Entrená Bo Yunan pa Bira Sirbidónan di Yehova
1. Kiko Salmo 148:12 i 13 ta impulsá mayornan kristian pa hasi?
1 Yehova ta invitá muchanan pa alab’é. (Sal. 148:12, 13) P’esei, mayornan kristian ta hasi mas ku djis siña nan yunan e bèrdatnan di Beibel i e leinan moral di Dios. Nan ta entrená nan tambe pa prediká e bon notisia. Kon mayornan por hasi esaki na un manera progresivo?
2. Kon e bon ehèmpel di mayornan por influensiá nan yunan?
2 Bon Ehèmpel: Hues Gideon a bisa su 300 hòmbernan: “Wak mi i hasi meskos.” (Hues. 7:17) Di naturalesa mucha ta wak nan mayornan i imitá nan. Un tata ta traha anochi, pero en bes di bai drumi ora e yega for di trabou djasabra mainta, e ta sali ku su yunan den sirbishi maske e ta hopi kansá. E ta siña su yunan sin bisa niun pia di palabra ku sirbishi di vèlt ta e kos di mas importante. (Mat. 6:33) Bo yunan ta mira bo partisipá ku goso den diferente rasgo di adorashon, manera hasi orashon, lesa Beibel, duna komentario na reunion i prediká? Ta klaru ku bo no por ta un ehèmpel perfekto. Pero si bo yunan ta mira ku abo ta diligente den sirbi Yehova, lo ta mas fásil pa nan reakshoná faborabel ora bo ta siña nan pa ador’é.—Deu. 6:6, 7; Rom. 2:21, 22.
3. Kua ta algun meta spiritual progresivo ku mayornan mester yuda nan yu pone i alkansá?
3 Metanan Progresivo: Mayornan ta hasi hopi esfuerso pa siña nan yunan kana, papia, bisti paña, etcetera. Segun ku e mucha ta logra kada un di e metanan akí e mayornan ta yuda e yu pone meta nobo su dilanti. Si e mayornan ta kristian, nan ta yuda nan yu pone i alkansá metanan spiritual tambe di akuerdo ku nan edat i abilidat. (1 Kor. 9:26) Bo ta siña bo yunan pa duna komentario den nan mes palabra i pa nan mes prepará nan partinan ku nan tin ku duna den e Skol di Ministerio Teokrátiko? (Sal. 35:18) Bo ta entrená nan pa partisipá den e diferente rasgonan di sirbishi? Bo ta pone e meta di boutismo i sirbishi di tempu kompletu nan dilanti? Bo ta hasi esfuerso pa yuda nan asosiá ku publikadónan gososo i entusiasmá ku lo enkurashá nan?—Pro. 13:20.
4. Kon yunan ta benefisiá ora nan mayornan kuminsá entrená nan den e ministerio for di chikitu?
4 E salmista a bisa: “O Dios, bo a siña mi for di mi hubentut; i te ainda mi ta deklará bo obranan maravioso.” (Sal. 71:17) Kuminsá entrená bo yunan for di chikitu pa bira predikadó. E fundeshi spiritual ku bo ta yuda nan pone lo benefisiá nan sigur pa henter nan bida!—Pro. 22:6.