“Laga Boso Lus Bria”

1. Ki privilegio nos tin?

¹ For di mainta ora solo sali te atardi ora e baha, e magnífiko rayonan di lus ta duna gloria na Yehova Dios. No ta e lus akí Hesus a animá su disipelnan pa nan tin, sino “e lus di bida.” (Juan 8:⁠12) Ta un gran privilegio ku nos tin e iluminashon spiritual akí, pero esei ta trese responsabilidatnan serio kuné. Hesus a instruí: “Laga boso lus bria dilanti di hende.” Si nos hasi esei, otro hende por benefisiá. (Mat. 5:⁠16) Mundu ta den skuridat spiritual. P’esei, awor mas ku nunka nos mester kompartí e lus akí ku otro hende! Kon nos por imitá Kristu den esei?

2. Kon Hesus a mustra ku ta importante pa kompartí e lus spiritual ku otro hende?

² Prediká: Hesus a usa su tempu, energia i rekursonan pa hiba e lus di bèrdat na hende den nan kas, riba plenchi públiko, riba tòp di seru i tur kaminda ku e por a haña nan. E tabata sa ku berdadero iluminashon spiritual ta trese benefisio duradero pa hende. (Juan 12:⁠46) Pa alkansá asta mas hende, Hesus a prepará su disipelnan pa nan ta “lus di mundu.” (Mat. 5:⁠14) Nan a laga nan lus bria pasobra nan a hasi bon na nan próhimo i a kompartí bèrdatnan spiritual ku nan.

3. Kon nos por mustra berdadero apresio pa e lus di e bèrdat?

³ E pueblo di Dios ta tuma e responsabilidat di “kana komo yunan di lus” na serio, i nan ta prediká tur kaminda ku nan por haña hende. (Efe. 5:⁠8) Si nos lesa Beibel òf otro publikashonnan kristian durante pousa na trabou òf na skol unda hende por wak nos, esei por habri kaminda pa un kòmbersashon bíbliko. Un ruman muhé hóben a hasi esei, i figurá bo el a kuminsá un estudio di Beibel i a laga buki ku 12 di su kompañeronan di klas!

4. Dikon nos bon kondukta ta ‘laga nos lus bria’?

⁴ Hasi Bon Obra: Nos ta laga nos lus bria tambe mediante nos bon kondukta. (Efe. 5:⁠9) Na trabou, na skol, i na lugánan públiko, nos kondukta kristian por hala atenshon di otro hende i asina krea oportunidat pa nos papia tokante Beibel. (1 Ped. 2:⁠12) Por ehèmpel, e bon komportashon di un mucha hòmber di sinku aña a pone ku su yùfrou di skol a manda yama su mayornan. El a bisa: “Nunka mi a yega di mira un mucha ku ta komprondé asina bon kiko ta bon i malu!” Sí, nos ministerio i bon kondukta ta atraé hende na “e lus di bida” i ta duna gloria na nos Dios.