Abo Ta Dispuesto pa Adaptá?
1. Kiko nos mester hasi en bista di e kambionan den e esena mundial?
1 Na 1 Korintionan 7:31, Beibel ta kompará mundu ku un esenario kaminda e esena- i aktornan ta kambia konstantemente. Kambionan den e esena mundial ta pone ku tempu-tempu nos mester adaptá nos método di prediká, nos skèdjel i nos presentashon. Abo ta dispuesto pa hasi esei?
2. Kiko nos tin ku hasi pa keda pareu ku e organisashon?
2 Nos Métodonan di Prediká: E kongregashon kristian semper tabata dispuesto pa adaptá. Por ehèmpel, na promé instante ora Hesus a manda su disipelnan bai prediká, el a bisa nan pa no bai ku saku di kuminda ni plaka. (Mat. 10:9, 10) Pero despues, en bista di e hostilidat ku su disipelnan lo a enfrentá i e ekspanshon di e trabou di prediká den otro teritorio, el a modifiká e instrukshonnan akí. (Luk. 22:36) Durante siglo 20, e organisashon di Yehova a usa diferente método di prediká segun e nesesidat di e époka. Por ehèmpel, nan a usa karchi di testimonio, programanan di radio i outo ku loutspiker. Awe, debí ku den hopi área no ta fásil pa haña hende na kas, nos organisashon a pone mas énfasis pa komplementá nos sirbishi di kas pa kas ku testimonio públiko i informal. Tambe nos a haña e animashon pa bai di kas pa kas mas den atardi si e hendenan ta traha durante dia. Yehova su garoshi selestial ta sigui ahustá su rumbo. Abo ta keda pareu kuné?—Eze. 1:20, 21.
3. Kiko lo yuda nos pa ta mas efisiente den nos sirbishi?
3 Nos Presentashon: Aktualmente, kiko ta preokupá hende den e teritorio? Ta ekonomia, famia òf kriminalidat? Si nos ta na altura di e problema- i sirkunstansianan di e hendenan den nos teritorio, nos lo por prepará un presentashon adekuá. (1 Kor. 9:20-23) Ora un doño di kas bisa nos kiko ta preokup’é, en bes di ignorá esei i sigui ku loke nos a prepará, lo ta mas mihó pa adaptá nos presentashon na su preokupashon.
4. Dikon nos mester ta lihé pa adaptá na sirkunstansia nobo?
4 Pronto mundu su último esena lo terminá, i e gran tribulashon lo kuminsá. “No a sobra muchu tempu mas.” (1 Kor. 7:29) Pues ta masha importante pa nos hasi e adaptashonnan nesesario sin tarda, pa asina nos por hasi mas den e tiki tempu ku a sobra.