“Duna Testimonio Kabal”

1. Ki bon ehèmpel apòstel Pablo a pone den sirbishi?

¹ “Kumpli ku bo sirbishi kabalmente.” (2 Tim. 4:5) Apòstel Pablo por a duna Timoteo e konseho ei pasobra e por a papia ku frankesa. De echo, entre aña 47 pa aña 56 di nos era, Pablo a realisá tres biahe komo misionero. Vários biaha e buki di Echonan ta menshoná ku Pablo a duna “testimonio kabal.” (Echo. 23:11; 28:23) Kon nos tambe por hasi esei?

2. Kon nos por duna testimonio kabal ora nos ta prediká di kas pa kas?

² Di Kas pa Kas: Pa nos por logra papia ku hende ku nunka sa ta na kas ora nos pasa pa papia di e bon notisia, nos lo tin ku bishitá nan na un otro ora di dia. Por ehèmpel, pa nos haña e kabesnan di famia, nos tin ku prediká sea atardi òf den wikènt. Nos mester keda bai bèk na kasnan kaminda nos no a haña hende te ora nos haña un hende pa papia kuné. Pero kiko si apesar di tur bo esfuersonan bo no logra haña hende na un kas? Un karta òf yamada di telefòn por duna bon resultado.

3. Ki oportunidat abo tin pa duna testimonio tantu públikamente komo informalmente?

³ Públikamente i Informalmente: Sirbidónan di Yehova djawe ta prediká e berdadero sabiduria na ken ku ke skucha. Tin biaha esei ta sosodé riba ‘skina di kaya’ òf riba “plenchi” públiko. (Pro. 1:20, 21) Ora nos ta hasi nos kosnan di tur dia, nos ta kòrda duna testimonio? Nos por bisa ku nos ta ‘dediká nos mes kompletamente na prediká e palabra di Dios’? (Echo. 18:5) Si ta asina, anto nos ta kumpliendo ku nos obligashon di “duna testimonio kabal.”—Echo. 10:42; 17:17; 20:20, 21, 24.

4. Kon orashon i meditashon ta yuda nos duna testimonio kabal?

⁴ Ma por sosodé ku pa motibu di timides òf falta di kurashi, nos por keda sin duna testimonio. Nos por ta sigur ku Yehova ta komprondé nos limitashonnan. (Sal. 103:14) Pero ora un situashon asina presentá, nos por pidi Yehova pa e duna nos kurashi. (Echo. 4:29, 31) Tambe nos por pone komo meta pa ora nos ta hasi nos estudio personal i ta meditá riba e Palabra di Dios, nos haña mas apresio pa e bon notisia i realisá kuantu balor e tin. (Flp. 3:8) Esei lo motivá nos pa prediká e bon notisia ku entusiasmo.

5. Kon nos por partisipá den kumplimentu di e profesia di Yoël?

⁵ E profesia di Yoël ta bisa ku promé ku e dia grandi i temibel di Yehova bini, e pueblo di Dios lo sigui “marcha” padilanti i lo no laga nada stroba nan di prediká. (Yoël 2:2, 7-9) Laga nos hasi tur loke nos por den e trabou di prediká akí ku nunka mas lo ser ripití.