Rasoná ku e Doño di Kas
1. Kiko ta duna mihó resultado den sirbishi?
1 Kiko ta duna mihó resultado den sirbishi? Purba imponé nos punto di bista riba e doño di kas òf trata di rasoná kuné i yud’é yega na e konklushon korekto? Apòstel Pablo a rasoná ku e hudiunan na Tesalónika, i “komo resultado, algun di nan a bira kreyente.” (Echo. 17:2-4) Pero kiko rasoná ku hende ta enserá?
2. Kon nos por imitá Pablo ora nos ta prediká e bon notisia?
2 Tene Kuenta ku Sintimentu i Kreensia: Pa nos rasoná ku hende den teritorio, nos mester tene kuenta ku nan sintimentu- i kreensianan. Na komienso di Pablo su diskurso na Areópago, el a menshoná kosnan ku e griegonan no-kreyente probablemente tabata konosé i aseptá. (Echo. 17:22-31) P’esei na momento ku bo ta prepará bo presentashon, tene kuenta ku e kreensia- i prehuisionan ku hende den bo teritorio sa tin. (1 Kor. 9:19-22) Si e doño di kas bini ku un opheshon, purba haña puntonan ku boso tur dos por ta di akuerdo kuné i usa eseinan komo base pa sigui ku e kòmbersashon.
3. Kon nos por usa pregunta na un manera ábil pa rasoná mas mihó ku hende?
3 Usa Pregunta na un Manera Ábil: Nos no por yuda un biahero yega su destinashon si nos no sa unda e ta aktualmente. Meskos ta konta ora nos ta rasoná ku un doño di kas; nos no por yud’é yega na e konklushon korekto si nos no sa su punto di bista. Promé ku Hesus a rasoná ku un oyente, hopi biaha el a hasi pregunta pa haña sa kiko e hende tabata pensa. Por ehèmpel, ora un hòmber a puntr’é: “Kiko mi mester hasi pa haña bida eterno?,” Hesus a hasié algun pregunta pa e haña sa su punto di bista. (Luk. 10:25-28) Na un otro okashon, ora Pedro a duna un kontesta robes, Hesus a usa pregunta na un manera ábil pa korigí Pedro su manera di pensa. (Mat. 17:24-26) P’esei, si e doño di kas hasi un pregunta òf trese un idea robes dilanti, nos por usa pregunta pa rasoná kuné.
4. Dikon nos tin ku purba rasoná ku e doño di kas?
4 Ora nos ta rasoná ku e doño di kas, nos ta imitá tantu e Gran Maestro, Hesus, komo otro predikadónan ábil di promé siglo. I tambe nos ta onra e doño di kas i mustr’é rèspèt. (1 Ped. 3:15) E ora ei lo e ta mas dispuesto pa bolbe risibí nos despues.