Conduciendo Studionan di Bijbel Progresivo
1 Kico un verpleegster na Tanzania, un hobencita na Argentina i un mama na Latvia tin en comun? E Anuario 1997 (pág. 8, 46 i 56), ta informá cu tur tres a haci progreso rápido den nan studio di Bijbel na cas, debí cu nan tabata dispuesto pa studia mas cu un biaha pa siman for dje buki Conocimentu. A ser recomendá cu ki ora cu ta posibel, publicadornan mester trata na considerá un capítulo dje buki durante cada sesion di studio. Sin embargo, algun ruman ta haña cu ta difícil pa haci esei. Aunke hopi lo dependé dje circunstancianan i aptitud di cada studiante, maestronan experenciá tabatin éxito dor di implementá e siguiente sugerencianan.
2 Manera a ser considerá den e suplemento di Nos Ministerio di Reino di juni 1996, ta necesario pa entrená bo studiantenan pa prepará p’e studio. For di cuminsamentu mes, lo ta bon pa splica i demostrá con ta haci esaki. Mustra nan bo copia personal di studio dje buki Conocimentu. Prepará e promé les huntu. Yuda e studiantenan haña e palabranan of frasenan clave cu ta contestá e pregunta imprimí directamente i despues hala liña bou di nan of marca nan cu ‘highlighter.’ Algun publicador asta a duna nan studiantenan un highlighter pa usa. Animá nan pa busca tur e textonan bíblico ora nan ta prepará pa e studio. Dor di haci esaki, lo bo ta entrenando nan tambe pa prepará pa asistí n’e Studio di Buki di Congregacion i n’e Studio di Toren di Vigilancia.—Luc. 6:40.
3 Un bon maestro lo pone e studiante expresá su mes libremente i no ta papia muchu e mes. E ta evitá di desviá riba puntonan menor. Rara bes lo e trece extra informacion. En bes di esei, e ta enfatisá e puntonan principal dje les. Algun a duna nan studiantenan literatura adicional pa yuda nan haña contesta pa preguntanan. Ademas, esnan interesá lo ricibí informacion adicional i detayá dor di asistí n’e reunionnan di congregacion.
4 Tal bes no ta necesario pa lesa huntu tur e textonan bíblico cu e les ta mencioná. Lo por splica algun punto principal for dje textonan citá den e paragraf. Durante e repaso, enfatisá e textonan clave cu a ser considerá i animá e studiante pa corda esakinan.
5 Con Largu Cada Sesion Mester Dura?: E studio no mester ta limitá na un ora. Algun doño di cas tin tempu disponibel i tal bes ta deseá di studia mas largu. Of e studiante tal bes ta deseá di studia mas cu un biaha pa siman. Esaki lo ta probechoso pa esnan cu por haci esei.
6 Manera Isaías 60:8 ta describié, awe cientos di miles di alabadornan nobo di Jehova ta “bini bulando net manera un nubia, i manera palomba n’e buracunan di nan couchi” den e congregacionnan di su pueblo. Laga nos tur haci nos parti den traha estrechamente cu Jehova segun cu e ta acelerá e recogementu di esnan mansu manera carné.—Isa. 60:22.