Pioneronan Ta Yuda Otro Publicadónan
1 Jesus a bisa: “E cosecha, en berdad, ta grandi, pero e trahadónan ta poco. P’esei roga n’e Doño dje cosecha pa manda trahadó na su cosecha.” Ya cu e cosechadónan dje promé siglo tabata poco na cantidad i nan tabatin hopi teritorio pa cubri, Jesus lo por a instruí nan pa alcansá mas tantu hende posibel cu e bon nobo dor di manda nan unu unu. En bes di esei, el “a manda nan dos dos.” (Luc. 10:1, 2) Pakico dos dos?
2 E disipelnan ei tabata nobo i sin experencia. Dor di traha huntu nan lo por a siña for di otro i animá otro. Manera Sálomon a expres’é, “dos ta mihó cu un.” (Ecl. 4:9, 10) Asta despues cu Jehova a drama spiritu santu na Pentecoste 33 E.C., Pablo, Barnabas i otronan a compañá otro creyentenan den e ministerio. (Echo. 15:35) Pa algun di nan, lo mester tabata un privilegio grandi pa hombernan capas asina entrená nan personalmente!
3 Un Excelente Programa di Entrenamentu: Mescos cu su ekivalente dje promé siglo, e congregacion cristian moderno ta un organisacion cu e meta di predicá. Tambe e ta duna nos entrenamentu. Como individuonan, nos deseo sincero mester ta pa presentá e bon nobo dje manera mas eficas posibel. Pa mas publicadó por mehorá den nan eficacia, tin yudansa disponibel.
4 N’e Scol di Ministerio di Reino tené recientemente, Sociedad a anunciá un programa pa pioneronan yuda otro publicadónan den e ministerio di veld. Tin un necesidad pa esaki? Sí, tin. Mas cu un miyon publicadó a ser bautisá den e último tres añanan, i hopi di esakinan mester di entrenamentu pa bira mas eficas den e trabou di predicá. Ken nos por usa pa satisfacé e necesidad ei?
5 Pioneronan di tempu completo por yuda. E organisacion di Jehova ta duna nan hopi conseho i entrenamentu. Pioneronan ta ricibí instruccion adaptá na nan necesidadnan den e Scol di Sirbishi di Pionero di dos siman largu. Tambe nan ta beneficiá for dje reunionnan cu e superintendentenan di circuito i di distrito, i tambe for di guia dje ancianonan. Aunke no ta tur pionero tin mes tantu experencia cu Pablo i Barnabas, nan a ricibí un entrenamentu balioso sí cu nan ta contentu pa compartí cu otronan.
6 Ken Lo Beneficiá? Ta publicadó nobo of esnan recien bautisá so por participá den e programa aki? Sigur cu no! Tin rumannan yong i mas grandi cu a conocé e berdad pa hopi aña caba, pero cu tog lo apreciá yudansa den cierto rasgo dje ministerio. Algun ta hopi bon den laga literatura, pero tin problema pa haci rebishita of den cuminsá studio di Bijbel. Otronan kisas ta cuminsá studionan di Bijbel cu facilidad, pero ta ripará cu nan studiantenan no ta progresá. Kico ta wantando nan atras? Por pidi pioneronan cu experencia pa duna yudansa den e áreanan aki. Algun pionero ta bon den cultivá interes, cuminsá studio di Bijbel i dirigí studiantenan nobo n’e organisacion. Nan experencia lo ta probechoso den e programa nobo aki.
7 Bo ta haña cu bo programa no ta permití bo apoyá e congregacion su reunionnan regular pa sirbishi di veld mes tantu cu lo bo a deseá? Un pionero lo por traha cu bo de bes en cuando ora no tin otro publicadó disponibel.
8 Bon Cooperacion Ta Necesario: Dos bes pa aña, e ancianonan lo haci areglo pa publicadónan cu ta deseá di haña yudansa personal participá den e programa di Pioneronan Ta Yuda Otro Publicadónan. Si bo bai di acuerdo pa ricibí un yudansa asina, reuní cu e pionero cu ta asigná pa yudá bo, traha un programa práctico pa sirbishi, i pega na dje. Cumpli cu tur afsprak. Segun cu boso ta traha huntu, observá maneranan eficas pa presentá e bon nobo. Analisá pakico cierto manera di acercá hende ta duna fruta. Tuma e sugerencianan cu e pionero por tin pa bo pa mehorá bo presentacion na consideracion. Segun cu bo ta aplicá e cosnan cu bo ta siña, bo progreso den e ministerio lo bira bisto, tantu pa bo como pa otronan. (Mira 1 Timoteo 4:15.) Traha huntu mas tantu posibel, participando den tur rasgo dje ministerio, incluso testimonio informal, pero enfocando riba cualkier área particular den cua bo mester di yudansa personal.
9 E superintendente di sirbishi ta interesá den e progreso cu lo ser hací. Cada tantu tempu lo e averiguá cu e conductor di Studio di Buki di Congregacion pa mira ki beneficio bo ta sacando dje programa. E superintendente di circuito tambe lo yudá bo ora e bishitá e congregacion.
10 Jehova kier pa su pueblo ser entrená i “ekipá pa tur bon obra.” (2 Tim. 3:17) Mira e areglo di Pioneronan Ta Yuda Otro Publicadónan como un percuracion excelente pa yuda esnan cu ta deseá na mehorá nan abilidad di predicá e palabra. Si bo tin e privilegio di participá den dje, haci esei cu gratitud, humildad i goso.