Duna Noticia di Reino Num. 35 Distribucion Amplio
1 October cu november lo ta lunanan druk pa nos tur. Durante e promé 11 dianan di october, nos lo ofrecé abonament riba E Toren di Vigilancia i Spierta! Anto, for di diadomingo, 12 di october, te cu diadomingo, 16 di november, nos lo uni cu e distribucion mundial di Noticia di Reino Num. 35. Nos lo tin e privilegio di hiba un mensahe importante na tur hende den nos teritorio. E mensahe ta e contesta n’e pregunta: “Tur Hende Lo Stima Otro un Dia?” Durante e campaña special aki, nos lo distribuí Noticia di Reino Num. 35 den siman. Den fin di siman, ademas di presentá Noticia di Reino, nos lo ofrecé edicionnan coriente dje revistanan i abonament riba nan.
2 Ken Por Participá? Manera ta custumber, e ancianonan lo hiba delantera den e trabou. Tur ruman ta gusta distribuí Noticia di Reino, i sin duda un gran cantidad di publicadó lo inscribí como pionero auxiliar durante un of tur dos luna dje campaña. Otro publicadónan lo kier dedicá mas tempu cu normal den e ministerio.
3 Bo tin un studiante di Bijbel cu ta hopi avansá den su studio dje buki Conocimentu i cu pronto lo cualificá pa participá den sirbishi di veld? Kisas lo e por bira un publicadó no-bautisá na tempu p’e participá den e campaña di Noticia di Reino. Tur loke mester pa presentá e tratado ta un presentacion simpel. Por ehempel, bo por bisa: “E mensahe aki ta asina importante cu e luna aki e ta ser distribuí mundialmente den 169 idioma. Mi ta deseá pa bo tin bo ehemplar personal.” Asta muchanan chikitu por tin un participacion significativo den e trabou excitante aki.
4 Conductornan di studio di buki mester animá tur miembro di nan grupo pa tene un pleno participacion den e distribucion di Noticia di Reino Num. 35. Tal bes tin tambe publicadónan cu a bira inactivo, pero cu lo bira activo atrobe den sirbishi si nan ricibí e animacion necesario. Promé cu e campaña, e ancianonan mester bishitá cada un dje publicadónan inactivo aki pa mira kico por haci pa yuda nan compañá publicadónan experenciá den e rasgo aki dje ministerio.
5 Ki Ora Nos Por Reuní pa Sirbishi? Tur e actividad aki lo rekerí areglonan cu ta tantu cumbiniente como práctico pa testificá den grupo. Caminda ta posibel, mester organisá reunionnan pa sirbishi pa cada dia di siman, den fin di siman i parti anochi. Mester tene nan na oranan cu lo permití e publicadónan i pioneronan saca pleno probecho dje periodo di testificá. Por haci areglo tambe pa reuní atardi lat pa beneficiá publicadónan cu ta bai scol, esnan cu ta traha warda i otronan. E superintendente di sirbishi mester haci sigur cu tin hopi teritorio disponibel pa traha di cas pa cas of di negoshi pa negoshi, di manera cu tur hende por participá plenamente den e trabou. Caminda tin hopi publicadó den un área, nan mester ta discreto en cuanto e cantidad di nan cu ta traha den cierto seccion dje teritorio.
6 Kico di No-na-Casnan? Nos kier papia personalmente cu mas tantu doño di cas posibel pa splica nan pakico nan mester lesa Noticia di Reino Num. 35. P’esei si no tin niun hende na cas ora bo pasa, skirbi e adres i bolbe pasa un otro ora di dia. Si pa e último siman dje campaña bo esfuersonan pa haña contacto cu e doñonan di cas aki ainda no tabatin éxito, bo por laga un ehemplar di Noticia di Reino n’e porta den un lugá cu no ta visibel pa hende cu ta pasa ei banda. Den áreanan residencial, sea alerto pa ofrecé Noticia di Reino na personanan cu ta pasando na pia. Ora di traha teritorionan di cunucu i caminda tin mas teritorio cu por ser cubrí durante e campaña, por laga un ehemplar di Noticia di Reino na e no-na-casnan n’e promé bishita.
7 Kico Ta Nos Meta? Congregacionnan mester haci esfuerso pa usa henter nan suministro di Noticia di Reino pa cubri henter nan teritorio promé cu e campaña terminá dia 16 di november. Si e teritorio asigná na bo congregacion ta bastante grandi i no ta peligroso pa bo traha bo so en bes di cu un compañero, kisas lo ta práctico pa haci esei. Esaki lo permití bo alcansá mas tantu hende merecedor posibel cu e bon nobo. (Mat. 10:11) Lo por ta bentahoso pa hiba un par di tratado den bo man i un Bijbel den bo sacu of tas chikitu, en bes di usa maletin. Haci sigur di tene un bon registro di hendenan cu a mustra interes.
8 Bo Ta Cla pa Cuminsá? E ancianonan mester anticipá cuantu revista extra e congregacion lo tin mester i mester haci pedido di acuerdo cu esei. No ta necesario pa haci pedido di Noticia di Reino Num. 35, ya cu lo manda un cargamentu pa cada congregacion. Pioneronan special, regular i auxiliar lo haña 140 tratado cada un pa distribuí, miéntras cu lo tin 35 tratado disponibel pa cada publicadó di congregacion. Nos trabou ta prepará pa nos. Bo ta ansioso pa participá den e actividad deleitabel aki? Sin duda cu sí. Laga nos duna e mensahe bíblico importante den Noticia di Reino Num. 35 e distribucion mas amplio posibel!