“Con Lo Mi Por . . . a Ménos Cu un Hende Guia Mi?”
1 Ora Felipe, e evangelisadó, a puntra e eunuco etiopio si el a comprendé loke e tabata lesa for dje Palabra di Dios, e homber a contestá: “Realmente, con lo mi por haci esei a ménos cu un hende guia mi?” Gustosamente Felipe a yud’é comprendé e bon nobo tocante Jesus, loke a pone cu e homber a bautisá mesora. (Echo. 8:26-38) Felipe tabata obedeciendo e comision di Cristo pa ‘haci disipel di hende di tur nacion, bautisando nan i siñando nan.’—Mat. 28:19, 20.
2 Nos tin cu obedecé e comision di haci disipel, mescos cu Felipe a haci. Sin embargo, cerca e hendenan cu nos ta studia Bijbel cuné, hopi bes nos no ta mira e sorto di progreso spiritual rápido cu e eunuco etiopio a haci. E homber ei, un prosélito hudiu bon versá den e Scritura, tabatin un curason receptivo i e único cos cu e mester a haci ta aceptá cu Jesus tabata e Mesías primintí. Ta un desafio si e hendenan cu nos ta studia Bijbel cuné no ta conocí cu Bijbel, a ser engañá pa siñansanan religioso falsu of ta cargá cu problemanan personal difícil. Kico lo yuda nos tin éxito den guia studiantenan di Bijbel na dedicacion i bautismo?
3 Dicerní e Necesidadnan Spiritual dje Studiante di Bijbel: E suplemento di Nos Ministerio di Reino di augustus 1998 a considerá con largu nos por studia cu hende, usando e foyeto Rekerí i buki Conocimentu. E suplemento a duna e instruccion aki: “Ta necesario pa determiná con lihé e studio tin cu bai di acuerdo cu e circunstancia i abilidad dje studiante. . . . Nos no kier stroba e studiante di haña un bon conocimentu, djis pa pasa lihé dor dje buki. Cada studiante tin mester di un base sólido pa su fe nobo den e Palabra di Dios.” P’esei, ta consehabel pa no pura dor dje informacion den e buki Conocimentu cu e pensamentu di purba caba e buki den seis luna. Podisé tin mester di hopi mas cu seis luna pa yuda algun hende progresá te na bautismo. Segun bo ta conducí e studio tur siman, dedicá e tempu cu ta necesario pa yuda e studiante comprendé i aceptá loke e ta siñando for dje Palabra di Dios. Den algun caso, kisas tin mester di dos pa tres siman pa abarcá un capítulo dje buki Conocimentu. Esaki lo duna bo tempu pa lesa i clarificá hopi dje textonan citá.—Rom. 12:2.
4 Pero, kico si ora boso terminá e buki Conocimentu, bo ripará cu mester completá e studiante su comprendimentu dje berdad of cu ainda e no ta plenamente motivá pa tuma un posicion na fabor dje berdad i dedicá su bida na Dios? (1 Cor. 14:20) Kico mas bo por haci pa yud’é subi e caminda cu ta hiba na bida?—Mat. 7:14.
5 Satisfacé e Necesidadnan Spiritual dje Studiante: Si ta bisto cu un persona ta haciendo progreso, aunke poco-poco, i e ta desaroyando aprecio pa loke e ta siña, e ora ei sigui cu e studio di Bijbel den un di dos buki despues cu terminá cu e foyeto Rekerí i e buki Conocimentu. Kisas esaki no ta necesario den tur caso, pero ora e ta necesario, sigui cu e studio den e buki Berdadero Paz, e buki Uní den Adoracion of e buki E Palabra di Dios. Mayoria publicadó tin nan copia personal dje bukinan aki cu nan por usa si e congregacion no tin na stock. E buki E Palabra di Dios ta e único cu por haci pedido p’e na Sociedad. Den tur caso, mester studia e foyeto Rekerí i e buki Conocimentu promé. Mester conta i raportá e studio di Bijbel, rebishitanan i tempu cu dedicá na sigui e studio, asta si e studiante bautisá promé cu completá e di dos buki.
6 Esaki kier men cu awor mester bolbe yuda esnan cu ta recien bautisá pero cu a studia un buki so pa studia e di dos buki? No necesariamente. Pero, podisé nan a bira inactivo of nan no a progresá den e berdad, i kisas nan ta sinti cu nan tin mester di yudansa personal pa yuda nan aplicá e berdad mas mihó den nan bida. Mester consultá cu e superintendente di sirbishi promé cu renobá un studio cu un publicadó bautisá. Sin embargo, si bo sa di algun hende cu a studia e buki Conocimentu den pasado pero cu nunca no a progresá te na dedicacion i bautismo, kisas lo bo kier tuma e iniciativa pa wak si nan lo kier reanudá nan studio di Bijbel.
7 Duna atencion personal i estrecho na tur persona interesá cu nos ta studia cuné, ta un marca di amor cristian. Nos meta ta pa yuda e studiante logra un comprendimentu mas profundo dje berdad dje Palabra di Dios. E ora ei e por tuma un posicion definitivo basá riba conocimentu na fabor dje berdad i dedicá su bida na Jehova, simbolisando e dedicacion ei mediante bautismo bou di awa.—Sal. 40:8; Efe. 3:17-19.
8 Bo ta corda loke a sosodé despues cu e eunuco etiopio a bautisá? “El a sigui su caminda alegrando” como un disipel nobo di Jesucristo. (Echo. 8:39, 40) Ohalá nos i esnan cu nos guia exitosamente den e caminda dje berdad haña gran goso den sirbi Jehova Dios, awor i pa semper!