“Sea Gradisidu”
1 Ora Hesus a kura e dies leprosonan, ta un di nan so a bolbe pa ekspresá gratitut. Hesus a puntra: “No ta dies a wòrdu hasí limpi? Awor e nuebenan, unda nan ta?” (Luk. 17:11-19) Ta masha importante pa nos ta apresiativo i mustra gratitut pa tur bon regalo i tur don perfekto ku nos generoso i amoroso Tata selestial, Yehova Dios, a duna nos!—Kol. 3:15; Sant. 1:17.
2 Kua ta algun kos ku nos mester ta gradisidu p’e? Nos ta gradisidu pa e reskate, e regalo di mas grandi ku Dios a duna hende. (Juan 3:16) Tambe nos ta gradisidu na Yehova ku el a hala nos serka dje. (Juan 6:44) Un otro motibu ku nos tin pa ta gradisidu ta e unidat kristian ku nos ta disfrutá di dje. (Sal. 133:1-3) Sin duda, bo por pensa riba hopi otro regalo ku nos a haña for di Yehova. Nunka nos lo no ke bira malagradisí manera e israelitanan ku a lubidá e obranan ku Yehova a hasi pa nan!—Sal. 106:12, 13.
3 Demostrá Gratitut: Maske tur dies leproso probablemente a apresiá loke Hesus a hasi pa nan, ta un di nan so a demostrá su gratitut. (Luk. 17:15) Asina tambe, nos por demostrá apresio ora nos ta partisipá ku entusiasmo den sirbishi. Si di bèrdat nos ta gradisidu pa tur loke nos Tata selestial a hasi pa nos, nos kurason lo motivá nos pa reflehá su amor i generosidat dor di papia ku otro hende di dje. (Luk. 6:45) Na su turno, segun ku nos ta konta otro hende tokante Yehova su ‘maravianan i su pensamentunan pa ku nos,’ nos amor i apresio pa Yehova lo krese.—Sal. 40:5.
4 Motivá Otronan pa Mustra Apresio: Nos mester buska oportunidat pa yuda nos yunan i studiantenan di Beibel pa kultivá apresio. Mayornan tin hopi oportunidat pa hasi esei, por ehèmpel ora nan ta disfrutando di Yehova su kreashon ku nan yunan. (Rom. 1:20) Ora nos ta dirigí un estudio di Beibel, nos por puntra nos studiante, “Kiko esaki ta siña bo tokante e klase di persona ku Yehova ta?” Mas apresio e studiante haña, mas su amor pa Dios lo krese i mas determiná lo e ta pa agrad’é.
5 Durante e último dianan aki, hopi hende ta sin apresio i gratitut. (2 Tim. 3:1, 2) Esta kontentu Yehova ta sintié ora e mira su sirbidónan deboto demostrá gratitut dor di partisipá ku entusiasmo den sirbishi!—Sant. 1:22-25.