Preshon di Pareunan i Bo Privilegio di Predicá
1 Preshon di pareunan ta un influencia poderoso, pa bon of pa malu. Rumannan cu ta sirbi Jehova huntu cu nos, ta ehercé un influencia positivo cu ta incitá nos na obranan cristian excelente. (Heb. 10:24) Sin embargo, miembronan di famia cu no ta Testigo i tambe coleganan di trabou, compañeronan di scol, bisiñanan of otro conocínan por pone preshon riba nos pa sigui un rumbo cu ta contrali na principionan cristian. Kisas nan ta papia “cu menosprecio di [nos] bon conducta en relacion cu Cristo.” (1 Ped. 3:16) Con nos por mantené nos determinacion pa sigui predicá apesar dje preshon negativo di nos pareunan cu kisas nos ta confrontá?
2 Miembronan di Famia: Tin biaha, un esposo i tata cu no ta Testigo di Jehova kisas no kier pa su casá i yunan participá den e ministerio público. Esaki tabata e caso di un famia na México. Un homber su esposa i shete yunan a drenta e berdad. Na principio e tabata contra pasobra e no tabata kier pa su famia predicá i ofrecé literatura bíblico di cas pa cas. El a haña cu esaki tabata bou di nan nivel. Sin embargo, su esposa i yunan a para firme den nan decision pa sirbi Jehova i a sigui participá cu regularidad den e ministerio. Cu tempu, e homber a cuminsá mira e balor di aceptá Dios su areglo pa haci e trabou di predicá, i e tambe a dedicá su mes na Jehova. A tum’é 15 aña pa aceptá e berdad, pero hamas lo el a haci esei si su famia no a perseverá den nan privilegio di predicá?—Luc. 1:74; 1 Cor. 7:16.
3 Coleganan di Trabou: Bo esfuerso pa duna testimonio na coleganan di trabou kisas no ta cai den bon tera cerca algun di nan. Un ruman muher a conta cu un biaha cu un discusion tocante fin di mundu a surgi den oficina, nan a haci bofon di dje pasobra el a sugerí pa nan lesa Mateo capítulo 24. Sin embargo, un par di dia despues, un di su coleganan a bis’é cu el a lesa e capítulo i a keda impresioná. E ruman a laga un publicacion cuné i a haci areglo pa conducí un studio di Bijbel cu e colega i su casá. E promé studio a dura te dos or di mardugá. Despues dje di tres studio, nan a cuminsá asistí na reunion, i djis despues nan a stop di huma i a cuminsá participá den e ministerio. Esaki lo a sosodé si nos ruman muher no a haci ningun esfuerso pa compartí su speransa cu otronan?
4 Compañeronan di Scol: No ta inusual cu hóbennan Testigo ta sinti preshon di nan pareunan na scol i cu nan tin miedu cu otro hóbennan lo menospreciá nan pasobra nan ta participá den e trabou di predicá. Un tiener cristian na Merca a bisa: “Mi tabatin miedu di predicá na otro hóbennan pasobra mi tabatin miedu cu nan lo tenta mi.” Pues, e tabata bula pipa pa oportunidadnan pa duna testimonio na su pareunan na scol i den teritorio. Con abo por desaroyá e fortalesa pa enfrentá preshon di bo pareunan cu curashi? Confia den Jehova, i busca su sonrisa di aprobacion. (Pro. 29:25) Sea orguyoso di bo abilidad di por usa e Palabra di Dios den bo ministerio. (2 Tim. 2:15) E hóben cu nos a caba di cita a cuminsá haci oracion na Jehova, pidiend’e pa yud’é cultivá e deseo pa papia cu su compañeronan di scol. El a cuminsá duna testimonio informal na scol, tabatin bon resultado i pronto e tabata papia cu tur hende cu e conocé. El a concluí: “E muchanan ei tin mester i kier un speransa pa futuro, i Jehova ta usando nos pa yuda nan.”
5 Bisiñanan: Podisé nos tin bisiñanan of otro conocínan cu ta trata nos un poco iritá debí na ken nos ta i debí na nos creencianan. Si bo ta teme loke nan ta pensa, puntra bo mes: ‘Nan conocé e berdad cu ta hiba na bida eterno? Kico mi por haci pa alcansá nan curason?’ Un superintendente di circuito a comentá cu e rumannan ta logra bon resultado ora nan duna nan bisiñanan testimonio tiki-tiki i regular. Roga Jehova p’e duna bo e fortalesa i sabiduria necesario pa sigui busca esnan di curason onrado.—Fil. 4:13.
6 Opositornan kisas lo keda contentu si nos entregá na preshon negativo di nos pareunan, pero esei lo ta na nan mihó interes—of di nos? Jesus a ricibí oposicion di hende di su propio comunidad. El a asta soportá remarkenan skerpi di su mitar rumannan. Pero e tabata sa cu e por a yuda nan solamente dor di keda fiel na e curso cu Dios a fiha p’e. P’esei, Jesus “a wanta tal papiamentu contrario di pecadónan contra nan propio interes.” (Heb. 12:2, 3) Nos tin cu haci mescos. Sea decididu pa haci e mihó uso posibel di bo privilegio di predicá e mensahe di Reino. Dor di haci esei, “lo bo salba tantu bo mes como esnan cu ta scucha bo.”—1 Tim. 4:16.