Imitá Yehova Su Bondat
1 Despues di a disfrutá di un bunita bahada di solo òf di un kuminda sabroso, nos no ta sinti nos impulsá pa gradisí Yehova, e Fuente di tur bondat? Su bondat ta lanta den nos e deseo di imit’é. (Sal. 119:66, 68, NW; Efe. 5:1) Kon nos por desplegá e kualidat di bondat?
2 Bondat pa ku Hende Inkrédulo: Un manera ku nos por imitá Yehova su bondat ta dor di mustra interes sinsero den hende ku no ta di nos famia di fe. (Gal. 6:10) Mustrando bondat den maneranan práktiko por tin un bon efekto riba kon hende asina ta mira Testigunan di Yehova i e mensahe ku nos ta hiba.
3 Por ehèmpel, un pionero hóben tabata sintá den sala di espera na un poliklínika banda di un señora hende grandi ku a parse mas malu ku e otro hendenan presente. Ora e ruman hòmber su bùrt a yega pa drenta serka dòkter, el a laga e señora bai na su lugá. Despues el a bolbe topa e señora, e biaha aki na plasa, i e señora a keda masha kontentu di mir’é. Ounke anteriormente e no tabata dispuesto pa tende e bon nobo, el a bisa ku awor e sa ku Testigunan di Yehova di bèrdat ta stima nan próhimo, i nan a kuminsá un studio di Beibel regular kuné.
4 Bondat pa ku Nos Rumannan: Tambe nos ta imitá Yehova su bondat ora nos ta hasi tur esfuerso pa yuda nos rumannan den fe. Ora desasternan tuma lugá, nos ta entre e proménan ku ta sali na yudansa di nos rumannan. Nos ta demostrá e mesun aktitut ora nos ta yuda esnan ku tin mester di transpòrt pa bai reunion, ta bishitá esnan enfermo i ta ekspandé den mustra kariño na esnan ku nos no konosé bon den kongregashon.—2 Kor. 6:11-13; Heb. 13:16.
5 Un otro manera ku Yehova ta demostrá bondat ta dor ku e ta “kla pa pordoná.” (Sal. 86:5) Imitando Yehova, nos por demostrá nos amor pa bondat dor di pordoná otro hende. (Efe. 4:32) Esaki ta yuda hasi nos asosiashon ku nos rumannan den fe algu ‘bon i dushi.’—Sal. 133:1-3.
6 Laga Yehova su bondat abundante motivá nos pa alab’é ku ánimo i bira radiante ku goso. I lag’é motivá nos tambe pa hasi esfuerso pa imitá su bondat den tur loke nos hasi.—Sal. 145:7; Jer. 31:12.