No Vacilá pa Predicá!
1 Ora nos ta prepará pa bai predicá di cas pa cas, kisas e obstáculo mas grandi cu nos ta topa ta pa sali for di nos cas. Podisé e sintimentu di no ta cualificá ta pone nos vacilá pa sali bai papia e berdad cu “tur clase di hende.” (1 Tim. 2:4) Pero nos no mester vacilá pa predicá e bon nobo. Di con no?
2 Ta Jehova Su Mensahe: Jehova a comunicá su palabra via Bijbel. Ora nos hiba e mensahe aki na otro hende, nos ta transmitiendo su pensamentunan, no di nos mes. (Rom. 10:13-15) Ora hende rechasá e mensahe di Reino, eigenlijk ta Jehova nan ta rechasá. Sin embargo, nos no ta desanimá. Nos tin sigur cu e mensahe aki lo stimulá un reaccion faborabel cerca esnan cu ta anhelá un cambio den condicionnan mundial i cu ta conciente di nan necesidad spiritual.—Eze. 9:4; Mat. 5:3, 6.
3 Ta Jehova Ta Atraé Hende: Un persona cu a nenga di scucha nos den pasado kisas ta mas receptivo awor pasobra su circunstancianan a cambia i su curason a bira moli. Por ta awor Jehova ta expresá su bon boluntad na e persona ei i ta “atra’é.” (Juan 6:44, 65) Ora esaki sosodé, nos kier ta cla pa ser usá dor di Jehova i sigui e guia angelical pa haña personanan asina.—Rev. 14:6.
4 Dios Ta Duna Nos Su Spiritu: Spiritu santu ta capacitá nos pa papia “cu frankesa pa medio di autoridad di Jehova.” (Echo. 14:1-3) Si nos corda cu nos tin e apoyo poderoso aki den nos ministerio, nos lo no vacilá pa papia e berdad cu bisiña, colega, compañero di scol, famia of cu hende bon educá of ricu.
5 Jesus A Siña Nos Con: Jesus a usa pregunta cu ta stimulá pensamentu, ilustracionnan práctico i razonamentu bíblico. El a splica e berdad den un manera simpel, atractivo i di curason. E métodonan aki ainda ta esnan mihó awe. (1 Cor. 4:17) Kisas e marco di circunstancia den cua nos ta predicá ta varia, pero e poderoso mensahe di Reino ta keda mescos.
6 Nos tin e privilegio di ser usá dor di Jehova pa yuda hende den un manera único i vital. Laga nos no vacilá! Laga nos tin curashi i permití Jehova “habri un porta di expresion pa nos” di manera cu nos por papia e bon nobo cu otro hende.—Col. 4:2-4.