Bo Ta Hasi Esfuerso pa Risibí Privilegio den Kongregashon?
1. Ki ora un ruman hòmber hóben por kuminsá apliká e konseho di 1 Timoteo 3:1?
1 “Si un hòmber ta hasi esfuerso pa bira un superintendente, e ta deseá un trabou ekselente.” (1 Tim. 3:1) E palabranan akí ta animá ruman hòmbernan pa hasi esfuerso pa risibí privilegio den kongregashon. Bo mester ta un adulto pa hasi esei? Wèl, lo ta bon pa bo kuminsá hasi esfuerso for di yòn. Asina bo por risibí entrenamentu i desaroyá e kualidatnan nesesario ku por yuda bo bini na remarke pa sirbi komo sirbidó ministerial ora bo bira grandi. (1 Tim. 3:10) Pues, si bo ta un ruman hòmber hóben batisá, ban wak kiko bo por hasi pa sirbi den kongregashon.
2. Kon un hóben por kultivá i demostrá e deseo di yuda?
2 Kultivá e Deseo di Yuda: Kòrda ku bo ta hasiendo esfuerso pa alkansá un trabou ekselente, no pa haña un título. P’esei, kultivá e deseo di yuda bo rumannan. Pa bo por logra esaki, bo mester meditá riba e bon ehèmpel di Hesus. (Mat. 20:28; Huan 4:6, 7; 13:4, 5) Pidi Yehova yuda bo mustra interes den otronan. (1 Kor. 10:24) Bo por yuda rumannan enfermo òf di edat avansá? Bo ta dispuesto pa yuda ku trabou di limpiesa i mantenshon di e Salòn di Reino? Bo ta ofresé bo mes pa duna parti boluntario den e Skol di Ministerio Teokrátiko? Lo bo ripará ku ora bo duna di bo mes pa yuda otronan, lo bo ta hopi felis.—Echo. 20:35.
3. Kiko ta importante pa un ruman hòmber por sirbi den kongregashon, i kon e por desaroy’é?
3 Traha Riba Bo Spiritualidat: Un ruman ku ke sirbi den kongregashon mester ta na promé lugá un hòmber spiritual; esei ta muchu mas importante ku talento spesial òf abilidat natural. Un hòmber spiritual ta hasi esfuerso pa mira kosnan manera Yehova i Hesus ta mira nan. (1 Kor. 2:15, 16) E ta desplegá e “fruta di spiritu.” (Gal. 5:22, 23) Ademas, e ta un evangelisadó zeloso ku ta pone interes di Reino na promé lugá. (Mat. 6:33) Pa bo por desaroyá kualidatnan spiritual, bo tin ku hasi esfuerso pa sigui un bon rutina di estudio personal. Esaki ta inkluí lesa Beibel tur dia i lesa kada edishon di E Toren di Vigilansia i ¡Despertad! Tambe ta importante pa prepará pa e reunionnan i asistí na nan. (Sal. 1:1, 2; Heb. 10:24, 25) Ora Pablo a animá e hóben Timoteo pa sigui hasi progreso spiritual, el a skirbié e siguiente palabranan: “Presta atenshon konstantemente na . . . e siñansa ku bo ta duna.” (1 Tim. 4:15, 16) Pues, prepará bon pa e partinan ku bo haña den e Skol di Ministerio Teokrátiko. Prepará i sali regularmente den sirbishi. Pone metanan spiritual, manera, traha pionero, sirbi na Bètel, asistí na e Skol Bíbliko pa Ruman Hòmber Soltero, i traha pa alkansá nan. Ora bo fortalesé bo spiritualidat, esei lo yuda bo “hui for di e deseonan di hubentut.”—2 Tim. 2:22.
4. Dikon ta importante pa bo ta fiel i konfiabel?
4 Sea Fiel i Konfiabel: Den promé siglo e apòstelnan a nombra ruman hòmbernan “di bon reputashon,” ku tabata fiel i konfiabel, pa perkurá kuminda pa e kristiannan den nesesidat. E apòstelnan por a atendé otro kosnan importante ya ku nan por a konfia ku e ruman hòmbernan akí lo a kumpli ku nan asignashon. (Echo. 6:1-4) P’esei, ora bo haña un asignashon den kongregashon, hasi tur bo esfuerso pa kumpli mas mihó posibel kuné. Imitá Noe, kende a kumpli eksaktamente ku tur e instrukshonnan ku el a haña pa traha e arka. (Gén. 6:22) Fieldat ta algu masha importante pa Yehova i e ta un muestra di madures spiritual.—1 Kor. 4:2; wak e kuadro “E Benefisionan di Entrenamentu.”
5. Dikon ruman hòmbernan hóben mester hasi esfuerso pa risibí privilegio den kongregashon?
5 Manera Beibel a profetisá, Yehova ta aselerando e kosecha spiritual. (Isa. 60:22) Komo promedio, tur aña 250 mil hende ta batisá. Debí ku tin asina tantu hende nobo ta bini den e bèrdat, mester di mas ruman hòmber spiritualmente kapasitá pa kumpli ku e responsabilidatnan di kongregashon. Awor mas ku nunka tin hopi trabou den e sirbishi di Yehova. (1 Kor. 15:58) P’esei, ruman hòmbernan hóben, boso ta hasi esfuerso pa risibí privilegio den kongregashon? Si ta asina, boso di bèrdat ta deseá un trabou ekselente.
[Komentario na página 2]
Debí ku tin asina tantu hende nobo ta bini den e bèrdat, mester di mas ruman hòmber spiritualmente kapasitá pa kumpli ku e responsabilidatnan di kongregashon
[Kuadro na página 3]
E Benefisionan di Entrenamentu
Ruman hòmbernan hóben ehemplar ta progresá ora ansianonan duna nan asignashon i entrená nan. Un biaha despues di reunion, un superintendente di sirkuito tabata sintá riba plataforma ta animá un publikadó. El a nota ku un mucha hòmber tabata pará den serkania, pues el a puntr’é si e tabata wardando pa papia kuné. E mucha hòmber a kontest’é ku e ta asigná pa stòfzùig e plataforma despues di kada reunion. Su mayornan tabata kla pa bai kas, pero e no tabata ke bai sin kumpli ku su asignashon. Mesora e superintendente a baha for di plataforma. El a bisa: “Den e kongregashon ei, e ansianonan tin kustumber di entrená hóbennan ehemplar i duna nan asignashon den kongregashon. P’esei ta masha normal pa kada bes ku mi bishitá e kongregashon, nan tin ruman hòmber hóben pa rekomendá komo sirbidó ministerial.”