Kultivá Bon Kustumbernan, Kosechá Hopi Bendishon
1 Na prinsipio ora bo a bira kristian, probablemente bo tabata hasi hopi esfuerso pa desaroyá un rutina sano di aktividatnan spiritual. Esaki a konsistí di estudio di Beibel, asistensia na reunionnan kristian, partisipashon den sirbishi i hasimentu di orashon. Komo resultado di Yehova su bendishon riba bo esfuersonan, bo a krese spiritualmente. Kisas awor bo tin vários aña batisá. Bo ta manteniendo e bon kustumbernan spiritual ku bo a desaroyá tempu ku bo a bira kristian?
2 Analisá Bo Rutina Spiritual: Bo tin e kustumber di lesa un porshon di e Palabra di Dios tur dia? Dor di hasi esei nos ta kosechá hopi bendishon! (Jos. 1:8; Sal. 1:2, 3) Den Israel di antigwedat, kada rei mester a lesa su kopia di e Lei “tur e dianan di su bida.” Kiko tabata e benefisionan di esaki? E rei lo a desaroyá un kurason humilde i siña teme Yehova p’e no apartá for di Su mandamentunan. (Deu. 17:18-20) Asina tambe awe, e kustumber di lesa Beibel diariamente ta yuda nos keda sin mancha i inosente meimei di e mundu malbado i korupto aki. Ademas, e ta yuda nos pa ta bon ekipá pa e ministerio.—Fil. 2:15; 2 Tim. 3:17.
3 Hesus tabatin e kustumber di bai snoa kaminda nan tabata konsiderá e Skritura. (Luk. 4:16) Sin duda esaki a fortifik’é p’e wanta e pruebanan ku e mester a pasa aden. Nos tambe ta haña fortalesa for di instrukshonnan spiritual ku nos ta risibí na e reunionnan di kongregashon i e “interkambio di estímulo” sano ta fortalesé nos tambe. (Rom. 1:12, NW) Reunimentu huntu ku nos rumannan ta yuda nos soportá e difikultatnan di e último dianan aki. (Heb. 10:24, 25) Ainda bo tin e kustumber di asistí na e reunionnan?
4 E registro inspirá ta konta nos ku e apòstelnan a kompartí e bon nobo ku hende “tur dia, den tèmpel i di kas pa kas.” (Echo. 5:42) Ounke nos kisas no por prediká tur dia, nos por hasié un kustumber pa partisipá tur siman den un òf otro forma di e ministerio? Esei sigur lo yuda nos bira mas ábil den manehá e Palabra di Dios, i nos lo tin hopi chèns di disfrutá di eksperensianan animante ora nos ta kompartí bèrdat bíbliko ku otro hende.
5 Profeta Daniel a haña hopi bendishon p’e echo ku el a sirbi Yehova “konstantemente” henter su bida. Esaki a enserá su kustumber di hasi orashon regularmente na Yehova. (Dan. 6:10, 16, 20) Di mes manera, segun ku nos ta akudí na Yehova regularmente mediante orashon sinsero, lo e bendishoná nos ku su spiritu santu. (Luk. 11:9-13) Ademas di esei, Yehova lo reakshoná dor di hala serka nos, permitiendo asina ku nos por tin un relashon íntimo kuné. (Sal. 25:14; Sant. 4:8) Esta un gran bendishon! P’esei, laga nos traha diligentemente pa mantené bon kustumbernan spiritual i kosechá hopi bendishon for di Yehova.
[Study Questions]
1. Dikon ta bon pa nos analisá nos rutina spiritual?
2. Kon e kustumber di lesa Beibel diariamente ta benefisiá nos?
3. Ki bendishonnan nos ta kosechá dor di asistí regularmente na e reunionnan?
4. Kon partisipashon den sirbishi di vèlt tur siman ta benefisiá nos?
5. Dikon ta masha esensial pa hasi orashon na Yehova regularmente?