Mustra Interes Personal—Dor di Ser Adaptabel
1 Apòstel Pablo tabata un ekselente ehèmpel di semper adaptá su presentashon di e bon nobo na e background i manera di pensa di su ouditorio. (1 Kor. 9:19-23) Nos mester purba hasi meskos. Hopi bes, dor di plania un poko di antemano, nos lo por adaptá e presentashonnan rekomendá den Nos Ministerio di Reino na e nesesidatnan di e hendenan den nos teritorio. Segun ku nos ta aserká un porta, nos por tuma nota di kosnan ku ta indiká loke ta interesá e doño di kas i inkorporá esakinan den nos presentashon. Sin embargo, tin un otro manera tambe ku nos por ta adaptabel den nos ministerio.
2 Adaptá Nos Presentashon na Loke e Doño di Kas Bisa: Hopi biaha ora nos ta presentá e bon nobo, nos ta hasi un pregunta i ta invitá e doño di kas pa kontestá. Kon bo ta mira e kontesta di e doño di kas? Bo ta inkliná na djis aseptá superfisialmente loke el a bisa i sigui gewon ku e presentashon ku bo a prepará? Òf loke bo ta bisa ta mustra ku bo ta tuma na kuenta e komentario di e doño di kas? Si bo demostrá un interes sinsero den loke otro hende ta bisa, lo bo por haña oportunidat pa hasi pregunta adishonal ku takto pa saka afó kiko realmente ta preokupá nan. (Pro. 20:5) Dje manera ei lo bo por enfoká riba e aspektonan di e mensahe di Reino ku ta trata mas direktamente ku e preokupashonnan di bo oyente.
3 Pa por hasi esaki nos mester ta dispuesto pa papia riba temanan fuera di loke nos a plania originalmente pa papia riba dje. Por ehèmpel, si nos a kuminsá ku komentá riba un problema ku a sali den notisia, i e doño di kas menshoná un asuntu lokal òf personal ku ta preokup’é, nos interes sinsero pa satisfasé e nesesidatnan di e doño di kas lo motivá nos pa konsentrá e kòmbersashon bíbliko riba loke ta mas importante p’e.—Fil. 2:4.
4 Adaptá Nos Forma di Trata ku Pregunta: Ora ku e doño di kas hasi un pregunta, lo por ta probechoso pa sigui ku e kòmbersashon na un otro ora, despues ku nos a haña chèns di buska informashon adishonal riba e tópiko. Tambe nos por ofresé publikashonnan ku ta konsiderá e tópiko mas kabalmente. Tur esaki ta indiká ku nos ta realmente interesá den yuda otro hende siña konosé Yehova.—2 Kor. 2:17.