Kaha di Pregunta

◼ Kon nos mester bisti ora nos ta bai bishitá fasilidatnan ku ta ser usá pa Yehova su sirbishi?

Rònt mundu, Salònnan di Reino, Salanan di Asamblea, kasnan di Bètel i fasilidatnan di sukursal ta lugánan spesial i dediká na Yehova su sirbishi. Nan ta reflehá dignidat, debí ku nan ta modesto, limpi i bon mantené. Esaki ta kontrali di loke tin den e sistema di kosnan di Satanas. Mester ta bisto tambe ku hende ku ta bishitá lugánan ku ta ser usá pa Yehova su sirbishi ta pertenesé na dje, i ta hasi su boluntat.

Komo kristian, nos ta “rekomendá nos mes komo sirbidónan di Dios” den tur kos, inkluso den nos manera di bisti i areglo personal apropiá. (2 Kor. 6:3, 4) Tambe ta ser sperá pa nos komportá nos mes debidamente. Na tur momento nos manera di bisti i areglo personal mester reflehá e desensia i dignidat ku ta pas pa sirbidónan di Yehova Dios. Esaki mester ta e kaso spesialmente ora nos ta bishitá tantu e sede na New York komo e sukursalnan rònt mundu.

Konsiderando e importansia di un aparensia apropiá, e buki Organisá pa Hasi Yehova Su Boluntat ta indiká ku ora nos ta partisipá den sirbishi di vèlt i ta asistí na reunionnan kristian nos mester ta físikamente limpi, bistí modesto i nos areglo personal mester ta presentabel. Anto na página 138, paragraf 3, e buki ta bisa: “Kòrda, e nòmber Bètel ta nifiká ‘Kas di Dios.’ P’esei nos bistí, areglo personal i kondukta mester ta similar na loke ta ser sperá di nos ora nos ta asistí na reunion pa adorashon na Salòn di Reino.” Tantu publikadónan di Reino lokal komo esnan ku ta bin di leu pa bishitá Bètel mester sigui e norma haltu aki. Di e manera aki, bishitantenan ta mustra e debido apresio i rèspèt.—Sal. 29:2, NW.

Nos manera di bisti mester identifiká nos komo hende ku ta “teme Dios.” (1 Tim. 2:10) Nos manera di bisti i areglo personal apropiá tin un efekto positivo riba e manera ku otro hende ta mira adorashon berdadero di Yehova. Sin embargo, nos a ripara ku algun ruman tin tendensia di bisti demasiado kasual, slòns òf sunú ora nan ta bishitá lugánan ku ta ser usá pa Yehova su sirbishi. E manera di bisti ei nunka no ta apropiá pa kristiannan. Den e asuntu aki, i tambe den tur otro aspekto di nos bida kristian, nos ke mantené e normanan haltu ku ta distinguí e pueblo di Dios for di mundu, hasiendo tur kos pa e gloria di Dios.—Rom. 12:2; 1 Kor. 10:31.

Pues, ora di bishitá e sede i sukursal den e Estado di New York òf otro fasilidatnan di sukursal, sea ta un bishita planiá òf ta durante fakansi den un área turístiko, puntra bo mes: ‘Mi manera di bisti i areglo personal ta reflehá e modestia, limpiesa i dignidat di e lugá ku mi ta bai bishitá? E ta duna un bon impreshon di e Dios ku mi ta adorá? Mi aparensia lo distraé òf ofendé otro hende?’ Laga nos bisti i areglá nos mes di tal manera ku semper nos ta “dòrna e doktrina di Dios nos Salbadó den tur kos”!—Tito 2:10.