“Laga Boso Lus Briya”
1 E mundu rond di nos ta den scuridad moral i spiritual. E lus dje berdad ta saca na cla e “obranan infructífero” di scuridad di manera cu nos por evitá e tropiesonan mortal aki. P’esei apostel Pablo a urgi cristiannan: “Sigui cana como yunan di lus.”—Efe. 5:8, 11.
2 “E fruta di lus” ta na contraste skerpi cu e scuridad di mundu. (Efe. 5:9) Pa producí e clase di fruta aki nos mester ta ehempelnan sobresaliente dje estilo di bida cristian, e clase di hende cu Jesus ta aprobá. Tambe nos tin cu desplegá cualidadnan manera sirbi di henter alma, sinceridad i entusiasmo pa e berdad. Nos tin cu manifestá e frutanan aki den nos bida diario i den nos ministerio.
3 Briya na Tur Oportunidad: Jesus a bisa su disipelnan: “Laga boso lus briya dilanti hende.” (Mat. 5:16) Imitando Jesus, nos ta reflehá Jehova su lus dor di predicá tocante e Reino di Dios i Jehova su propósitonan. Nos ta briya como iluminadó ora nos ta bishitá cas di hende i ora nos ta plama e berdad na trabou, na scol, cerca nos bisiñanan of na cualkier otro lugá cu nos haña e oportunidad.—Fil. 2:15.
4 Jesus a bisa cu algun hende lo odia e lus. (Juan 3:20) P’esei nos no ta desanimá ora cu mayoria hende ta nenga di laga “e iluminacion dje glorioso bon nobo tocante Cristo” yega na nan. (2 Cor. 4:4) Jehova ta lesa curason di hende i e no kier practicadónan di inhusticia den su pueblo.
5 Ora nos ta sigui e camindanan di Jehova i ta disfrutá di lus spiritual, nos por refleh’é na otro hende. Si nan ripará na nos conducta cu ta nos ta “poseé e lus di bida,” anto tal bes nan tambe por ser motivá pa haci e cambionan necesario pa bira cargadónan di lus.—Juan 8:12.
6 Dor di laga nos lus briya, nos ta duna alabansa na nos Creador i ta yuda esnan sincero siña conoc’é i gana e speransa di bida eterno. (1 Ped. 2:12) Como cu ta nos tin e lus, laga nos us’é pa yuda otro hende mira con pa sali for di scuridad spiritual i producí e obranan cu ta pertenecé n’e lus.