Programa Nobo di Dia Special di Asamblea

“Bira Plenamente Desaroyá den e Facultad di Comprendimentu” ta e tema dje programa di dia special di asamblea di september 2000 padilanti. (1 Cor. 14:20) Pakico lo ta importante pa nos asistí? Nos ta biba den un mundu yen di maldad. Pa resistí esaki, nos tin cu desaroyá nos facultadnan di comprendimentu spiritual pa asina nos por vence malu cu bon. Esei ta loke e programa di dia special di asamblea lo yuda nos haci.

Den e sesion di apertura, e superintendente di circuito lo trata “Yudansanan pa Bira Plenamente Desaroyá den Comprendimentu Bíblico.” Lo e mustra nos con pa bira stabilisá den e fe cristian. E orador bishitante lo resaltá con usa, of aplicá, principionan bíblico ta vital pa desaroyá un percepcion skerpi, ora e papia riba e tema “Protehá Spiritualidad dor di Entrená Bo Facultadnan Perceptivo.”

Hóbennan tambe tin cu desaroyá nan facultadnan di comprendimentu. Lo considerá esaki den e partinan “Pakico Ser Baby en Cuanto Maldad” i “Hóbennan Cu Ta Adkerí Comprendimentu Awor.” Tende hóbennan conta kico nan ta haci pa fortificá nan mes spiritualmente di manera cu nan por controlá cualkier curiosidad cu nan tin pa sa dje actividadnan malbado di mundu i asina evitá problema.

Con nos lo haña e mayor felicidad den bida? E orador bishitante lo splica esaki den e discurso final “Beneficiá dor di Aplicá Principionan Bíblico cu Comprendimentu.” Lo e duna ehempelnan pa mustra cu aplicá e Palabra di Dios ta yuda nos trata cu problema, tuma decisionnan i berdaderamente beneficiá di loke Jehova ta siña nos.

Esnan cu ta deseá di simbolisá nan dedicacion na Dios mediante bautismo bou di awa n’e asamblea, mester notificá e superintendente presidente mas pronto posibel. Marca e fecha dje dia special di asamblea riba bo kalender asina cu anunci’é, i traha plannan definitivo pa bo beneficiá dje programa ricu aki. No perde niun parti dje dia special di asamblea! Lo e fortificá bo pa soportá e sistema malbado aki i keda fiel na Jehova.