No Keda sin Papia
1. Kiko no ta fásil pa hasi i dikon?
1 Bo a yega di keda sin duna testimonio na skol pa miedu ku nan lo a tenta bo? E ta eksigí kurashi, i mas aun si bo ta tímido. Pero kiko lo yuda bo?
2. Dikon bo mester usa sano huisio ora di duna testimonio na skol?
2 Usa Sano Huisio: Aunke ta na su lugá pa mira bo skol komo bo teritorio personal, kòrda ku no ta ku delaster hende ku bo topa bo tin ku purba kòmbersá tokante Beibel, manera ta e kaso ora bo ta prediká di kas pa kas. Usa sano huisio pa determiná ki ora pa papia. (Ekl. 3:1, 7) Un tópiko di kòmbersashon den klas òf un tarea di skol por habri kaminda pa bo papia di bo fe. Òf un kompañero di skol por puntra bo dikon bo no ta partisipá den sierto aktividat. Algun hóben kristian, for di kuminsamentu di aña eskolar, ta bisa nan maestronan ku nan ta Testigu di Yehova i ta ofresé nan literatura ku ta splika nos kreensianan. Tin ta pone literatura riba nan lèsenar pa asina lanta interes di nan kompañeronan di skol pa hasi pregunta.
3. Kon bo por prepará pa duna testimonio na skol?
3 Sea Prepará: Si bo prepará, bo ta haña mas konfiansa. (1 Ped. 3:15) Pues purba antisipá preguntanan ku por presentá i pensa kon lo bo por kontestá nan. (Pro. 15:28) Ta bon si bo por tin bo Beibel na skol i tambe algun publikashon, manera e buki Rasonamentu, e bukinan di Hóbennan Sa Puntra i literatura tokante kreashon. Asina bo por usa nan ora bo mester di nan. Pidi bo mayornan pa inkluí seshonnan di práktika durante boso adorashon di famia.
4. Dikon bo tin ku sigui duna testimonio na skol?
4 Sea Positivo: No pensa ku semper bo kompañeronan di skol lo tenta bo ora bo papia di e bèrdat. Kisas algun lo atmirá e kurashi ku bo tin i nan por asta skucha bo. Pero si esei no ta e kaso, no desanimá. Yehova sí lo ta kontentu ku bo esfuerso. (Heb. 13:15, 16) Keda pidi Yehova yuda bo ‘sigui papia ku tur konfiansa.’ (Echo. 4:29; 2 Tim. 1:7, 8) Imaginá e emoshon ku lo bo sinti ora un persona skucha bo. E persona ei ku tempu asta por bira un sirbidó di Yehova meskos ku bo.