Kon pa Mehorá bo Sirbishi​—Kuminsá Kòmbersashon Ku Por Hiba na Testimonio

Hesus por a duna e muhé samaritano testimonio informal pasobra el a kuminsá un kòmbersashon kuné. Kiko por yuda nos kuminsá un kòmbersashon ku hende ku nos no konosé?

• Sea amigabel i kuminsá un kòmbersashon. Aunke Hesus tabata kansá, el a kuminsá su kòmbersashon simplemente pidiendo e muhé samaritano un tiki awa. Pues, bo por kuminsá ku un saludo kaluroso i despues kisas papia tokante e wer òf di algu ku a pasa resientemente. Kòrda, bo meta inisial ta pa kuminsá un kòmbersashon. Pues papia di kualke tópiko ku por interesá e persona. Si e no hasi kaso, bo no a pèrdè nada. Djis purba di kuminsá un kòmbersashon ku un otro hende. Pidi Yehova duna bo kurashi.—Neh 2:4; Ech 4:29.

• Buska oportunidat pa papia di e bon notisia, pero no sea muchu purá pa hasi esei. Laga e kòmbersashon sigui na un manera natural. Si bo keda insistí, e persona por sintié inkómodo i stòp e kòmbersashon. No desanimá si e kòmbersashon terminá promé ku bo logra duna testimonio. Si e idea di purba di papia tokante e bon notisia ta duna bo miedu, train kuminsá un kòmbersashon sin enfoká riba duna testimonio. [Pasa vidio 1 i analis’é ku e presentenan.]

• Purba di krea un oportunidat pa duna testimonio bisando algu tokante bo fe. Esei por motivá e persona pa pidi bo pa mas informashon. Hesus a bisa algun kos interesante ku a motivá e muhé samaritano pa hasié pregunta. Pues, ora Hesus a papia tokante e bon notisia, e tabata djis kontestando e preguntanan di e muhé samaritano. [Pasa vidio 2 i analis’é ku e presentenan; despues hasi meskos ku vidio 3.]