Caha Di Pregunta

◼ Pakico nos mester duna atencion special na nos paña i areglo personal ora di bishitá e facilidadnan di Sociedad na Brooklyn, Patterson i Wallkill, New York, i oficinanan di sucursal rond mundu?

Ta ser verwagt di cristiannan cu nan ta areglá nan mes apropiadamente. Na tur ocasion nos paña i areglo personal mester reflehá e decencia i dignidad cu ta pas pa sirbidónan di Jehova Dios. Esaki ta specialmente cierto ora di bishitá e facilidadnan di Sociedad na New York i na sucursalnan rond mundu.

Durante 1998, lo tene congresonan internacional i di distrito. Miles di nos rumannan for di hopi pais lo bishitá e sede di Sociedad na New York i tambe sucursalnan den otro paisnan. No solamente ora di bishitá e facilidadnan aki, sino tambe na cualkier otro ocasion, nos tin cu ‘recomendá nos mes como ministernan di Dios den tur manera,’ incluso cu nos paña i areglo personal apropiado.—2 Cor. 6:3, 4.

Papiando dje importancia di tin paña i areglo personal apropiado, Organisá pa Cumpli cu Nos Ministerio ta comentá riba e necesidad di ta físicamente limpi i di tin paña modesto i bon areglo personal ora nos ta participá den e ministerio di veld i ta asistí na reunionnan cristian. Anto, na página 131, §2, e ta declará: “Mescos lo conta ora nos ta bishitá cas di Betel na Brooklyn of cualkier oficina di sucursal dje Sociedad. Corda, e nomber Betel ta nificá ‘Cas di Dios,’ pues nos bistí, areglo personal i conducta mester ta similar na loke ta ser sperá di nos ora di asistí na reunion pa adoracion n’e Salon di Reino.” Publicadónan di Reino dje área local i tambe esnan for di lugánan mas leu cu ta bini pa mira i asociá cu miembronan dje famia di Betel i pa bishitá e sucursal mester tene nan mes n’e mésun norma haltu aki.

Nos pañanan mester tin un influencia positivo riba otronan pa loke ta e manera cu nan ta mira e adoracion berdadero di Jehova. Sin embargo, a ripará cu ora algun ruman ta bishitá e facilidadnan di Sociedad, nan ta incliná di ta demasiado casual den nan forma di bisti. Pañanan asina ta inapropiado ora di bishitá cualkier cas di Betel. Den e asuntu aki, mescos cu den tur otro aspecto di nos bida cristian, nos ta deseá na mantené e mésun normanan haltu cu ta distinguí Dios su pueblo for dje mundu dor di haci tur cos p’e gloria di Dios. (Rom. 12:2; 1 Cor. 10:31) Tambe ta bon pa papia cu nos studiantenan di Bijbel i otro hende cu tal bes ta bai bishitá Betel pa promé bes, i recordá nan dje importancia di duna atencion n’e forma di bisti i areglo personal apropiado.

Pues, ora di bishitá e facilidadnan di Sociedad, puntra bo mes: ‘Mi paña i areglo personal ta modesto?’ (Compará cu Mikéas 6:8.) ‘E ta reflehá bon riba e Dios cu mi ta adorá? Mi aparencia lo distraí of ofendé otro hende? Mi ta poniendo un bon ehempel pa otronan cu tal bes ta di bishita pa promé bes?’ Laga cu nos semper, cu nos paña i areglo personal, ta “dorna e siñansa di nos Salbador, Dios, den tur cos.”—Tito 2:10.