Skol di Entrenamentu Ministerial—Un Porta Hanchu Ku Ta Hiba na Aktividat
1 Mediante profeta Jeremias, Yehova a profetisá: “Lo mi pone wardadónan riba [mi pueblo] i nan lo kuida nan. Nan lo no tin miedu ni spantu mas, i lo no falta ni un.” (Jer. 23:4) E trabou di wardadó òf di pastoriá ei ta tumando lugá awe entre hendenan di tur nashon. Tin desénas di míles di ansiano di kongregashon ku ta hasié. Ademas, tin un grupo di hòmbernan hóben, na gran kantidat manera gotanan di serena, ku a ofresé nan mes boluntariamente den e sirbishi di Yehova. (Sal. 110:3) E ruman hòmbernan humilde aki ta un berdadero bendishon pa e pueblo di Dios. Segun ku e trabou di rekohementu spiritual ta sigui, tin mas nesesidat pa hòmbernan kualifiká ku por hasi nan mes disponibel pa sirbi nan rumannan.
2 E Skol di Entrenamentu Ministerial ta un ekselente areglo pa entrená ansiano- i sirbidónan ministerial soltero pa aseptá mas responsabilidat. For di tempu ku e skol aki a kuminsá na 1987, mas ku 22.000 studiante for di mas o ménos 140 pais a risibí entrenamentu den e 999 klasnan ku tabatin. Pa e rumannan aki, e skol a resultá di ta “un porta hanchu” ku ta hiba na aktividat.—1 Kor. 16:9.
3 E Propósito di e Skol: E meta di e Skol di Entrenamentu Ministerial ta pa train i ekipá hòmbernan kualifiká pa karga responsabilidat unda ku por tin nesesidat den e organisashon. E skol ta oumentá nan abilidatnan di hiba delantera den e trabou di evangelisá, di pastoriá e tou i siña den e kongregashon. Despues ku e studiantenan gradua, algun di nan ta ser asigná komo pionero spesial òf komo superintendente biahero na nan paisnan natal òf den eksterior. Otronan ta risibí e asignashon pa sirbi den e kongregashon ku nan a bini for di dje òf den áreanan ku tin mas nesesidat den e teritorio di nan sukursal.
4 Durante e kurso di ocho siman, e studiantenan ta hasi un studio intensivo di Beibel. Kuidadosamente nan ta konsiderá un gran variedat di siñansa bíbliko i tambe e responsabilidatnan di un wardadó i prinsipionan pa trata ku problemanan den un bida kristian. Tambe nan ta siña loke e Skritura ta bisa tokante asuntunan atministrativo, hudisial i di organisashon. Nan ta risibí training spesialisá pa papia den públiko i nan ta haña tambe yudansa personal pa aselerá nan desaroyo spiritual.
5 Rekisitonan: Ta di komprondé ku e rekisitonan pa un persona asistí na e skol ta haltu. Esnan ku ke apliká pa bai e skol mester a sirbi komo ansiano òf sirbidó ministerial pa por lo ménos dos aña konsekutivo. Nan mester ta soltero i entre 23 pa 50 aña di edat. Nan mester por lesa, skirbi i papia e idioma den kua e skol ta ser kondusí ku fluides, i nan mester ta di bon salú i no ta hende ku tin mester di un dieta òf kuido spesial. Ta duna preferensia na esnan ku ta den e sirbishi di pionero regular.
6 Esnan ku ofresé nan mes boluntariamente, mester ta dispuesto i kapas pa sirbi unda ku tin mester di nan. Esaki ta rekerí un aktitut manera esun di profeta Isaias, kende ansiosamente a ofresé su mes pa hasi un trabou spesial, bisando: “At’ami aki! Manda ami!” (Isa. 6:8) Tambe el a demostrá humildat atraves di henter su bida. Loke mester motivá esnan ku ta pone nan mes disponibel pa e Skol di Entrenamentu Ministerial ta amor pa nan rumannan i un deseo pa sirbi nan, i no un deseo pa prominensia òf un status spesial. Despues ku e graduadonan risibí e ekselente entrenamentu ei, ta ser sperá di nan pa nan apliká loke nan a siña pa benefisiá otro hende.—Luk. 12:48.
7 Benefisionan: Durante e ocho simannan di entrenamentu intensivo, e graduadonan ta ser “alimentá ku e palabranan di e fe i di e doktrina sano.” (1 Tim. 4:6) Esaki ta ekipá nan pa yuda i animá otronan den e kongregashon- i sirkuitonan ku nan a ser asigná. Na hopi sitio kaminda graduadonan di e Skol di Entrenamentu Ministerial a ser asigná, e aktividat di sirbishi di vèlt a oumentá; mas ruman a sinti nan animá pa drenta e sirbishi di pionero, foral hóbennan; i hopi hende nobo ku a kuminsá asosiá ku e pueblo di Dios a risibí mas atenshon personal.
8 Bo ta un ansiano òf sirbidó ministerial soltero entre 23 pa 50 aña di edat? Pakiko no konsiderá e posibilidat di apliká pa e Skol di Entrenamentu Ministerial? Bo ta un ruman hòmber hóben ku ta pensando riba bo metanan pa futuro den e sirbishi di Yehova? Pakiko no mantené bo bida simpel sin distraishon pa asina bo por drenta e “porta hanchu” aki ku ta hiba na aktividat? E por duna bo hopi goso i satisfakshon. Sí, e Skol di Entrenamentu Ministerial a duna prueba di ta un bendishon no solamente pa graduadonan di e skol sino tambe pa e kongregashonnan di e pueblo di Dios rònt mundu.
[Picture on page 3]
Kon e Entrenamentu A Benefisiá Nan
“E training aki a ègt mehorá mi ministerio i mi abilidat di pastoriá ku sabiduria, usando e Skritura.”
“E skol a duna mi hopi mas konfiansa pa trata ku e vários responsabilidatnan ku mi tin den kongregashon.”
“El a kambia kasi tur aspekto di mi bida, asta e manera ku mi ta pensa di e teokrasia i di Dios su organisashon.”
“E training ku mi a risibí a yuda mi realisá ku mi mester pone mi mes disponibel pa sirbi na unda ku tin nesesidat.”