Caha Di Pregunta

◼ Pakico nos mester raportá nos actividad di sirbishi di veld unbes tur fin di luna?

Nos tur ta sinti un goso ora nos tende tocante cos bon cu ta ser lográ den predicacion dje mensahe di Reino. (Mira Proverbionan 25:25.) Echonan 2:41 ta informá cu despues di Pedro su discurso emocionante riba e dia di Pentecoste, “rond di tres mil alma a ser agregá.” Un poco tempu despues, e cantidad ei a crece te na “rond di cincu mil.” (Echo. 4:4) Sigur cu e informenan ei a lanta e ánimo dje cristiannan di promé siglo! Nos ta reaccioná mescos na informenan animador djawe. Nos ta keda emocioná pa tende dje éxito cu nos rumannan ta disfrutá di dje predicando e bon nobo na tur parti mundu.

Ya cu hopi tempu i esfuerso ta bai den compilá tal informe, e cooperacion di cada publicador di Reino ta esencial. Abo ta conciencial en cuanto entregá bo raport unbes tur fin di luna?

Informenan di aumento ta duna nos hopi goso. Ademas, raportnan ta yuda Sociedad controlá e progreso dje trabou mundial. Mester tuma decisionnan en cuanto unda tal bes tin mester di mas yudansa of e tipo i cantidad di literatura cu tin cu ser producí. Ancianonan den cada congregacion ta usa raportnan di sirbishi di veld pa determiná den kico por mehorá. Bon informenan ta edificante, motivando nos tur pa examiná nos propio ministerio pa posibel mehoracion.

Tur publicador tin cu reconocé nan responsabilidad individual pa entregá un raport di sirbishi di veld unbes tur fin di luna. Conductornan di Studio di Buki di Congregacion ta den bon posicion pa recordá e publicadornan dje responsabilidad aki, ya cu nan ta alerto tambe pa duna yudansa personal na esnan cu tal bes tin algun dificultad pa participá den sirbishi di veld cu regularidad tur luna. E recordatorio aki por ser duná n’e último studio di buki tur luna of na un otro ocasion apropiado. Si no tin oportunidad pa entregá raportnan di sirbishi di veld na Salon di Reino, e conductor di Studio di Buki di Congregacion por colectá nan i soru pa nan ser duná n’e secretario na tempu pa ser incluí den e raport mensual regular dje congregacion cu ta bai Sociedad.

Nos diligencia den raportá fielmente nos actividad di sirbishi di veld unbes fin di luna ta haci e carga mas leve pa esnan responsabel pa nos bienestar spiritual.