Bo Tin “un Sumpiña den Carni”?
1 Nos ta deseá mashá di cumpli cu nos comision di predicá e bon nobo lo mihó cu nos por. Sin embargo, pa hopi di nos rumannan stimá ta difícil pa participá plenamente debí cu malesa of hendikep físico serio ta stroba, loke ta pone cu ta duru pa nan haci mes tantu cu nan lo kier. Por ta un tarea difícil pa nan superá sintimentunan di desanimacion, foral ora nan mira otro rumannan rond di nan asina activo den e ministerio.—1 Cor. 9:16.
2 Un Ehempel pa Imitá: Apostel Pablo tabatin cu lucha cu “un sumpiña den carni.” Tres biaha el a roga Jehova pa kita e obstáculo doloroso, cu el a describí como “un angel di Satanas” cu a sigui boft’é. Tog, apesar di esei, Pablo a wanta i a sigui padilanti den su ministerio. E no a sinti duele di su mes ni a bira un kehadó crónico. El a duna lo mihó di su mes. E secreto di su éxito den trata cu e situacion tabata e siguransa aki cu Dios a dun’é: “Mi bondad inmerecí ta suficiente pa bo; pasobra mi poder ta ser hací perfecto den debilidad.” Pablo su debilidad a bira un fortalesa ora el a siña aceptá su situacion i dependé riba Jehova i su spiritu santu pa por wanta.—2 Cor. 12:7-10.
3 Con Abo Por Wanta: Debilidad físico ta obligá bo limitá bo sirbishi na Dios? Si ta asina, imitá Pablo su manera di mira cosnan. Asta si bo malesa of hendikep no tin solucion permanente den e sistema di cosnan aki, bo por pone bo pleno confiansa den Jehova, cu ta comprendé bo necesidadnan i lo percurá e “poder mas ayá di loke ta normal.” (2 Cor. 4:7) Probechá dje yudansa cu tin disponibel pa bo den e congregacion, i no isolá bo mes. (Pro. 18:1) Si bo ta haña cu ta difícil pa participá den e trabou di cas-pa-cas, busca maneranan práctico pa duna testimonio informal of via telefon.
4 Aunke un sumpiña den carni por limitá loke bo por haci den e ministerio, bo no tin nodi sinti cu bo ta keda afó. Mescos cu Pablo, bo tambe por “duna testimonio cabal dje bon nobo dje bondad inmerecí di Dios,” dor di haci loke bo fortalesa i circunstancianan ta permití. (Echo. 20:24) Sea sigur cu Jehova lo keda hopi contentu cu bo esfuersonan pa cumpli cu bo ministerio.—Heb. 6:10.