Desaroyá Bo Abilidad Mental di Distinguí
1 E último dianan angustioso cu nos ta aden awor, a trece mas preshon i hopi tipo di prueba severo riba e pueblo di Dios tur caminda. (2 Tim. 3:1-5) Nos tur tin mester di animacion pa para firme den fe. (1 Cor. 16:13) Nos por haci esaki cu Jehova su yudansa segun cu nos ta sigui alimentá nos mes regularmente cu su Palabra, dependé riba su spiritu santu, i keda pegá na su organisacion.—Sal. 37:28; Rom. 8:38, 39; Rev. 2:10.
2 Ta cu bon motibu anto e programa di dia special di asamblea di aña pasá a trata e tema “Bira Plenamente Desaroyá den e Facultad di Comprendimentu.” E tabata basá riba 1 Corintionan 14:20, caminda nos ta lesa loke apostel Pablo a skirbi: “Rumannan, no bira mucha chikitu den e facultad di comprendimentu, sino sea baby en cuanto maldad; sin embargo bira plenamente desaroyá den e facultad di comprendimentu.” Con bo a haña e programa?
3 “Masha animante!” “Net loke nos tabatin mester!” Eseinan ta djis algun reaccion. Asta un persona cu no ta Testigo, cu a asistí n’e dia special di asamblea p’e mira su yu muher di 12 aña bautisá, a bisa cu e programa a impresion’é mashá i cu e ta mira con esaki lo por beneficiá su famia. Ta asina bo tambe ta sinti? Laga nos repasá algun dje puntonan sobresaliente dje programa.
4 Conocimentu Exacto Ta Necesario pa Desaroyá Facultadnan Perceptivo: Den e discurso di introduccion “Desaroyá Bo Facultad di Comprendimentu Awor,” e orador a enfatisá algu cu nos tin mester pa enfrentá e desafionan djawendia. Kico esei ta? Fuera di abilidad mental nos tin cu desaroyá i profundisá nos facultad di comprendimentu bíblico, sino tur e maldad cu nos ta haña nos cuné lo vence nos. Pa haña e comprendimentu aki nos tin mester di guia divino. Mescos cu e salmista, nos mester pidi Jehova den oracion pa laga nos comprendé su leynan i recordatorionan pa asina nos por sirbié di henter nos curason.—Sal. 119:1, 2, 34.
5 Den e siguiente parti e superintendente di circuito a mustra cu Jehova mediante su Palabra i organisacion ta duna “Yudansanan pa Bira Plenamente Desaroyá den Comprendimentu Bíblico.” Comprendimentu a ser definí como “e abilidad di analisá un asuntu i dicerní su composicion dor di capta e coneccion cu tin entre su diferente partinan i e totalidad, i asina capta e sentido di dje.” Ken por yuda nos desaroyá e abilidad aki? Jehova a percurá donnan den hende pa yuda nos haci progreso spiritual. (Efe. 4:11, 12) Su organisacion terenal ta urgi nos pa lesa e Palabra di Dios tur dia i asistí na tur reunion di congregacion regularmente. (Sal. 1:2) Nos ta siña con pa usa Bijbel i publicacionnan cristian den studio personal i di famia, i tambe con pa prepará pa reunion i sirbishi di veld. Bo ta sacando probecho di tur e percuracionnan aki? Bo ta siguiendo un programa personal di lesa Bijbel regularmente? Esaki ta esencial si nos kier protehá nos mes pa nos no bira víctima di mundu su tendencianan, su moda, filosofia i influencianan engañoso.—Col. 2:6-8.
6 Nos Facultadnan Perceptivo Mester Ser Entrená: E orador di bishita a splica den su promé discurso, titulá “Protehá Spiritualidad dor di Entrená Bo Facultadnan Perceptivo,” cu hende den mundu no por distinguí bon for di malu. (Isa. 5:20, 21) Esaki ta debí cu nan ta nenga di reconocé i sigui Dios su normanan hustu. En cambio, nos cu a ricibí entrenamentu spiritual den Jehova su organisacion ta reconocé e normanan di Dios, cu ta sirbi pa guia nos actividadnan i conducta. Pues, nos ta den un posicion pa comprobá pa nos mes loke ta bon i aceptabel den Jehova su bista i loke ta di acuerdo cu su boluntad perfecto.—Rom. 12:2.
7 Pa evitá mundu su moda di pensa confuso i e mal frutanan cu esaki ta trece cuné, nos tin cu entrená nos facultadnan perceptivo, esta nos abilidad mental di distinguí, constantemente. Con nos por logra esaki? Na Hebreonan 5:12-14 apostel Pablo a enfatisá e necesidad di alimentá nos mes cu mas cu solamente e “lechi” dje palabra. Nos tin mester di cuminda spiritual sólido, manera loke nos ta ricibí dor di studia e profecia di Isaías na Studio di Buki di Congregacion. Anto nos tin cu aplicá loke nos siña mesora den nos bida. Ora nos haci asina, nos ta ser convencí cu Jehova su principio i normanan ta esnan corecto. Tambe esaki ta entrená nos abilidad mental pa distinguí claramente tantu loke ta bon como loke ta malu.
8 Lamentablemente, algun ruman a tambaleá spiritualmente. Di con? Pasobra nan no a enfocá nan atencion riba loke ta bon i recto den bista di Jehova. Como resultado nan a bira víctima di ‘talk show’nan na radio i television cu tin contenido inaceptabel desde un punto di bista bíblico. Tambe nan a bira víctima di música degradá of di mal influencia den chat room di computer. Dor di actua di un forma sabí, nos lo evitá di ser influenciá dor di hende inmoral, estúpido of malbado.—Pro. 13:20; Gal. 5:7; 1 Tim. 6:20, 21.
9 Hóbennan Mester Ta “Baby en Cuanto Maldad”: E programa tabatin dos parti cu specíficamente a animá hóbennan pa desaroyá nan abilidad mental di distinguí. E orador a mustra cu ser “baby en cuanto maldad” ta nificá keda sin experencia, esta, inocente manera baby, relacioná cu cosnan cu ta impuru den bista di Jehova. (1 Cor. 14:20) Nos tur a ser animá pa vigilá cuidadosamente con nos ta usa nos tempu, ya nos no ta exponé nos mes na tur sorto di maldad i asina ta evitá di ser contagiá cu nan. (Efe. 5:15-17) Tambe nos a haña animacion pa calculá cuantu tempu nos ta dedicá na lesa material cu no ta contribuí directamente na nos crecementu den comprendimentu di cosnan spiritual. Bo a haci esei? Kico e resultado a revelá? Fuera di lesa Bijbel tur dia, sea determiná pa lesa tur otro publicacion cu e organisacion ta percurá. Esaki lo yuda nos tur, incluso e hóbennan, pa “gana comprendimentu.”—Pro. 4:7-9.
10 “Beneficiá dor di Aplicá Principionan Bíblico cu Comprendimentu”: Esei tabata tema dje discurso final dje programa di e dia special di asamblea. E orador di bishita a splica cu Jehova ta e Fuente di comprendimentu cu ta duna bida, un comprendimentu cu ta infinitamente superior na esun di hende. Imaginá bo. Nos tin e oportunidad di haci uso di e comprendimentu di Jehova! Generosamente e ta duna e comprendimentu ei na ken cu sinceramente ta busk’é i ta pidi p’e cu fe. (Pro. 2:3-5, 9; 28:5) Abo ta probechando plenamente dje oferta aki?
11 Nos a ricibí e animacion pa siña identificá principionan ora nos ta lesa Bijbel. (2 Tim. 3:16, 17) Studia e principionan bíblico cuidadosamente pa asina bo por tin un conocimentu exacto di kico ta loke Jehova ta bisando. Tuma tempu pa meditá riba e principionan aki i mantené nan den bo mente i curason. Esaki lo entrená bo abilidad mental di distinguí, di manera cu bo por tin éxito ora di tuma decision den bida. (Hos. 1:8) Laga nos considerá un par di situacion cu hopi ruman ta confrontá, i wak con dor di aplicá principionan bíblico nos por tin éxito.
12 ‘Mi mester imitá un cierto estilo di bisti i peña?’ E mundu su moda actual pa loke ta paña i peñá hopi bes ta reflehá un spiritu di rebelion. E spiritu ei ta influenciá hende pa bisti con-cu-ta i di un forma inatractivo of sexy. Cua principionan bíblico relevante lo yuda nos contrarestá tal tendencia? Si nos a entrená nos abilidad mental di distinguí, nos lo tene cuenta cu e principio na 1 Timoteo 2:9 i 10 cu ta bisa pa bisti “cu modestia i sano huicio . . . , den e manera cu ta pas pa [hende] cu ta profesá respet profundo na Dios.” Otro principionan cu ta aplicá ta entre otro esnan mencioná na 2 Corintionan 6:3 i Colosensenan 3:18 i 20.
13‘Kico mi por haci pa mantené e lasonan di mi famia fuerte?’ Bon comunicacion entre miembronan di famia ta vital. Santiago 1:19 ta bisa nos: “Tur hende mester ta lihé pa tende, slow pa papia, slow pa rabia.” Miembronan di famia tin cu scucha otro i tambe papia cu otro, pasobra comunicacion den famia ta encerá duna (papia) i tuma (scucha). Asta ora loke nos bisa ta berdad, ta probabel cu lo e haci mas daño cu bon si nos expres’é den un manera cruel, orguyoso of insensibel. P’esei, sea cu nos ta esposo of esposa, mayor of yu, nos mester laga nos abla ta ‘semper cu gracia, sasoná cu salu.’—Col. 4:6.
14 ‘Mi ta ser influenciá dor di materialismo?’ Materialismo ta un preshon mundano cu ta haci hende su bida complicá. E no ta habri e porta pa felicidad. (Ecl. 5:10; Luc. 12:15; 1 Tim. 6:9, 10) Pa yuda nos evitá e trampa di materialismo, Jesus a siña nos e principio importante aki: Mantené un wowo simpel. Pa nos hiba un bida balansá i ménos complicá nos tin cu enfocá nos wowo riba interesnan di Reino, poniendo tur otro cos na di dos lugá.—Mat. 6:22, 23, 33.
15 Loke Mester Ta Nos Meta: E Palabra di Dios ta un fuente confiabel di principionan hustu cu por guia nos ora di tuma decision. Nos tin cu siña e principionan aki, meditá riba nan i comprendé con pa aplicá nan den nos bida. Pues, dor di ‘entrená nos facultadnan perceptivo pa distinguí tantu loke ta bon como loke ta malu,’ nos lo beneficiá nos mes i a la bes onra Jehova.—Heb. 5:14.