Tuma e Profetanan Komo Ehèmpel: Yoël
1. Kon nos por imitá Yoël su humildat ora nos ta prediká?
1 Ken e profeta Yoël tabata? Wèl, e úniko kos ku el a bisa di su mes ta ku e tabata “yu hòmber di Petuel.” (Yoël 1:1) E humilde profeta akí a hala atenshon na Yehova su mensahe, i no na su mes komo e mensahero. Asina tambe, den sirbishi, en bes di buska gloria òf rekonosementu pa nos mes, nos ta hala atenshon di e hendenan na Yehova i na su Palabra, Beibel. (1 Kor. 9:16; 2 Kor. 3:5) Ademas, e mensahe ku nos ta proklamá ta fortalesé nos. Kua ta e aspektonan di Yoël su profesia ku por duna nos mas zelo i speransa?
2. Kiko e echo ku e dia di Yehova ta serka mester motivá nos pa hasi?
2 ‘E Dia di Yehova Ta Serka.’ (Yoël 1:15): Aunke Yoël a skirbi e palabranan akí míles di aña pasá, nos ta bibando den e tempu ku nan lo kumpli den nan totalidat. E kondishon mundial ku ta sigui empeorá i e indiferensia i bofon ku nos ta haña den teritorio ta prueba konvinsente di ku e era malbado akí ta den su último dianan. (2 Tim. 3:1-5; 2 Ped. 3:3, 4) Ora nos para ketu i realisá kon serka e fin ta, nos ta haña mas motibu pa duna e trabou di prediká prioridat den nos bida.—2 Ped. 3:11, 12.
3. Dikon e trabou di prediká ta asina importante awor ku e tribulashon grandi ta serka?
3 ‘Yehova Ta un Refugio pa Su Pueblo.’ (Yoël 3:16): E temblamentu deskribí den e versíkulo akí lo tuma lugá ora Yehova ehekutá su huisio durante e tribulashon grandi. Ta un konsuelo pa sa ku Yehova lo libra su fiel sirbidónan durante e tempu ei. (Rev. 7:9, 14) Segun ku nos ta partisipá den e trabou di prediká i ta eksperensiá kon Yehova ta sostené i fortalesé nos, nos ta desaroyá e fe i awante ku lo yuda nos enfrentá e tribulashon grandi ku ta na kaminda.
4. Dikon nos por regosihá i enfrentá futuro ku konfiansa?
4 Aunke algun hende a deskribí e profesia di Yoël komo un mensahe di kalamidat, e ta ofresé e pueblo di Dios e glorioso speransa di liberashon. (Yoël 2:32) Pues laga nos enfrentá futuro ku konfiansa i proklamá ku zelo e bon notisia di e Reino di Dios segun ku nos ta hasi kaso di e palabranan di Yoël 2:23: ‘Regosihá i sea kontentu den Yehova boso Dios.’