Mi A Laga Yehova Dirigí Mi Bida

DI INGLATERA PA KURASON DI AFRIKA

M’a nase na 1935 na Darlaston ku ta parti di Black Country. E region ei na Inglatera a haña su nòmber debí ku e aire tabata yen di huma pretu di e fabrikanan. Mi mayornan a kuminsá studia Beibel ku Testigunan di Yehova ora mi tabatin mas o ménos kuater aña. Ora mi tabatin rònt di 14 aña, mi tabata konvensí ku esaki ta e bèrdat, i m’a batisá na 1952 ku 16 aña.

Den e mesun tempu ei, m’a kuminsá kore stazje pa un funshon masha importante na un fábrika grandi ku tabata traha hèrmènt i piesa pa outo. Mi tabata gusta loke mi tabata siña masha hopi mes.

Un dia, m’a haña mi tin ku tuma un desishon masha importante. Un superintendente biahero a bishitá mi kongregashon na Willenhall i a pidi mi pa den siman mi dirigí e Estudio di Buki di Kongregashon. Pero, tabatin un problema. E tempu ei mi tabata bai dos kongregashon. Komo ku mi trabou tabata keda na Bromsgrove, 32 kilometer leu for di kas, den siman mi tabata bai e kongregashon ku tabata mas serka di mi trabou. Anto ora mi bai kas wikènt, mi tabata bai e kongregashon di Willenhall.

Komo ku mi kier a apoyá Yehova su organisashon, m’a hasi loke e superintendente biahero a pidi mi, aunke ku esei a nifiká ku mi mester a stòp ku e stazje ku mi tabata gusta masha tantu mes. Pero, nunka m’a lamentá e desishon di laga Yehova dirigí mi bida, anto esei a duna mi un bida masha dushi mes.

Tempu mi tabata bai e kongregashon di Bromsgrove, m’a topa Anne, un ruman masha bunita mes i ku tambe kier a hasi hopi pa Yehova. Nos a kasa na 1957 i huntu nos a disfrutá di vários asignashon, manera pionero regular, pionero spesial, trabou di biahero i nos a sirbi na Bètel. Anne realmente a yena mi bida ku goso.

Na 1966, nos a bai e di 42 klas di Galaad. Nos asignashon tabata Malawi, konosí komo e kurason di Afrika debí ku e hendenan einan ta masha amabel. Pero, nos no por a imaginá ku ta pa un periodo kòrtiku so nos lo tabata bon biní.

KAMBIONAN DRÁSTIKO NA MALAWI

Nos a yega Malawi 1 di febrüari 1967. Nos a pasa henter e luna ei ta siña e idioma pa despues kuminsá ku e trabou di distrito. Nos tabatin un Jeep Kaiser. Algun hende tabata pensa ku por a pasa kuné tur kaminda, asta den riu. Pero, realidat ta ku apénas e por a pasa den un plas grandi di awa. Tabatin biaha, nos tabata keda den kas di lodo ku dak di yerba seku. Ora áwaseru kai, nos mester a pone tapòl bou di e dak pa nos no muha. Pues, nos asignashon di misionero a kuminsá ku vários difikultat, pero tabata masha dushi mes.

Na aprel, m’a realisá ku nos lo bai haña nos ku problema. Presidente di Malawi, Dr. Hastings Banda a duna un diskurso na radio, anto el a bisa ku Testigunan di Yehova no ta paga belasting i ku nan ta kousa problema pa gobièrnu. Klaru ku tur e kosnan ei no tabata bèrdat. Nos tur tabata sa ku loke tabata kunsumí nan ta e echo ku nos no tabata mete den asuntunan polítiko i, foral, dor ku nos no tabata kumpra karchi pa bira miembro di partido polítiko.

Na sèptèmber, nos a lesa den korant ku e presidente a akusá nos rumannan di ta kousa problema den e pais. Na un reunion polítiko el a bisa ku pronto su gobièrnu lo prohibí e trabou di Testigunan di Yehova. E prohibishon ei a drenta na vigor riba 20 di òktober 1967. Poko despues di esei, polis i imigrashon a bini pa sera e sukursal i deportá tur misionero for di e pais.

Despues di tres dia den prizòn, nan a deportá nos pa Maurisio, un pais bou di mando di Gran Bretaña. Pero, e outoridatnan na Maurisio no a laga nos keda einan komo misionero. P’esei, e organisashon a manda nos Rodesia, ku awe ta Zimbabwe. Ora nos a yega, nos a haña nos ku un ofisial di imigrashon masha brutu mes; e no tabata ke pa nos drenta. El a bisa: “Nan a saka boso fo’i Malawi. Nan no tabata ke boso na Maurisio, anto awor boso ta bini akinan djis pasobra ta kumbiní boso.” Anne a kuminsá yora. Tabata parse ku niun hende no tabata ke nos. Na e momento ei, e úniko kos ku mi tabata ke ta piki mi bulchinan i bai bèk Inglatera. Finalmente, imigrashon a laga nos pasa anochi na e sukursal basta nos raportá na nan ofisina e siguiente dia. Nos tabata hopi kansá, pero nos a sigui laga e kosnan den man di Yehova. Pa nos sorpresa, e siguiente atardi nos a haña pèrmit pa keda na Zimbabwe komo bishitante. Nunka mas lo mi lubidá kon m’a sinti e dia ei. Mi tabata konvensí ku ta Yehova tabata dirigí nos bida.

UN ASIGNASHON NOBO: TRAHA FOR DI ZIMBABWE PA MALAWI

Mi trabou na e sukursal di Zimbabwe tabata den Departamento di Sirbishi. Mi tabata atendé ku e teritorio di Malawi i Mozambique. Mi mester a tradusí e informenan ku e sirkuitonan na Malawi tabata manda. E rumannan na Malawi tabata pasa den persekushon hopi kruel. Un biaha, m’a keda traha te anochi lat pa kaba un informe. M’a yora ora m’a lesa kuantu abusu kruel mi rumannan tabata pasa aden.a Pero, nan lealtat, fe i perseveransia a animá mi mashá.—2 Kor. 6:4, 5.

Nos a hasi tur loke nos tabata por pa perkurá literatura bíbliko pa e rumannan ku te ainda tabata na Malawi i esnan ku a hui bai Mozambique. A perkurá pa e tim di chichewa, e idioma mas papiá na Malawi, muda pa un kunuku grandi di un ruman na Zimbabwe. E ruman akí di su mes a traha kasnan i ofisina pa e rumannan di e tim. Asina ei, nan por a sigui ku e trabou importante di tradusí publikashon bíbliko.

Nos tabata hasi areglo pa tur aña e superintendentenan di sirkuito na Malawi bini Zimbabwe pa asistí na e kongreso di distrito na chichewa. Einan nan tabata haña boskeho di e diskursonan. Ora nan tabata bai bèk Malawi, nan tabata hasi esfuerso pa kompartí loke nan a siña ku e rumannan. Un di e añanan ei, nos a logra tene Skol di Ministerio di Reino pa fortalesé e superintendentenan di sirkuito yen di kurashi ei.

Na febrüari 1975, m’a biaha bai bishitá e rumannan di Malawi ku a hui bai kampo di refugiado na Mozambique. Nan tabata al dia ku sobrá di Yehova su organisashon; ya nan tabatin kuerpo di ansiano kaba. E ansianonan nobo a organisá aktividatnan spiritual, manera diskurso, analisá e teksto di dia, E Toren di Vigilansia i asta asamblea. Nan a organisá e kampo meskos ku un kongreso. Tabatin departamento di limpiesa, di kuminda i di siguridat. E rumannan fiel akí a logra asina tantu pasobra nan tabatin Yehova su bendishon. M’a sali djeinan masha animá mes.

Rònt di 1979, e sukursal na Zambia a kuminsá supervisá Malawi. Pero, ainda mi tabata pensa riba e rumannan na Malawi i tabata hasi orashon pa nan, i hopi otro ruman tabata hasi meskos. Mi tabata miembro di e Komité di Sukursal di Zimbabwe. Debí na esei, na vários okashon mi tabata reuní ku representantenan di sede mundial i otro rumannan ku tabata dirigí e trabounan na Malawi, Suráfrika i Zambia. I semper nos tabata hasi e mesun pregunta: “Tin mas kos ku nos por hasi pa e rumannan na Malawi?”

Ku tempu, e persekushon na Malawi a kuminsá baha. Rumannan ku a hui for di e pais a kuminsá bai bèk. Anto esnan ku a keda Malawi tabata haña ménos persekushon. E paisnan bisiña a kuminsá kita restrikshon i a permití e rumannan prediká i reuní huntu. Mozambique a hasi meskos na 1991. Pero, nos tabata blo puntra nos mes: “Ta ki dia e prohibishon na Malawi lo kita?”

NOS A REGRESÁ MALAWI

Ku tempu, e situashon polítiko na Malawi a kambia. Na 1993, gobièrnu a kita e prohibishon riba nos obra. Djis despues di esei mi tabata kòmbersá ku un misionero, i el a puntra mi: “Lo bo bai Malawi bèk?” Mi tabatin 59 aña i p’esei m’a bis’é: “Nò, mi ta muchu bieu!” Pero, e mesun dia ei m’a haña un faks for di Kuerpo Gobernante pa puntra nos si nos lo ke bolbe Malawi.

Nos tabata gusta nos asignashon na Zimbabwe mashá, pues e desishon ei no tabata fásil. Zimbabwe a bira nos kas, i nos tabatin bon amigu einan. Kuerpo Gobernante tabata amabel i a bisa ku nos por a keda Zimbabwe si nos ta preferá esei. Pues, tabata fásil pa bisa nan ku nos lo keda Zimbabwe. Pero, m’a kòrda riba Abraham ku Sara. Nan a obedesé Yehova su instrukshon i a bandoná nan bida konfortabel aunke nan tabata grandi kaba.—Gén. 12:1-5.

Nos a disidí di sigui e guia di Yehova su organisashon i nos a regresá Malawi riba 1 di febrüari 1995, eksaktamente 28 aña despues ku nos a yega einan pa promé biaha. Tabata nessesario pa forma un Komité di Sukursal. Ami i dos ruman tabata parti di dje. Mesora nos a kuminsá organisá aktividatnan di Testigunan di Yehova.

YEHOVA TA LAGA E TRABOU KRESE

Tabata un bendishon pa mira kon Yehova a hasi e trabou krese rápidamente. E kantidat di publikadónan na 1993 tabata 30.000, anto na 1998 e tabata mas ku 42.000.b Kuerpo Gobernante a aprobá konstrukshon di un sukursal nobo ku lo a atendé ku tur e trabounan na Malawi. Nos a kumpra un tereno di 12 hèktar na Lilongwe, i m’a haña e asignashon pa traha den komité di konstrukshon.

Na mei 2001, Ruman Guy Pierce di Kuerpo Gobernante a duna e diskurso di dedikashon pa e sukursal nobo. Mas ku 2.000 Testigu di e pais a asistí i mayoria di nan tabatin mas ku 40 aña batisá. E rumannan fiel akí a pasa den hopi persekushon kruel durante hopi aña. Den sentido material, nan tabata pober, pero den sentido spiritual nan tabata masha riku mes. Nan tabata masha kontentu ku nan por a bishitá e sukursal nobo. Tur kaminda ku nan a bai nan tabata kanta e kantikanan di Reino na estilo afrikano. Esei tabata un di e okashonnan di mas emoshonante ku m’a yega di eksperensiá. E rumannan ei tabata un prueba bibu ku Yehova realmente ta bendishoná esnan ku keda fiel apesar di prueba.

Despues di e konstrukshon di e sukursal, mi tabatin e privilegio di duna diskurso di dedikashon di Salòn di Reino. E kongregashonnan na Malawi tabata masha kontentu ku e programa di konstrukshon di Salònnan di Reino na paisnan di ménos rekurso. Ántes, algun kongregashon tabata reuní bou di ramada trahá di palu di eukalipto ku dak trahá di mat di yerba i banki largu trahá di lodo. Awor, e rumannan yen di ánimo tabata hòrna klenku den fòrnu ku nan mes a traha pa asina konstruí Salònnan di Reino. Pero te ainda nan ta preferá banki, pasobra manera nan ta bisa: ‘Riba banki semper tin lugá pa un hende mas.’

Algu tambe ku a duna mi goso tabata di mira kon Yehova ta yuda hende haña un mihó amistat kuné. Loke a impreshoná mi di e rumannan hóben afrikano tabata ku semper nan tabata kla pa hasi kualke trabou ku pidi nan, i nan tabata kapta loke e organisahon tabata siña nan masha lihé. Esei a habri kaminda pa nan por a haña mas responsabilidat den kongregashon i na Bètel. Ademas, e superintendentenan di sirkuito resien nombrá a yuda fortalesé e kongregashonnan. Mayoria di e rumannan ei tabata kasá. Pa hasi mas pa Yehova nan a disidí pa no haña yu, apesar di e preshon di komunidat i di famia.

KONTENTU KU MI DESISHONNAN

Despues di 52 aña na Afrika, m’a haña mi ku algun problema di salú. Komité di Sukursal di Malawi a rekomendá nos bai Gran Bretaña, i Kuerpo Gobernante a aprobá esei. Nos tabata tristu ku nos mester a laga e asignashon ku nos tabata stima asina tantu, pero e famia di Bètel na Gran Bretaña ta kuida nos bon.

Mi ta konvensí ku e mihó desishon ku m’a tuma tabata di laga Yehova dirigí mi bida. Si m’a purba di bai tras di mi mes komprondementu, mi bida lo tabata hopi diferente. Pero, Yehova semper tabata sa loke mi tabatin mester den mi bida. (Pro. 3:5, 6) Ora mi tabata hóben, mi tabata loko pa siña kon un kompania grandi tabata hinká den otro. Pero, Yehova su organisashon mundial a duna mi un karera ku a yena mi ku satisfakshon. Sirbi Yehova tabata i ta sigui duna mi un bida ku propósito.