Bo Ta Pospon’é?

Posponé kiko? Posponé yenamentu di e karchi di DPA (dokumento duradero di apoderashon médiko) ku ta disponibel pa Testigunan batisá. Siendo ku ‘bo no sa kon bo bida lo ta mañan,’ ta hopi importante pa bo disidí di antemano ki tratamentu médiko lo bo aseptá den kaso di un emergensia médiko i pone esei pretu riba blanku. (Sant. 4:⁠14; Echo. 15:​28, 29) Pa yuda bo den esaki a produsí e vidio Asistensia Médiko sin Transfushon: Kumpliendo ku Nesesidat i Derecho di Pashènt. Wak e vidio, i despues huntu ku orashon repasá loke bo a siña usando e preguntanan ku tin aki bou.​—⁠Nota: Komo ku e vidio tin algun esena kòrtiku di operashon, mayornan mester evaluá si ta wak e vidio huntu ku mucha chikí.

(1) Dikon algun profeshonal den e kampo médiko ta rekonsiderando uso di transfushon di sanger? (2) Menshoná tres ehèmpel di operashon kompliká ku hende a hasi sin transfushon di sanger. (3) Kuantu dòkter i siruhano mundialmente a indiká ku nan ta dispuesto di trata nan pashèntnan sin transfushon di sanger? Dikon nan ta dispuesto pa hasi esei? (4) Kiko estudionan resien hasí den hospitalnan a revelá tokante uso di sanger? (5) Kiko ta e riesgonan médiko ku transfushon di sanger ta trese kuné? (6) Na ki konklushon hopi eksperto a yega relashoná ku e benefisionan di alternativanan pa transfushon? (7) Kiko ta kousa anemia? Te na ki grado hende por soport’é sin afektá nan salú? Kiko por hasi pa remedi’é? (8) Kon por stimulá kurpa di un pashènt pa produsí sèl kòrá? (9) Ki téknika dòkternan ta usa pa minimisá pèrdida di sanger durante operashon? (10) Por usa alternativanan pa transfushon den kaso di mucha òf ora ta trata di hende ku ta den un situashon di bida òf morto? (11) Kua ta un di e prinsipionan étiko mas importante di un bon kuido médiko? (12) Dikon ta importante pa kristiannan disidí di antemano kua tratamentunan sin sanger nan lo ke? Kon nan por hasi esaki?

Kada persona tin ku disidí di akuerdo ku su konsenshi bíblikamente entrená si e ta aseptá òf rechasá sierto tratamentunan ku e vidio ta presentá. Bo a disidí spesífikamente kua tratamentu médiko sin sanger bo ta dispuesto di aseptá pa bo mes i pa bo yunan? Bo a yena bo karchi di DPA kaba? Pa un konsiderashon detayá riba e asuntunan akí, repasá kuidadosamente kapítulo 7 di e buki “Manténganse en el amor de Dios” i e referensianan menshoná den dje. Wak tambe e suplemento “Kiko Mi Ta Pensa di Frakshonnan di Sanger i Tratamentu Médiko Ku Ta Enbolbé Mi Mes Sanger?” den Nos Ministerio di Reino di novèmber 2006. Finalmente, hasi sigur di yena loke bo a disidí riba bo karchi di DPA. Bo representantenan den asuntunan di kuido médiko i kualke famia ku no ta Testigu tambe mester ta bon informá di bo desishonnan.

[Kuadro na página 3]

• Bo a disidí kua tratamentu médiko lo bo ke aseptá pa bo mes i pa bo yunan?

• Bo ta kana ku un karchi di DPA ku ta kompletamente yená por si akaso surgi un emergensia?