Mayornan, Entrená Boso Yunan for di Infansia
1 “Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.” (Pro. 22:6) Mayornan, si boso no kier pa boso yunan “apartá” nan mes for di e kaminda dje bèrdat, na ki tempu boso mester kuminsá entrená nan? For di infansia!
2 Ora Pablo a bisa ku Timoteo su edukashon spiritual a kuminsá “for di infansia,” e tabata kier men evidentemente for di ora el a nase. (2 Tim. 3:14, 15) Komo resultado, Timoteo a desaroyá bira un ekselente hòmber spiritual. (Fil. 2:19-22) Mayornan, boso tambe tin ku kuminsá duna boso yunan e entrenamentu ku nan mester “for di infansia,” pa asina nan ‘krese ku Yehova.’—1 Sam. 2:21, NW.
3 Duna Nan e Awa Ku Nan Tin Mester pa Krese: Meskos ku yu di mata tin mester di awa konstantemente pa nan por krese bira palunan imponente, asina mester saturá mucha di tur edat ku e awa dje bèrdat di Beibel pa nan por krese bira sirbidónan maduro di Dios. E manera prinsipal pa siña mucha e bèrdat i yuda nan kultivá un relashon estrecho ku Yehova ta dor di un studio di Beibel regular komo famia. Pero mayornan, tene kuenta ku e kapasidat di konsentrashon di kada yu. Pa mucha chikitu, probablemente lo ta mas efikas si boso tene vários seshon kòrtiku di instrukshon en bes di un par di seshon largu.—Deu. 11:18, 19.
4 Nunka balotá e potensial ku boso yunan tin pa siña. Konta nan historia tokante personahenan bíbliko. Laga nan pinta esenanan di Beibel òf aktua susesonan di Beibel. Hasi bon uso di nos videonan i oudiokasètnan, inkluso e dramanan di Beibel riba kasèt. Adaptá e studio di famia na e edat i abilidat di siña di boso yunan. E entrenamentu inisial lo ta di kosnan básiko, i na kantidatnan chikitu; pero segun ku e mucha ta krese, su entrenamentu mester bira mas ekstenso i progresivo. Hasi e dunamentu di instrukshon bíbliko animá i variá. Boso kier pa boso yunan siña “anhelá” e Palabra, pues hasi e studio mas sabroso posibel.—1 Ped. 2:2.
5 Enbolbé Nan den Kongregashon: Pone metanan progresivo pa boso yunan ya asina nan ta bira plenamente enbolbí den kongregashon. Kiko lo por ta nan promé meta? E mayornan di dos yu chikitu a bisa: “Tur dos a kuminsá haña entrenamentu pa sinta ketu den Salon di Reino.” Despues, yuda yunan komentá na reunion ku nan mes palabra i pone komo nan meta pa inskribí den e Skol di Ministerio Teokrátiko. Bon meta pa alkansá den sirbishi di fèlt ta pa ofresé tratado na porta, lesa un teksto bíbliko, presentá un revista i enbolbé e doño di kas den kòmbersashonnan signifikativo.
6 Ser un Ehèmpel di Entusiasmo: Boso yunan ta tende boso papia tur dia tokante Yehova i resa na dje? Nan ta mira boso studia su Palabra, asistí na reunion, partisipá den sirbishi di fèlt i haña deleite den hasi e boluntat di Dios? (Sal. 40:8) Ta esensial pa nan mira esei i pa boso hasi e kosnan aki huntu. Un yu muhé adulto a bisa di su mama, ku a lanta seis yu pa bira Testigu fiel: “Loke a impreshoná nos mas tabata Mami su mes ehèmpel—esei a bisa mas ku palabra.” Un mayor di kuater yu a bisa: “‘Yehova ta na promé lugá,’ no tabata djis ku palabra so, sino na e manera ku nos a hiba nos bida.”
7 Mayornan, kuminsá entrená boso yunan for di trempan, siña nan e bèrdat for dje Palabra di Dios, pone metanan progresivo pa nan i boso mes ser e mihó ehèmpel posibel. Boso lo keda kontentu di a hasi e kosnan ei!