Sea Diligente den ‘Duna Testimonio Kabal’
1 Meskos ku Hesus i hopi otro sirbidó fiel di pasado, apòstel Pablo tabata un predikadó seloso di e bon nobo, ‘dunando testimonio kabal’ sin importá e marko di sirkunstansia. Asta ora Pablo tabata bou di aresto di kas, e “tabata risibí tur ku tabata bin serka dje, i e tabata prediká e reino di Dios, i tabata siña e hendenan enkuanto Señor Hesukristu ku tur frankesa.”—Echo. 28:16-31.
2 Nos tambe por ta diligente den ‘duna testimonio kabal’ na tur okashon. Esaki ta inkluí duna testimonio na hende ku nos ta topa na kaminda ora di bai i ora di bini for di e Kongreso di Distrito “Duna Gloria na Dios,” i den e stat kaminda ta tene kongreso.—Echo. 28:23, NW; Sal. 145:10-13.
3 Dunamentu di Testimonio Insidental òf Informal? Tin un diferensia? Sí. Algu ku ta insidental ta sosodé simplemente pa kasualidat òf sin ku esei tabata e intenshon, komo si fuera e no tabata planiá òf e ta di poko importansia. Klaru ku no ta asina nos ta mira nos sirbishi. Meskos ku tabata e kaso ku Pablo, duna gloria na Dios mediante nos predikashon ta algu importante pa nos, i nos intenshon mester ta pa duna testimonio ki ora ku ta apropiá ora nos ta biaha durante e temporada di fakansi aki. Sin embargo, ta na su lugá pa deskribí e manera ku nos ta abordá hende komo un manera informal, es desir, relahá, amigabel i no-ofisial. E forma aki di aserká hende por duna bon resultado.
4 Prepará pa Duna un Testimonio: Pablo mester a krea oportunidat pa duna testimonio miéntras e tabata bou di aresto di kas na Roma. For di kaminda e tabata hospedá, el a tuma e inisiativa pa invitá e lidernan hudiu lokal pa bini na su kas. (Echo. 28:17) Ounke tabatin un kongregashon kristian na Roma, Pablo a haña sa ku e komunidat hudiu den e stat ei tabatin masha tiki informashon direkto di e fe kristian. (Echo. 28:22; Rom. 1:7) Pablo no a frena su mes di ‘duna testimonio kabal’ tokante Hesukristu i e Reino di Dios.
5 Pensa di antemano riba tur e hendenan ku lo bo por topa durante bo biahe, personanan ku kisas sa masha poko di Testigunan di Yehova. Podisé nan no sa mes ku nos ta ofresé studio di Beibel grátis. Paga bon tinu pa oportunidatnan pa duna testimonio na hende ku bo ta topa ora bo ta biahando, sea ora di relahá, kumpra gasolin, hasi kompra, na hotèl, na restorant, den transporte públiko, etcetera. Plania kiko lo bo por bisa pa kuminsá un kòmbersashon i pa duna un testimonio kòrtiku. Kisas den e dianan binidero bo por train esei dor di duna testimonio informal na bisiña-, famia-, kolega- i otro konosínan.
6 Lo bo tin mester di algun publikashon pa bo usa ora di duna testimonio informal. Kua publikashon? Lo bo por usa e tratado Lo Bo Kier Sa Mas Tocante Bijbel? Resaltá e promé sinku paragrafnan ku ta duna vários motibu pa lesa Beibel. Mustra e kupòn parti patras kaminda nan por pidi un studio di Beibel grátis. Ora bo topa un persona ku reakshoná bon, ofresé e foyeto Rekerí. Komo ku nos por ferwagt di topa hende ku ta papia otro idioma, kana ku e foyeto Bon Nobo pa Tur Nashon. Página 2 ta splika kon mester us’é pa duna un testimonio. Si bo ta biaha na outo, lo bo por tin algun otro publikashon básiko pa ofresé esnan ku mustra berdadero interes den e mensahe di Reino.
7 Paga Tinu na Bo Aparensia i Komportashon: Nos tin ku hasi sigur ku nos komportashon i tambe nos manera di bisti i nos areglo personal no ta duna hende un impreshon robes òf ta pone nan ‘papia kontra’ e organisashon di Yehova. (Echo. 28:22) Esaki ta apliká no solamente ora nos ta na kongreso sino tambe ora nos ta biaha i durante nos tempu liber despues di e programa. E Toren di Vigilansia di 1 di ougùstùs 2002, página 18, paragraf 14, a spièrta: “Nos aparensia no mester hala muchu atenshon na nos mes, ni [ta] ekstrabagante, provokativo, muchu sunú, ni duna e impreshon ku nos ta kore tras di moda. Ademas, nos moda di bisti mester mustra ku nos ‘ta teme Dios.’ Bon kos pa pensa ariba, no? E idea no ta pa nos bisti [na] drechi ora di asistí na reunion di kongregashon [òf seshon di kongreso], anto na otro okashon sí bisti pa loko numa. Semper nos aparensia personal mester reflehá un aktitut onorabel i respetuoso, pasobra ta 24 ora pa dia nos ta minister kristian.”—1 Tim. 2:9, 10.
8 Nos mester bisti moderá i ku dignidat. Si nos aparensia i komportashon semper ta reflehá nos kreensia den Dios, nunka nos lo no haña nos ta keda sin duna testimonio informal pasobra nos aparensia personal ta laga di deseá.—1 Ped. 3:15.
9 Testimonio Informal Ta Duna Fruta: Durante e dos añanan ku Pablo tabata bou di aresto di kas na Roma, el a mira bon resultado di su esfuerso pa duna testimonio. Lukas ta informá ku “algun tabata wòrdu konvensí dor di loke a wòrdu bisá.” (Echo. 28:24) Pablo mes a evaluá kon efektivo su ‘dunamentu di testimonio kabal’ tabata ora el a skirbi: “Loke a sosodé ku mi a resultá mas bien pa progreso di evangelio, asina ku mi kadenanan pa e kousa di Kristu a bira bon konosí den henter e guardia di palasio i na tur otro hende, i ku mayoria di e rumannan, konfiando den Señor pa motibu di mi kadenanan, tin muchu mas kurashi pa papia e palabra di Dios sin miedu.”—Fil. 1:12-14.
10 Aña pasá den zomer, despues di a pasa henter dia na un kongreso di distrito, un pareha tabatin un bunita eksperensia dunando testimonio informal na un weiter ku a puntra nan tokante nan bèch di kongreso. Nan a kont’é tokante e kongreso i tambe di e speransa ku Beibel ta ofresé pa futuro di humanidat. Nan a dun’é e tratado Lo Bo Kier Sa Mas Tocante Bijbel? i a splik’é di e areglo di un studio di Beibel grátis. E señora a bisa ku e tabata ke pa un hende bishit’é. El a yena su nòmber i adrès riba e kupòn parti patras di e tratado, i a pidi e pareha pa hasi e areglo. Abo tambe lo por tin un bunita eksperensia e aña aki dor di ta diligente pa ‘duna testimonio kabal’?
11 Promové e Bon Nobo Kabalmente: Imaginá bo kon felis Pablo lo tabata ora el a tende ku su rumannan kristian tabata imitá su ehèmpel seloso! Laga nos hasi tur loke ta na nos alkanse pa promové e bon nobo dor di duna testimonio informal tokante nos kreensianan basá riba Beibel segun ku nos tambe ta benefisiá di e kongreso di distrito binidero.
[Study Questions]
1, 2. Kiko ta impreshoná bo di e manera ku Pablo a mira predikashon di e bon nobo, i kon nos por imitá su ehèmpel di ‘duna testimonio kabal’?
3. Kon nos por evitá ku nos dunamentu di testimonio informal ta bira solamente un esfuerso insidental?
4. Kiko a hasi posibel ku Pablo por a duna testimonio kaminda e tabata hospedá?
5, 6. Ki oportunidatnan kisas nos tin pa duna testimonio informal, i kon nos por prepará pa por hasi esei efikasmente?
7, 8. Ki spièrtamentu tokante nos aparensia personal i nos komportashon nos mester hasi kaso di dje ora nos ta biaha i durante nos tempu liber?
9. Ki éksito Pablo tabatin dunando testimonio na Roma?
10. Ki bunita eksperensia un pareha tabatin aña pasá den zomer dunando testimonio?
11. Ki kualidatnan nos mester desaroyá pa nos por promové e bon nobo e temporada aki di fakansi dor di ‘duna testimonio kabal’?
[Box on page 3]
Publikashonnan Nesesario pa Duna Testimonio Informal
■ Lo Bo Kier Sa Mas Tocante Bijbel? (tratado)
■ Kico Dios Ta Rekerí di Nos? (foyeto)
■ Bon Nobo pa Tur Nashon (foyeto chikí)
■ Otro publikashonnan básiko
[Box on page 4]
No Lubidá Nan!
No lubidá ken? Tur e personanan interesá ku a asistí na e Konmemorashon di e morto di Kristu òf na e diskurso spesial. Nos a invitá nan pa asistí na e kongreso di distrito di e aña aki? Si nos animá nan na un manera suave, probablemente hopi di nan lo asistí. Segun ku nan ta disfrutá di e asosiashon edifikante ku tin na kongreso i di e programa spiritual alentador, nan lo ser atraí mas serka di Yehova i su organisashon. Pakiko bo no ta invitá nan i wak kiko ta pasa? Duna nan tur e detayenan nesesario, inkluso e fecha di kongreso, instrukshon kon pa yega na e lugá di kongreso, e ora ku e seshonnan ta kuminsá i terminá, i un deskripshon di loke e programa ta kome i bebe ku bo ta haña riba e kaft patras di e edishon di Spièrta! di 8 di yüni 2003.