Kon pa Mehorá Nos Sirbishi: Kuminsá un Kòmbersashon a fin di Duna Testimonio Informal

Dikon E Ta Importante: Ora nos ta prediká di kas pa kas, hopi biaha e hendenan no sa ta na kas. Sinembargo, kisas nos ta topa nan por ehèmpel den transporte públiko, na ofisina di dòkter i den pousa na trabou òf na skol. Ta Yehova su boluntat pa tur hende haña e oportunidat di skucha e mensahe di Reino. (1 Tim. 2:3, 4) Mayoria di biaha nos mester tuma e inisiativa i kuminsá un kòmbersashon pa nos por duna testimonio.

Kon pa Hasié:

Opservá bon. E hende ta parse amabel i tin gana di papia? E situashon ta permití bo kòmbersá na un manera trankil? Algun publikadó ta hasi sigur ku e persona ta wak nan promé, anto kaba nan ta smail. Si e persona smail bèk, nan ta purba kuminsá un kòmbersashon kuné.
Si bo no tin kurashi pa papia, hasi un orashon kòrtiku den bo mes.—Neh. 2:4; Echo. 4:29.
Kuminsá bisa algu kòrtiku, kisas djis un: “Kon ta bai?” Ora Hesus a kòmbersá ku e muhé di Samaria, e no a kuminsá papia mesora tokante e Reino kuné. (Huan 4:7) Tin biaha bo por kuminsá un kòmbersashon ku un palabra di elogio, manera: “Bo yunan ta bon mucha!” Un otro manera tambe pa kuminsá un kòmbersashon ta di hasi un pregunta: “Bo a wak notisia ayera nochi?”
Unabes ku bo a kuminsá kòmbersá, buska un oportunidat pa introdusí e bon notisia, pero no hasié di gòlpi. Laga e kòmbersashon desaroyá na un manera natural. Kisas bo por bisa algu ku ta lanta e persona su kuriosidat i pon’é hasi un pregunta. Por ehèmpel, si boso ta kòmbersá tokante famia, bo por bisa: “Mi a haña algun konseho konfiabel tokante kriamentu di yu.” Si boso ta papia tokante algu ku a sali den notisia, bo por bisa: “Anto poko dia pasá mi a lesa un bon notisia.” No sinti bo malu si e kòmbersashon terminá promé ku bo por duna un testimonio.
Perkurá pa bo tin tratado òf otro literatura huntu ku bo pa bo por duna un persona ku mustra interes.

Purba di Hasi Esaki den e Luna Akí:

Tur siman purba di kuminsá por lo ménos un kòmbersashon ku e meta di duna testimonio informal.