“Mustra cu Boso Ta Gradicidu”
1 Mayoria di nos a siña desde infancia pa bisa “por fabor” i “danki” ora un persona a mustra di ta cortes of amabel cu nos. Pablo ta amonestá nos pa semper ‘mustra cu nos ta gradicidu,’ i nos mester ta specialmente gradicidu na Jehova. (Col. 3:15, 16) Pero con nos por expresá gratitud na nos Magnífico Creador? I ki motibunan special nos tin pa ta gradicidu na dje?
2 Apostel Pablo a skirbi: “Danki na Dios, pasobra e ta duna nos e victoria mediante nos Señor Jesucristo!” (1 Cor. 15:57) Tur aña na ocasion di Memorial, nos ta ser recordá dje amor sin límite cu tantu Dios como Cristo a mustra den percurá e rescate cu ta duna nos e speransa di bida eterno. (Juan 3:16) Ya cu casi nos tur a perde sernan kerí den morto, ki gradicidu nos ta pa Jesus su promesa dje resureccion! Nos curason ta basha over cu gratitud ora nos contemplá e prospecto di sobrebibí e fin dje sistema aki sin muri hamas. (Juan 11:25, 26) Ta difícil pa haña palabranan pa expresá gradicimentu pa tur e bendicionnan maraviyoso cu nos lo experenciá ainda na man di Jehova den e binidero Paradijs terenal. (Rev. 21:4) Ki mihó motibunan cualkier persona lo por tin pa ‘mustra cu e ta gradicidu’ na Dios?
3 Con pa Expresá Gratitud na Dios: Semper ta apropiado pa expresá den oracion na Jehova nos gratitud pa su bondad. (Sal. 136:1-3) Nos ta ser conmové, tambe, pa demostrá nos gratitud na dje den otro maneranan positivo. Por ehempel, siguramente nos lo ta presente riba diadomingo, 23 di mart, pa e Memorial di Cristo su morto. Pa yuda cubri e necesidadnan material dje congregacion local i dje obra mundial, gustosamente nos ta ‘onra Jehova cu nos cosnan balioso.’ (Pro. 3:9) Nos ta apoyá e ancianonan plenamente i ta cooperá cu nan, mustrando asina nos gratitud na Jehova pa e yudansa cu e ta percurá mediante nan. (1 Tes. 5:12, 13) Tur dia, nos ta haci esfuerso pa mantené conducta recto cu ta glorificá Dios su nomber. (1 Ped. 2:12) Jehova ta keda contentu cu tur e evidencianan aki di nos gratitud.—1 Tes. 5:18.
4 Nos Mihó Expresion di Gratitud: Teniendo un participacion di henter alma den e trabou di predicacion di Reino, onrando e nomber di Jehova, expresando gratitud den oracion, i defendiendo e berdad lealmente ta entre e mihó expresionnan di gratitud sincero cu nos por haci na nos Creador pa tur loke el a haci na nos fabor. Jehova ta gusta mira nos rindié actonan di sirbishi sagrado den apoyo di su boluntad “pa tur clase di hende ser salbá.” (1 Tim. 2:3, 4) Ta p’esei asina tantu publicador cu por haci areglo p’e ta respondiendo n’e yamada cu a sali den Nos Ministerio di Reino di februari pa inscribí como pioneronan auxiliar durante un of mas dje lunanan di mart, april i mei. Haciendo extra esfuerso den e ministerio ta un manera excelente pa nos ‘mustra cu nos ta gradicidu’ na Dios. Lo bo por djoin e fila dje pioneronan na april? na mei?
5 Nos a ser duná un speransa sigur di biba pa semper. Ora nos mir’é cumpli, nos lo tin mas motibunan abundante tur dia pa sigui duna danki gososo na Jehova.—Sal. 79:13.