentu cu por hiba na bida eterno.” Mustra un ehempel specífico den e buki. Si tin berdadero interes, laga e buki i haci areglo pa un rebishita. Bisa cu nos ta laga e publicacion pa un contribucion chikitu.
4 Ora di bolbe bek cerca un doño di cas cu ken bo a papia tocante e importancia di educacion basá riba Bijbel, lo bo por bisa:
◼ “Na mi último bishita, nos a papia tocante e Bijbel como e fuente di educacion cu por sigurá nos futuro eterno. Naturalmente, ta rekerí esfuerso pa siña loke nos tin cu sa dje Scritura. [Lesa Proverbionan 2:1-5.] Hopi hende ta haña cu ta difícil pa comprendé algun parti dje Bijbel. Lo mi kier demostrá brevemente un método cu nos a usa extensivamente pa yuda hende siña mas tocante siñansanan básico di Bijbel.” Usando e buki cu bo a laga, bai na un parti apropiado i demostrá brevemente con un studio di Bijbel ta bai. Si e doño di cas ta deseá di tin un studio regular, splica cu lo bo bolbe cu nos yudansa pa studia Bijbel cu ta Conocimentu cu Ta Hiba na Bida Eterno.
5 Hopi hende ta keda perturbá p’e sufrimentu di miyones di mucha den mundu. Kisas bo por yuda e doño di cas mira con Dios ta mira e situacion penoso aki, dor di bisa:
◼ “Sin duda bo a mira reportahenan di noticia tocante muchanan rond parti mundu cu ta hambrá, malu i neglishá. Pakico organisacionnan concerní no por a mehorá e situacion? [Permití contesta.] Dios kier solamente loke ta mihó pa hende. Tuma nota di loke e ta primintí pa mucha i adulto, manera ta skirbí den Bijbel. [Lesa Revelacion 21:4.] E buki aki [mencioná e título] ta duna mas detaye tocante un mundu formá segun e boluntad di Dios caminda lo no tin sufrimentu mas.” Si ta posibel, habri e buki na un plachi cu ta mustra e Paradijs, i papia over di dje. Ofrecé e buki i haci areglo pa un otro bishita. Aceptá gustosamente e contribucion p’e buki.
6 Si inicialmente bo a papia tocante e sufrimentu di mucha, n’e siguiente bishita lo bo por sigui cu e consideracion dor di bisa:
◼ “Ultimo biaha cu mi tabata aki, bo a expresá preocupacion p’e situacion penoso di mucha cu ta sufri debí na famianan kibrá, hamber, malesa i violencia. Ta consolador pa lesa den Bijbel tocante un mundu caminda ni mucha ni adulto lo sufri di malesa, dolor of morto. Un profecia den e buki di Isaías ta describí un mihó bida cu lo bini riba tera.” Lesa i considerá Isaías 65:20-25. Hiba e combersacion den direccion di cuminsá un studio di Bijbel den e buki Conocimentu.
7 Siendo cu hacimentu di oracion ta comun pa hende religioso, lo bo por cuminsá un combersacion riba e tópico aki dor di bisa:
◼ “Na dado momento den nos bida, mayoria di nos a experenciá problemanan cu a impulsá nos pa haci oracion na Dios pa yudansa. I tog, hopi hende ta sinti cu nan oracionnan no ta ser contestá. Ta asta parce cu lidernan religioso cu ta resa públicamente pa pas no ta ser tendí. Nos ta bisa esei pasobra guera i violencia ta sigui afligí humanidad. Dios realmente ta scucha oracion? Si e ta hacié, pakico ta parce cu asina tantu oracion ta keda sin ser contestá? [Permití contesta.] Salmo 145:18 ta splica kico ta ser rekerí pa nos oracionnan ser contestá. [Lesa e texto.] Pa cuminsá, oracionnan na Dios mester ta sincero i na armonia cu e berdad hañá den su Palabra, Bijbel.” Mustra e buki cu bo ta ofreciendo i señalá loke e ta bisa tocante e balor di oracion.
8 Ora di sigui riba un consideracion anterior tocante oracion, lo bo por purba e introduccion aki:
◼ “Mi a disfrutá di nos combersacion riba e tópico di oracion. Sin duda lo bo haña loke Jesus a bisa tocante kico pa pidi p’e den oracion di ta un guia útil.” Lesa Mateo 6:9, 10, señalando e puntonan di interes principal cu a bini dilanti den Jesus su oracion modelo. Mustra capítulo 16, “Con Bo Por Hala Cerca di Dios,” den e buki Conocimentu i puntra si bo por demostrá con pa studia e material.
9 Ora ta trata di compartí conocimentu di Dios cu otronan, nos tal bes ta puntra, “Ken ta adecuadamente cualificá pa e cosnan aki?” E Scritura ta contestá: “Nos.”—2 Cor. 2:16, 17.