Debilidad Humano Ta Engrandecé Jehova Su Poder

“Tur hende tabata pensa cu mi tabata un minister di tempu completo asina felis i bibitu. Semper mi tabata esun cu ta yuda otronan cu nan problemanan. Tog, na mésun tempu, mi tabata sinti como si fuera mi tabata muriendo di paden. Pensamentunan inkietante i angustia mental tabata caba cu mi. Mi a cuminsá sintí mi alehá for di hende. Mi tabatin solamente gana di keda cas riba cama. Pa lunanan, mi a roga Jehova pa lagá mi muri.”—Vanessa.

MANERA den e caso citá ariba, ta masha normal pa spera cu tin biaha sirbidónan di Jehova lo sinti e efectonan di biba den e ‘tempu crítico aki, duru pa trata cuné.’ (2 Timoteo 3:1) Algun por asta bira desanimá. (Filipensenan 2:25-27) Si e desanimacion dura largu, e por horta nos di nos fortalesa, pasobra Bijbel ta declará: “Bo a mustra bo mes desanimá den e dia di afliccion? Bo poder lo ta poco.” (Proverbionan 24:10) Sí, ora nos ta desanimá, nos tin mester di poder—tal bes asta loke apostel Pablo a yama “poder mas ayá di loke ta normal.”—2 Corintionan 4:7.

Jehova Dios ta e fuente di poder sin límite. Esaki ta evidente ora nos examiná su creacion. (Romanonan 1:20) Tuma, por ehempel, solo. Tera ta interceptá un fluho constante di rond di 240 biyon forsa di cabai for di solo. Tog, e cifra aki ta representá solamente ‘één twee miljardste deel’ di solo su produccion di energia. I solo ta chikitu na comparacion cu streanan conocí como supergigantenan. Entre esakinan tin Rigel, un strea den e constelacion di Orion cu ta 50 biaha mas grandi cu nos solo i ta emití 150.000 biaha mas tantu energia!

E Creador di tal fuentenan celestial di energia mes mester ta poseé un “abundancia di energia dinámico.” (Isaías 40:26; Salmo 8:3, 4) En berdad, profeta Isaías a declará cu Jehova “no ta cansa ni fatigá.” I Dios ta dispuesto pa compartí su poder cu ken cu, pa motibu di debilidad humano, ta sinti cu e ta cansando. (Isaías 40:28, 29) Con e ta haci esaki ta ser ilustrá den e caso di apostel cristian Pablo.

Enfrentando Prueba cu Exito

Pablo a conta e corintionan tocante un obstáculo cu e tabatin cu lucha cuné. El a yam’é “un sumpiña den carni.” (2 Corintionan 12:7) E “sumpiña” aki por tabata un problema di salú, tal bes mal bista. (Galationan 4:15; 6:11) Of kisas Pablo tabata refiriendo na apostelnan falsu i otro causantenan di disturbio cu a desafiá su nombramentu i trabou como apostel. (2 Corintionan 11:5, 6, 12-15; Galationan 1:6-9; 5:12) Sea cual sea e caso, e “sumpiña den carni” aki a afligí Pablo profundamente, i el a pidi bes tras bes den oracion p’e ser eliminá.—2 Corintionan 12:8.

Sin embargo, Jehova no a cumpli cu Pablo su peticion. En bes di esei, el a bisa Pablo: “Mi bondad inmerecí ta suficiente pa bo.” (2 Corintionan 12:9) Kico Jehova tabata kier men cu esaki? Wel, ora nos considerá Pablo su curso anterior di persiguí cristiannan, tabata solamente pa medio di bondad inmerecí cu e por tabatin un relacion cu Dios mes—muchu ménos sirbi como apostel!a (Compará cu Zacarías 2:8; Revelacion 16:5, 6.) Ta como si Jehova tabata bisando Pablo cu e privilegio di ser un disipel tabata “suficiente.” Lo e no a bai compañá cu un eliminacion milagroso di problemanan personal di bida. En realidad, algun penalidad por asta bini como resultado di privilegionan adicional. (2 Corintionan 11:24-27; 2 Timoteo 3:12) Con cu bai bin, Pablo mester a djis lucha cu su “sumpiña den carni.”

Pero, di ningun manera Jehova tabata bandonando Pablo sin piedad. Mas bien, el a bis’é: “Mi poder ta ser hací perfecto den debilidad.” (2 Corintionan 12:9) Sí, Jehova amorosamente lo a duna Pablo e fortalesa pa lucha cu su situacion. P’esei, Pablo su “sumpiña den carni” a bira un ehempel práctico. Esei a siñ’é dependé riba e fortalesa di Jehova en bes di riba su mes fortalesa. Evidentemente Pablo a siña e les aki bon, pasobra algun aña mas despues el a skirbi n’e filipensenan: “Mi a siña cu, den cualkier circunstancia cu mi ta, pa keda satisfecho cu loke mi tin. Pa tur cos mi tin e forsa den birtud di esun cu ta duná mi poder.”—Filipensenan 4:11, 13.

Kico di abo? Bo ta luchando cu un of otro sorto di “sumpiña den carni,” tal bes un enfermedad of un circunstancia den bida cu ta causá bo hopi ansiedad? Si ta asina, tuma curashi. Aunke Jehova kisas no ta eliminá e obstáculo milagrosamente, e por otorgá bo e sabiduria i fortalesa pa lucha cuné exitosamente segun cu bo ta sigui pone interesnan di Reino na promé lugá den bida.—Mateo 6:33.

Si enfermedad of edad avansá ta strobá bo di logra tur loke bo kier den actividad cristian, no desesperá. En bes di mira bo prueba como algu cu ta limitá bo sirbishi na Jehova, consider’é como un oportunidad pa aumentá bo dependencia riba dje. Corda, tambe, cu e balor di un cristian no ta ser midí dor di su nivel di actividad, sino dor di su fe i e profundidad di su amor. (Compará cu Marco 12:41-44.) Stimando Jehova cu henter bo alma ta nificá cu bo ta sirbié te n’e máximo di bo mes abilidad—no di esun di un otro persona.—Mateo 22:37; Galationan 6:4, 5.

Si bo “sumpiña den carni” ta enbolbé un circunstancia angustioso den bida, manera morto di un ser kerí, sigui e spiertamentu di Bijbel: “Tira bo carga riba Jehova mes, i e mes lo sostené bo. Nunca lo e permití e hustu tambaleá.” (Salmo 55:22) Un señora cristian yamá Sylvia a haci esaki. Den un lapso di apénas un par di aña, el a perde su esposo den morto despues di 50 aña di matrimonio i tambe nuebe otro miembro di famia—incluyendo dos nietu yong. “Si no tabata pa Jehova,” Sylvia ta bisa, “lo mi a pena di un manera descontrolá. Pero mi ta haña gran consuelo den oracion. Mi ta combersá prácticamente sin stop cu Jehova. Mi sa cu e ta duná mi e fortalesa pa wanta.”

Ta ki trankilisante pa sa cu “e Dios di tur consuelo” por duna esnan cu ta pena e poder pa wanta! (2 Corintionan 1:3; 1 Tesalonicensenan 4:13) Apreciando esaki, nos por comprendé Pablo su conclusion riba e asuntu. El a skirbi: “Mi tin placer den debilidad, den insulto, den casonan di necesidad, den persecucion i dificultad, pa Cristo. Pasobra ora mi ta débil, e ora ei mi ta poderoso.”—2 Corintionan 12:10.

Luchando cu Imperfeccionnan

Nos tur a heredá imperfeccion for di nos promé mayornan humano. (Romanonan 5:12) Como resultado, nos ta hiba un bataya contra e deseonan dje carni pecaminoso. Ta ki un desanimacion ora nos descubrí cu e rasgonan di “e personalidad bieu” tin un gara mas poderoso riba nos cu nos a pensa! (Efesionan 4:22-24) Na ocasionnan asina nos por sinti manera apostel Pablo a sinti, kende a skirbi: “Realmente mi tin deleite den e ley di Dios segun e homber cu mi ta paden, pero mi ta contemplá den mi miembronan un otro ley cu ta haci guera contra e ley di mi mente i ta hibá mi catibu n’e ley di picá cu ta den mi miembronan.”—Romanonan 7:22, 23.

Aki tambe, nos por probechá dje poder cu Jehova ta duna. Ora bo ta lucha cu un debilidad personal, nunca stop di acudí na dje den oracion, buscando sinceramente su pordon sin importá cuantu biaha bo tin cu acerk’é tocante e mésun problema. Pa motibu di su bondad inmerecí, Jehova, cu “ta evaluando e curasonnan” i cu por mira e profundidad di bo sinceridad, lo otorgá bo un concenshi hací limpi. (Proverbionan 21:2) Pa medio di su spiritu santu, Jehova por duná bo e fortalesa pa sigui cu e lucha contra debilidadnan carnal.—Lucas 11:13.

Tambe nos mester di fortalesa for di Jehova ora di trata cu e imperfeccionnan di otronan. Por ehempel, un compañero cristian por papia cu nos “sin pensa manera e hincánan di un spada.” (Proverbionan 12:18) Esaki lo por ofendé nos profundamente, specialmente si e ta bini di un persona cu nos ta sinti cu mester sa mihó. Nos lo por keda sumamente molestiá. Algun asta a usa ofensanan asina como hustificacion pa bandoná Jehova—e eror mas grandi di tur!

Sin embargo, un actitud balansá lo yuda nos mira otro su debilidadnan den un lus corecto. Nos no por spera perfeccion for di hende imperfecto. “No tin hende cu no sa peca,” e homber sabí Sálomon ta recordá nos. (1 Reynan 8:46) Arthur, un cristian ungí kende a sirbi Jehova lealmente pa rond di shete década, a comentá: “Debilidadnan den co-sirbidónan ta crea un oportunidad pa nos proba nos integridad na Dios, poniendo nos temperamentu cristian na prueba. Si nos permití loke hende ta bisa of haci interferí cu nos sirbishi na Jehova, nos ta sirbiendo hende. Ademas, nos rumannan tambe lo mester ta stima Jehova. Si nos busca loke ta bon den nan, pronto nos ta mira cu tog nan no ta dje malu ei.”

E Poder pa Predicá

Promé cu Jesus a subi na shelu, el a bisa su disipelnan: “Boso lo ricibí poder ora e spiritu santu yega riba boso, i boso lo ta testigonan di mi tantu den Jerusalem como den henter Hudea i Samaria i te na e parti mas lehano dje tera.”—Echonan 1:8.

Na cumplimentu cu Jesus su palabranan, e trabou aki ta ser efectuá dor di Testigonan di Jehova den 233 pais rond mundu. Colectivamente, nan ta dedicá mas cu mil miyon ora tur aña yudando otronan yega na un conocimentu di Jehova. Pa haci e trabou aki no ta semper fácil. Den algun pais e trabou di predicacion di Reino ta prohibí of restringí. Considerá tambe, ken ta haciendo e trabou—hende débil i imperfecto, cada un cu su propio problema i ansiedadnan. Tog e trabou ta sigui, i como resultado, den e último tres añanan, mas cu un miyon persona a dedicá nan bida na Jehova i a simbolisá nan dedicacion mediante bautismo bou di awa. (Mateo 28:18-20) Berdaderamente, e trabou aki ta ser lográ solamente cu e fortalesa di Dios. Jehova a bisa mediante profeta Zacarías: “No pa medio di un forsa militar, ni pa medio di poder, sino pa medio di mi spiritu.”—Zacarías 4:6.

Si bo ta un publicadó dje bon nobo, bo tin un participacion—sin importá con chikitu e por parce—den e logro magnífico ei. Apesar di e ‘sumpiñanan’ cu bo tin cu wanta, bo por ta sigur cu Jehova lo no lubidá ‘bo trabou i e amor cu bo a demostrá pa su nomber.’ (Hebreonan 6:10) P’esei sigui dependé riba e Fuente di tur energia dinámico pa sosten. Corda, ta solamente cu e fortalesa di Jehova nos por wanta; su poder ta ser hací perfecto den nos debilidadnan.

[Nota]

[Plachi na página 26]

E trabou di predicacion ta ser lográ solamente cu poder di Jehova