Benefisiá Plenamente di e Kongreso di Distrito “Proklamadónan Seloso dje Reino”
1 Un Programa Ku Ta Duna Vigor: E programa di nos último kongreso di distrito a duna nos hopi estímulo! Nos tur a reuní ku e mesun propósito, esta, pa ekipá nos mes mihó pa proklamá e Reino di Dios ku selo. Bo ta kòrda kon e promé oradó a definí e verbo “proklamá”? Bo ta kòrda ki investigashon e diskurso “No Tene Miedu—Yehova Ta ku Nos” a animá nos pa hasi? Kua relato di bida bo a eksaminá te asina leu?
2 E simposio “Vários Prueba Ta Tèst e Kalidat di Nos Fe” a duna tres motibu prinsipal pakiko Yehova ta permití persekushon. Bo por splika kua nan ta? Ki base bíbliko nos tin pa mantené nos neutralidat kristian? Kiko e partinan aki a animá nos pa hasi komo preparashon pa problemanan ku por lanta debí na nos posishon neutral? Den ki manera nos awante fiel bou di prueba ta trese alabansa na Yehova?
3 Kua esenanan den e drama “Para Firme den Tempu Trabahoso” a fortalesé bo spesialmente? Kon nos por ta manera Yeremías?
4 E diskurso públiko, “E Esena dje Mundu Aki Ta Kambiando,” a menshoná kambionan importante ku lo bai tuma lugá pronto i ku lo introdusí e dia inspirador di temor di Dios. Bo ta kòrda kua nan ta? Ora bo tabata skucha e diskurso final, “Abundá den Bon Obra Komo Proklamadónan Seloso dje Reino,” kon bo a relashoná e informashon ku bo sirbishi personal?
5 Puntonan Importante pa Apliká: Manera e oradó a splika den e diskurso “Sea Gradisidu,” kon nos por mustra kuantu gradisidu nos ta na Yehova? Ken su selo e diskurso klave, “Selo Ta Stimulá Proklamadónan di Reino,” a animá nos pa imitá? Ki outo-eksaminashon el animá nos pa hasi?
6 E simposio “E Profesia di Mikéas Ta Fortifiká Nos pa Kana den e Nòmber di Yehova,” a enfatisá kua tres rekisitonan ku nos tin ku kumpli kuné pa nos risibí Yehova su aprobashon? Nos por kumpli ku nan? (Mik. 6:8) Segun e diskurso “Keda Moralmente Puru dor di Protehá Bo Kurason,” den ki maneranan nos mester keda moralmente limpi? Den ki áreanan e diskurso “Warda Bo di Engaño” a spièrta nos pa nos no ser gañá ni gaña otro hende?
7 Kua puntonan útil di e simposio “Proklamadónan di Reino Ku Ta Glorifiká Nan Ministerio,” bo a kuminsá apliká den bo sirbishi? E diskurso “Kòmbersashon Spiritual Ta Edifiká,” a analisá e teksto di Filipensenan 4:8. Kon e teksto aki ta yuda nos mantené nos kòmbersashon riba asuntunan spiritual, i ki ora esei ta nesesario?
8 E diskurso “Konfia Yehova Kompletamente den Tempu di Angustia” a mustra nos kon pa trata ku kontratempu manera susesonan trágiko, problemanan finansiero, malesa, problema di famia i debilidat persistente. Kon nos por mustra ku nos ta konfia den Yehova ora nos ta konfrontá e situashonnan aki?
9 Tesoronan Spiritual Nobo: Nos a keda kontentu ku e buki nobo Adorá e Úniko Dios Berdadero. Ki impreshon e anunsio ku a splika e propósito di e buki aki a kousa riba bo? Dikon lo e ta útil komo e segundo buki di studio den nos trabou di hasi disipel?
10 Despues nos a risibí e bunita buki Hala Serka Yehova. Kiko ta algun di su rasgonan spesial? Kua di e plachinan bo ta gusta mas? E echo ku bo a les’é a yuda bo hala mas serka Yehova? Ken mas lo por benefisiá di dje?
11 E Kongreso di Distrito “Proklamadónan Seloso dje Reino” a duna nos e animashon spiritual nesesario pa nos por enfrentá e tempu difísil aki. Pues pa nos benefisiá plenamente di e perkurashon spiritual maravioso aki, laga nos hasi nos bèst pa kòrda loke nos a tende, apresiá loke nos a risibí i apliká loke nos a siña. (2 Ped. 3:14) Esei lo duna nos mas forsa pa mantené nos integridat i ser proklamadónan seloso dje Reino, imitando nos Señor Hesukristu, na onor i gloria di Yehova.—Fil. 1:9-11.