Hóbennan Ku Ta Bria Manera Lus
1 Hesus a bisa su disipelnan: “Boso ta e lus di mundu.” (Mat. 5:14, 16) Nan mester a sobresalí meskos ku un stat situá riba tòp di un seru, briando den e lus di solo. Awe hopi hóben kristian ta “bria manera lusnan den mundu” dor di nan kondukta rekto i entusiasmo den e trabou di prediká.—Fil. 2:15; Mal. 3:18.
2 Na Skol: Kon lo bo por duna testimonio na skol? Algun hóben a probechá dje oportunidat ora nan klas tabata trata temanan manera droga, evolushon i Holokousto, djis pa menshoná algun. Un ruman muhé a usa e òpstèl ku e mester a traha tokante terorismo pa duna testimonio tokante Dios su Reino komo e berdadero speransa pa humanidat. Su maestra a keda impreshoná ku e òpstèl bon pensá aki, i esaki a habri kaminda pa e por a duna mas testimonio.
3 Un otro manera pa bria manera lus ta mediante bo kondukta, bo bistí i areglo personal modesto. (1 Kor. 4:9, NW; 1 Tim. 2:9) Ora e studiante- i maestronan mira ku bo komportashon ta diferente, esaki por atraé algun di nan na e bèrdat i duna bo oportunidat pa kompartí bèrdatnan bíbliko ku nan. (1 Ped. 2:12; 3:1, 2) Podisé no ta fásil pa bo tin un kondukta ku ta reflehá deboshon na Dios, pero Yehova lo bendishoná bo rikamente. (1 Ped. 3:16, 17; 4:14) Pa lanta interes di otronan den e bon nobo, kisas bo por lesa literatura bíbliko durante pousa òf laga nan kaminda otronan por mira nan.
4 Ora bo ta laga bo lus bria na skol, esaki ta fortalesé bo fe i ta yuda bo sinti bo orguyoso di ta un sirbidó di Yehova. (Jer. 9:24) Tambe e ta sirbi komo un protekshon. Un ruman muhé a bisa: “Un di e benefisionan di papia tokante mi kreensianan ta ku e alumnonan no ta purba pone preshon riba mi pa hasi kosnan ku no ta na armonia ku loke Beibel ta bisa.”
5 Oumentá Bo Sirbishi: Un otro manera ku hopi hóben ta bria manera lus ta dor di ekspandé nan ministerio. Despues ku un ruman hòmber a kaba skol sekundario, el a muda bai sirbi kaminda tin mas nesesidat pa proklamadónan di Reino. E tabata den un kongregashon chikitu ku tabatin un ansiano so. El a skirbi un amigu: “Mi ta pasando e mihó momentonan di mi bida aki. E ministerio ta hopi refreskante! Nos ta papia rònt di 20 minüt na kada kas pasobra e hendenan ke tende tur loke bo tin di bisa nan.” El a agregá: “Mi tin masha gana pa tur hóben hasi algu asin’aki i sinti loke ami ta sinti. No tin nada mas mihó ku sirbi Yehova ku tur loke nos tin.”
6 Hóbennan, nos ta masha orguyoso di boso ku ta bria manera lusnan den mundu! (1 Tes. 2:20) Segun ku boso ta sirbi Yehova ku henter boso kurason, alma, mente i forsa, boso lo kosecha “shen bes mas tantu den e tempu aki . . . i den e siglo ku ta bin, bida eterno.”—Mar. 10:29, 30; 12:30.
[Study Questions]
1. Kon Beibel ta indiká ku kristiannan mester ta diferente, i kon e palabranan aki ta apliká na hóbennan kristian awe?
2. Menshoná algun manera ku bo por duna testimonio na bo maestro- i kompañeronan di klas.
3. Kon bo por laga bo lus bria na skol mediante bo kondukta?
4. Kiko ta algun benefisio di duna testimonio na skol?
5. (a) Kon algun hóben ta ekspandé nan ministerio? (b) Ki meta spiritual abo tin?
6. Kiko bo ta apresiá di e hóbennan den bo kongregashon?