Kabesnan di Kas—Mantené un Bon Rutina Spiritual
1 Apesar ku Daniel a biba pa dékadanan largu meimei dje idolatria i korupshon di Babilonia, e tabata konosí komo un hende ku a sirbi Yehova “konstantemente.” (Dan. 6:16, 20) Kon el a mantené su spiritualidat? Beibel ta mustra ku e tabatin un bon rutina di aktividat pa loke ta toka adorashon berdadero. Por ehèmpel, e tabatin kustumber di hasi orashon tres bes pa dia den e kamber riba su dak di kas. (Dan. 6:10) Sin duda e tabatin un rutina pa otro aktividat spiritual tambe, por ehèmpel pa lesa e Lei. P’esei, ora Daniel a enfrentá un prueba ku a pone su bida na peliger, su deboshon na Yehova no a tambaliá, i Yehova a skap’é milagrosamente.—Dan. 6:4-22.
2 Nos awe tambe mester hasi esfuerso pa keda “alerta ku tur perseveransia.” (Efe. 6:18) E mundu ku nos ta biba aden ta “bou di kontròl di e malbado.” (1 Huan 5:19) Oposishon òf otro tèst por lanta kabes diripiente i pone nos fe na prueba. Den e gran tribulashon, Gòg di Magòg ta bai ataká Dios su sirbidónan ku tur loke e tin, i lo parse manera kos ku nos no tin manera di skapa. Esei lo eksigí pa nos tin konfiansa kompletu den Yehova.—Eze. 38:14-16.
3 “Un klave vital ta pa komo famia [nos] hasi lesamentu, studio i konsiderashon di Beibel den un manera efikas un parti di [nos] bida.” Esei ta loke a ser bisá den introdukshon dje drama dje kongreso di distrito di 1998. E drama tabata titulá “Famianan—Hasi Lesamentu di Beibel Tur Dia Parti di Boso Bida!” E introdukshon a sigui bisa: “Ora famianan sigui un programa regular asina i ta purba hasi e Beibel bira real pa nan, e rutina aki orientá riba Beibel por tin un tremendo impakto riba e famia. E ta oumentá nos konosementu, ta fortalesé nos fe, i ta duna nos modelonan ehemplar—hòmber- i muhénan di antigwedat profundamente fiel—ku por inspirá nos, impulsando nos pa sostené e bèrdat.” Nos ta bai konsiderá vários aspekto di un bon rutina spiritual, i ta bon pa kabesnan di kas purba identifiká un òf dos área den kua nan lo por mehorá e rutina spiritual di nan famia.
4 Konsiderá e Palabra di Dios Tur Dia: “Ora Dios su Reino ta goberná sin oposishon i su boluntat ta sosodé riba tera meskos ku den shelu, ningun hende feros—nò, ni sikiera animal—lo ‘hasi daño ni kousa ruina.’ (Isa. 11:9; Mat. 6:9, 10)” E palabranan aki a aparesé den e foyeto Eksaminando e Skritura Diariamente—2001 den e komentario riba e teksto pa 11 di sèptèmber. Esta un konsuelo e rekordatorio aki a resultá di ta! Komo kabes di kas, abo tin e kustumber di konsiderá e teksto di Beibel i su komentario tur dia ku bo famia? E ta un kustumber ku ta trese hopi benefisio. Si no ta posibel pa sinta huntu mainta komo famia, kisas boso por hasié mas lat den transkurso di dia. Un tata a bisa: “Atardi ora di kome ta un bon ora pa nos trata e teksto di Beibel pa e dia ei.”
5 Si ya boso tin un bon rutina di trata e teksto di dia komo famia, boso meresé elogio. Kisas boso por saka mas benefisio ainda dor di lesa un parti di Beibel huntu kuné. Algun famia tin kustumber di lesa henter e kapítulo ku e teksto di dia ta saká for di dje. Otro famianan ta skohe un sierto buki di Beibel i lesa for di dje tur dia te ora nan kab’é. Lesa Beibel tur dia lo yuda bo famia desaroyá un temor saludabel pa no hasi Yehova malkontentu, i lo e hasi nan deseo di kumpli ku su boluntat bira mas profundo.—Deu. 17:18-20.
6 Bo famia lo saka asta mas benefisio di boso programa di lesa Beibel i konsiderá e teksto di dia si boso por saka un tiki tempu mas pa papia tokante e balor práktiko dje informashon. E buki di Skol di Ministerio na página 60 ta duna e sugerensia aki: “Bo por skohe un par di versíkulo for di e lesamentu di Beibel programá pa e siman, splika kiko nan ta nifiká, i despues hasi preguntanan manera: ‘Ki guia e versíkulonan aki ta duna nos? Kon nos lo por usa nan den sirbishi di vèlt? Kiko nan ta revelá tokante Yehova i su manera di aktua, i kon nan ta yuda nos haña mas apresio p’e?’” Kòmbersashonnan spiritual asina lo yuda henter bo famia “komprondé kiko ta e boluntat di Señor.”—Efe. 5:17.
7 Studio di Famia: Tene e studio di famia fielmente tur siman ta un ekselente manera pa kabesnan di famia mustra nan yunan ku kos spiritual ta bai promé. Un hóben ta konta: “Tabatin bes ku Tata tabata asina kansá di trabou ku apénas e por a keda lantá. Pero e studio tabata bai dor tòg, i esei a yuda nos mira e seriedat dje asuntu.” Muchanan tambe por duna un man pa e studio di famia por ta un éksito. Un famia ku nuebe yu tabata lanta regularmente sink’or di mainta pa nan tene nan studio di famia, pasobra no tabata por niun otro ora.
8 Pa e studio di famia ta un éksito, e kabes di kas tin ku ‘paga bon tinu na su siñansa.’ (1 Tim. 4:16) E buki Skol di Ministerio na página 32 ta bisa: “Nos por bisa ku pa bo kuminsá un bon studio di famia, bo tin ku studia (òf analisá) bo famia promé. Kon bo miembronan di famia ta progresá den sentido spiritual? . . . Ora bo sali den sirbishi di vèlt ku bo yunan, nan ta sinti nan kómodo ora di identifiká nan mes komo Testigu di Yehova dilanti mucha di nan mes edat? Nan ta gusta boso programa di lesa i studia Beibel huntu komo famia? Realmente nan ta hasiendo e kaminda di Yehova nan estilo di bida? Opservashon kuidadoso lo revelá kiko abo, komo kabes di famia, tin ku hasi pa por inkulká i edifiká kualidatnan spiritual den kada miembro di famia.”
9 Reunionnan di Kongregashon: Prepará pa reunion i asistí na nan mester ta un parti importante di boso rutina di tur siman. (Heb. 10:24, 25) Kisas boso por prepará pa algun dje reunionnan komo famia. Bo por hasi areglo pa boso prepará sufisiente tempu di antemano na lugá di warda te na último momentu? Un bon rutina lo yuda boso prepará mas mihó, i boso lo saka mas benefisio for dje reunionnan.—Pro. 21:5.
10 Pa un rutina spiritual tin e resultado deseá, e mester ta regular i di kalidat. Kiko bo por hasi si bo sirkunstansianan ta pone ku ta difísil pa prepará pa tur reunion? E buki di Skol di Ministerio ta duna e sugerensia aki na página 31: “No kai den e trampa di pasa purá dor di e informashon djis pa bisa ku bo a hasié òf, pió ainda, keda sin studia mes pasobra tòg lo bo no por studia tur kos. En bes di esei, determiná kuantu bo por studia, i hasié bon. Hasié tur siman. Ku tempu, purba amplia bo studio pa inkluí e otro reunionnan.”
11 Dor di yega reunion trempan lo ta mas fásil pa bo famia drenta den e estado mental korekto pa alabá Yehova i benefisiá dje instrukshon ku e ta duna nos. Bo famia tin kustumber di yega trempan? Pa logra hasi esei boso mester plania bon, i tur hende den kas mester koperá. Si bo ta mira ku hopi bes bo famia tin ku hasi lihé-lihé i ta sinti nan anshá riba anochinan di reunion, puntra bo mes si tin manera pa boso adaptá boso rutina. Tin kos ku boso por atendé di antemano? Si un miembro di famia ta kargá ku muchu kos di hasi, e otronan por yud’é ku algu? Lo tin ménos strès si tur hende ta kla pa sali bai reunion algun minüt mas promé? Bon planiamentu ta yuda trese un spiritu di pas, tantu den famia komo den kongregashon.—1 Kor. 14:33, 40.
12 Sirbishi di Vèlt: Ora fiho pa partisipá den sirbishi di vèlt tambe ta parti di un bon rutina spiritual. Un mucha hòmber ku yama Jayson ta konta: “Den mi famia, tur djasabra mainta tabata pa sali den sirbishi di vèlt. Esaki tabata bon pa mi, pasobra mas mi a sali den sirbishi, mas mi a mira e bon ku esei a logra i mas mi a disfrutá di dje.” Hopi otro predikadó ku a krese den famia di Testigu tambe ta bisa ku e echo ku nan famia tabatin ora fiho tur siman pa bai sirbishi a yuda nan hasi progreso komo minister kristian.
13 Ademas, un bon rutina por yuda bo famia tin mas goso den sirbishi di vèlt i prediká ku mas éksito tambe. Kon boso por logra esaki? E Toren di Vigilansia di 1 di yüli 1999, página 21, a duna e siguiente sugerensia: “Bo ta usa tempu di bo studio di famia de bes en kuando pa yuda e miembronan di bo famia prepará pa sirbishi di vèlt p’e siman? Esei por ta masha benefisioso. (2 Timoteo 2:15) Esei por yuda hasi nan sirbishi signifikativo i produktivo. Tempu-tempu lo bo por apartá henter un seshon di studio pa tal preparashon. Ku mas frekuensia, lo bo por trata ku aspektonan dje ministerio di vèlt den konsiderashonnan mas kòrtiku na fin dje studio di famia òf otro ora durante siman.” Bo famia a yega di purba hasi esei?
14 Sigui Hasi Progreso: Bo a nota ku bo famia ta bayendo bon den un òf mas dje áreanan ku nos a kaba di konsiderá? Anto elogiá nan i hasi bo bèst pa sigui mehorá den e áreanan ei. Si bo a mira ku boso mester mehorá den vários área, skohe un òf dos pa traha ariba promé. Unabes ku nan bira parti di bo rutina spiritual, traha riba un òf dos mas. Sea positivo i rasonabel. (Fil. 4:4, 5, NW) Establesé un bon rutina pa bo famia ta algu ku ta eksigí hopi esfuerso. Pero e ta bale la pena, pasobra Yehova ta sigurá nos: “Na esun ku ordená su kaminda korektamente lo mi mustra e salbashon di Dios.”—Sal. 50:23.